Taleh Bağırzadə ictimai rəyi çaşdırmaq məqsədi güdür

Nardaran hadisələri ilə bağlı keçiriliən məhkəmə prosesində təqsirləndirilən Taleh Bağırzadənin vəkilinin guya cinayət işinin materiallarında göstərilən xüsusatların  respublikanın daxili işlər naziri, general-polkovnik cənab Ramil Usubovun məlum olayla bağlı ötən il dekabrın 2-də Azərbaycan Dövlət Televiziyasına müsahibəsində səsləndirdiyi fikirlərə uyğun gəlməməsi barədə iddialarının heç bir hüquqi əsası yoxdur və həmin fikirlər qəsdən ictimai rəyi çaşdırmaq məqsədi daşıyır.

Nazir sözügedən müsahibəsində bir ildən artıq mövcud olan “Müsəlman birliyi hərəkatı”nın əsas məqsədinin qeyri-konstitusion yolla hakimiyyətə gəlmək, Azərbaycanda din pərdəsi altında şəriət qanunları ilə idarə edilən dövlət yaratmaq olduğunu vurğulayıb, həmin silahlı təşkilatın Nardaran qəsəbəsində Azərbaycan dövlətinə və konstitusion quruluşuna qarşı açıq fəaliyyətə başladığını bildirib.

Sözsüz ki, hər bir ölkənin, o cümlədən, Azərbaycanın dövlət və konstitusion quruluşunu dəyişməyə yönəlmiş cinayətkar aktların və hüquqazidd əməllərin qarşısı aidiyyatı hüquq-mühafizə orqanları tərəfindən qətiyyətlə alınmalıdır.      Qeyd olunmalıdır ki, möhtərəm dövlət başçımız ölkəmizdə cinayətkarlıqla mübarizə, insan hüquq və azadlıqlarının, sabitliyin dönməzliyinin təmini, habelə, dövlətin və vətəndaşlarımızın qanuni mənafelərinin hər cür cinayətkar qəsdlərdən etibarlı qorunması üçün hüquq-mühafizə, o cümlədən, daxili işlər orqanları qarşısında  çox mühüm vəzifələr qoyub.

Noyabrın 26-da respublikanın Baş Prokurorluğu, Daxili İşlər və Milli Təhlükəsizlik nazirliklərinin əməkdaşlarının iştirakı ilə yaranmış vəziyyət nəzərə alınmaqla Nardaran qəsəbəsində xüsusi əməliyyat planı hazırlanaraq həyata keçirilib. Əməliyyat zamanı radikal dini ekstremist yönümlü təşkilatın üzvləri hüquq-mühafizə orqanlarının əməkdaşlarına silahlı müqavimət göstərib, onlara avtomatlardan atəş açılıb, üzərlərinə qumbaralar atılıb.

O ki qaldı əməliyyat zamanı cənab nazirin məlum müsahibəsində səslənmiş 5 nəfərin məhv edilməsi barədə vəkilin iddialarına,  qeyd edilməlidir ki, həmin rəqəm insan tələfatı ilə bağlı daxil olmuş ilkin məlumat olub. Lakin əməliyyat başa çatdıqdan sonra hüquq-mühafizə orqanlarının əməkdaşlarına silahlı müqavimət göstərərək zərərsizləşdirilənlərin sayının 4 olduğu müəyyən edilib.

Ölkənin konstitusion dövlət quruluşunu zorla dəyişdirməyə və qanuni hakimiyyəti silahlı yolla devirməyə çalışdıqlarına görə ittiham olunan “Müsəlman birliyi hərəkatı”nın rəhbərliyi və vəkilləri artıq məhkəmə prosesinin başa çatmaqda olduğunu, müdafiə taktikalarının qurulması məqsədilə qanunla qadağan olunmayan bütün vasitələrdən maksimum yararlanaraq, törətdikləri ağır cinayətlərə görə layiqli cəzalarını alacaqlarını bildiklərindən ictimai rəyi bilərəkdən başqa səmtə yönəltmək, özlərinin guya günahsız obrazlarını formalaşdırmaqla ölkənin rəhbərliyinə daxil olan şəxsləri qəsdən üz-üzə qoymağa cəhd edir, barələrində açıq şantaj və böhtan xarakterli məlumatlar yaymaqdan belə çəkinmirlər.

Ancaq belələri və onları dəstəkləyən qüvvələr unutmamalıdırlar ki, daxili işlər orqanlarının əməkdaşları hər zaman dövlət müstəqilliyimizin qorunub-saxlanılmasında canlarını belə əsirgəməyib, Azərbaycan vətəndaşlarının təhlükəsizliyinin, ictimai-siyasi sabitliyin, eyni zamanda, dövlətçiliyin qorunmasında, xidməti vəzifələrinin yerinə yetirilməsində, eyni zamanda, torpaqlarımızın müdafiəsində üzərlərinə düşən vəzifələri layiqincə yerinə yetiriblər və cəmiyyət üçün gərəkli, fədakar xidmətlərini bu gün də uğurla davam etdirirlər.

Məhkəmə prosesində T.Bağırzadə və vəkilinin kütləyə hesablanmış populist və təxribat xarakterli bəyanatlarının əksinə olaraq, polis əməkdaşları Nardaranda həyata keçirilmiş xüsusi əməliyyat zamanı öz vəzifə borclarına sadiq qalıb, uzun müddət hüquqi müstəvidən və dövlət idarəçiliyindən təcrid olunmuş, nəhayət ötən ilin sonlarından konstitusion məcraya qaytarılmış qəsəbədə qanunçuluğun, hüququn aliliyinin bərpa edilməsində, ölkənin hər yerində olduğu kimi burada da əmin-amanlığın, sabitliyin, bir il əvvələdək kütləvi şəkildə pozulan insan hüquq və azadlıqlarının təmin edilməsində yaxından iştirak edirlər.

Onu da qeyd edək ki, bu gün ölkə rəhbərliyinin xüsusi diqqət və qayğısı nəticəsində Nardaranda illərdən bəri yığılıb qalmış problemlərin həlli istiqamətində kompleks tədbirlər, geniş quruculuq, abadlıq işləri həyata keçirilir. Uzun müddət dövlət orqanlarının fəaliyyət göstərmədiyi qəsəbədə normal iş ahəngi tam qaydada bərpa edilib. Dövlətin nardaranlılara göstərdiyi diqqətin miqyasını təsəvvür etmək üçün bir neçə faktı sadalamaq zənnimizcə, yerinə düşər. Vaxtilə respublikamızda kriminogen durum baxımdan ən gərgin məkanlardan biri kimi tanınan qəsəbədə baş verən cinayətlərin 98 faizinin üstü açılıb. Fəaliyyət göstərdiyi təqribən 1 il müddətdə 42-ci Polis Bölməsində 3 minə yaxın vətəndaş qəbul edilib,  1067 nəfər müxtəlif cinayətlər və hadisələr barədə ərizə ilə müraciət edib. Polisin vəsadəti əsasında 100-dən çox nardaranlı işlə təmin olunub. Uzun illər hərbi xidmətdən yayınmış 765 çağırışçının 761-i Silahlı Qüvvələrə həqiqi hərbi xidmətə göndərilib. Vətəndaşlardan qanunsuz saxlanılan 50-dən çox müxtəlif növ odlu silah, o cümlədən avtomatlar, tapançalar, ov silahları götürülüb və ya təhvil alınıb.

Vətəndaşlardan, o cümlədən nardaranlılardan yuxarı instansiyalara ünvanlanan yüzlərlə müraciət, teleqram və məktublarda bu gün qəsəbədə görülən işlərə, həyata keçirilən çoxcəhətli fəaliyyətə görə ölkə rəhbərliyinə dərin minnətdarlıq və razılıq ifadə olunur.