Xədicə İsmayılı tutduran adamdan sensasion müraciət VİDEO

Tural Mustafayev şikayət ərizəsini şantaj olunaraq yazdığını bəyan etdi və elə adlar çəkdi ki...

«Bu işdə tək mən yox, videosu olan şəxslərin bir neçəsi də «verbovat» olunub»

Tanınmış araşdırmaçı jurnalist Xədicə Ismayılın həbsində vasitəçi olmuş Tural Mustafayevin sensasion video-müraciəti yayımlanıb. “Youtube”da yayımlanan video-müraciətdə Tural Mustafayev bəyan edir ki, o, Milli Təhlükəsizlik Nazirliyi və prokurorluq əməkdaşları tərəfindən şantaj olunaraq, Xədicə Ismayıla qarşı şikayət ərizəsi yazmağa məcbur edilib.
Tural Mustafayevin Göyçay rayonunda yaşadığı evdə lentə alınmış videoda səsləndirdiyi fikirləri təqdim edirik:

***

Xatırladaq ki, Xədicə Ismayıl ötən il dekabrın 5-də CM-nin 125-ci (özünü öldürmə həddinə çatdırma) maddəsilə təqsirləndirilərək, Səbail rayon məhkəməsinin qərarı ilə barəsində həbs-qətimkan tədbiri seçilib. Ittihama görə, guya, Xədicə Ismayıl Tural Mustafayevi intihara əl atmağa vadar edib. Bakı şəhər prokurorluğu bu haqda açıqlamasında göstərmişdi ki, cinayət işi Tural Mustafayevin şikayət ərizəsi əsasında başlanıb. Indi isə Mustafayevin özü bəyan edir ki, həmin ərizəni yazmağa şantaj yolu ilə məcbur edilib.
Yeri gəlmişkən, ötən il dekabrın sonlarında Tural Mustafayev “facebook” səhifəsində Xədicə Ismayıldan şikayətçi olmadığı barədə qeyd paylaşdıqdan sonra yoxa çıxdı və bir neçə ay onun harada olduğu barədə heç bir məlumat verilmədi. Video-müraciətindən belə anlaşılır ki, həmin müddətdə o, hüquq-mühafizə orqanlarının nəzarəti altında, faktiki ev dustaqlığı şəraitində saxlanılıb.
Nəhayət, aprelin əvvəlində Tural Mustafayev yenidən “facebook” səhifəsində baş prokuror Zakir Qaralova ünvanladığı məktubun şəklini paylaşdı. Həmin məktubda o, Xədicə Ismayıldan şikayətçi olmadığını, ərizəsini geri götürmək istədiyini yazır, həmçinin ölkədən çıxışına qoyulan qadağanın aradan qaldırılmasını istəyirdi. Yenə də həmin müraciətdən sonra Tural Mustafayev “yox oldu” və nəhayət, üç gün əvvəl onun video-müraciəti ortaya çıxdı.

Hələlik hüquq-mühafizə orqanları sözügedən video-müraciətə heç bir reaksiya verməyib.

Tanınmış vəkil Fəxrəddin Mehdiyev “Azadlıq”a açıqlamasında bildirib ki, Xədicə Ismayılın işi üzrə istintaqı aparan orqan mütləq bu video-müraciəti nəzərə almalıdır. Çünki söhbət şantaj yolu ilə yazdırılmış ərizə əsasında başlanmış cinayət işindən gedir: “Doğrusu, istintaq orqanının bu video-müraciəti nəzərə alacağı gözlənilmir. Lakin mən normal halda atılmalı addımdan danışıram. Bütün bunlara baxmayaraq, hesab edirəm ki, Xədicə Ismayılın müdafiəçiləri bu video-müraciəti əsas gətirərək, Tural Mustafayevin şikayəti əsasında başlanmış cinayət işinə xitam verilməsi məsələsini gündəmə gətirəcəklər. Məcburi qaydada məlum cinayət işi davam edə bilməz və bu işə artıq xitam verilməlidir”.

AXCP sədri Əli Kərimli isə yayılan videomüraciətə facebook səhifəsində münasibətini açıqlayıb. Bildirib ki, bu müraciət Xədicə İsmayılın siyasi sifarişlə həbs edildiyini bir daha təsdiqləməklə yanaşı, indiki rejimin kriminal mahiyyət daşıdığını ortaya qoyur:

"Əvvəlcədən bilinirdi ki, Xədicə İsmayıla qarşı cinayət işi saxtakarlıqla, zorla düzülüb-qoşulub. Amma bu videoda rejimin kriminal mahiyyəti, öz vətəndaşlarına qarşı törətdiyi cinayətlər detallı şəkildə ifşa olunur. Bu qanunsuzluqları törədən adamların adları çəkilir. Təhlükəsizlik strukturlarının ələ aldığı başqa adamlardan da istifadə olunacağı anons edilir. Baxın və görün ki, vicdanlı adamlara qarşı hansı alçaq üsullarla mübarizə aparılır. Bumu dövlət? Bumu dövlətçilik? Kriminal rejimin qulluğunda duranlar utanırlarmı?".