Yoxlamalar bütün dünyada olduğu kimi təsadüfi seçim qaydasında və əsaslı şübhələr olduğu halda keçirilsin

Ötən həftə, “sahibkarlıq sahəsində yoxlamaların nizama salınması və istehlakçıların hüquqlarının qorunması” məqsədilə prezident İlham Əliyev “Sahibkarlıq sahəsində aparılan yoxlamaların vahid məlumat reyestrinin forması və aparılması qaydası haqqında Əsasnamə”ni təsdiqləyib.

Respublikaçı Alternativ hərəkatının həmsədri İlqar Məmmədov bu sənədi rüşvətlə mübarizə istiqamətində Əliyev iqtidarının tam iflasa uğramasının etirafı kimi qiymətləndirir:

Hələ 1996-cı ilin iyununda Heydər Əliyev “Əsassız yoxlamaların qadağan edilməsi barədə” bir fərman imzalamışdı. Kütləvi rüşvətxorluğu 15 ildə cilovlamağı bacarmayan iqtidar, indi də yoxlamaların ayrıca qeydiyyatını aparmaq kimi gülünc bir icad ortaya qoyur. 15 il yetərli olmadısa, “yoxlamalar reyestri” kimi gözdən pərdə asan daha bir bürokratik ölçü də heç nə verməyəcək.

İ.Məmmədov təklif edir ki, yoxlamalar bütün dünyada olduğu kimi təsadüfi seçim qaydasında və əsaslı şübhələr olduğu halda keçirilsin:

Əgər əsaslı pozuntulara dair şübhələr həddindən artıqdırsa, yəni şirkətlərin 10-15 faizindən çoxunu əhatə edərsə, deməli problem şirkətlərdə deyil, onların əməliyyat çevrəsindədir. Vergilərin əlverişliliyindən tutmuş məhkəmə icraatının keyfiyyətinə qədər geniş sahəli bu çevrəni düzəltmək dövlətin vəzifəsidir.  Öz vəzifəsinin öhdəsindən gələ bilməyəndə, dövlət əsaslı-əsassız yoxlamaların sayını artırır, indi isə, onların hətta reyestrini aparmaq kimi yersiz ideyalarla çıxış edir.

Hərəkatın digər təkliflərini də yorumlayan Re: AL!-ın həmsədri bildirdi ki, rüşvətə qarşı təsirli siyasət həm də dövlətin qətiyyətini göstərən əməllərdən ibarət olmalıdır:

Neft amili nəzəra alınaraq, vergi sistemi dəyişdirilməli, gömrükdə, digər tənzimləyici və idarəçilik qurumlarında normal maaşlara və yüksək intizama əsaslanan tədbirlər kompleksi həyata keçirilməlidir ki, dövlət orqanlarının gündəlik iş təcrübəsindən rüşvət yox olsun.