ABŞ öz mesajlarını fərqli yollarla çatdırır – səfir Li Litsenberger

Bakı/20.11.19/Turan: ABŞ ATƏT-in Minsk Qrupunun həmsədri olaraq Dağlıq Qarabağ münaqişəsinin dinc həlli yolunun tapılması öhdəliklərinə sadiqdir. Bu barədə dünən ABŞ-ın Azərbaycandakı səfiri Li Litsenberger Facebook-da diplomatik missiyanın səhifəsində canlı yayında sualları cavablandırarkən bildirib.

“Bizim bu sahədəki fəaliyyətimiz Helsinki Yekun Aktının prinsiplərinə əsaslanır. Bu sırada üç prinsipi qeyd etmək istərdim. Razılaşdırılmış sülh müqaviləsi əsas olaraq güc və ya gücün istifadə olunmaması prinsipinə əsaslanmalıdır. İkinci prinsip ərazi bütövlüyünə göstərilən hörmət prinsipi olmalıdır. Üçüncü prinsip ondan ibarətdir ki, insanların öz müqəddaratını müəyyənləşdirmək haqqına hörmətlə yanaşılmalıdır”, deyə səfir ABŞ-ın Azərbaycan ərazilərini işğal edən Ermənistana qarşı sanksiyalar tətbiq etmək yerinə ona maliyyə yardımı göstərməsi barədə suala cavabda bildirib.

Onun sözlərinə görə, ABŞ Qarabağ münaqişəsinin nizamlanmasında çox maraqlıdır. “Biz iki tərəflə danışıqlar apararaq, hər iki tərəfin bir araya gəlib münaqişənin həll yolunu tapmasına yardım edirik. Bu istiqamətdə hər hansı tərəfin üzərinə sanksiya qoymaq əvəzinə, biz iki tərəflə də işləyirik”, deyən səfir qeyd edib ki, ABŞ hər iki tərəfə maliyyə yardımı göstərib.

1992-ci ildən ABŞ Azərbaycana 1,5 mlrd. dollar maliyyə yardımı göstərib, bu vəsaitdən müxtəlif sahələrdə istifadə olunub.

Xüsusən, səhiyyənin, kənd təsərrüfatının, iqtisadiyyatın, təhsilin, təhlükəsizliyin inkişafına və s. dəstək göstərilib.

“Azərbaycana yardım edərkən münaqişənin nəticələrinin aradan qaldırılmasına və ölkənin inkişafına yardım etmək istəyirik”, deyə Litsenberger bildirib.

ABŞ Azərbaycan hökumətinə qanunun aliliyinin təminatında və demokratik dəyərlərə hörmətlə yanaşmasında təzyiq göstərə bilərmi? Bu suala cavabda səfir deyib ki, qanunun aliliyinin təmin edilməsi və demokratik dəyərlərə hörmət sağlam cəmiyyətin, iqtisadi inkişafın, həmçinin əhalinin rifahının yaxşılaşdırılması üçün çox vacibdir.

“Görüşlərim zamanı Azərbaycan hökumətindəki həmkarlarıma hər zaman deyirəm ki, Azərbaycan daha çox, daha artıq xarici sərmayə cəlb etmək istədiyi təqdirdə qanunun aliliyinə, insan haqlarına hörmətlə yanaşmaq lazımdır. Eyni zamanda, bu sıraya toplaşmaq və söz azadlığı da daxildir. Tamamilə əminəm ki, ümumiyyətlə insanların konstitusiya tərəfindən təmin olunan hüqüqlarına hörmətlə yanaşılma Azərbaycanın müstəqilliyinə, firəvanlığına və iqtisadi inkişafına təkan verir”, deyə səfir qeyd edib.

Əvvəllər ABŞ vətəndaş cəmiyyəti fəallarına və müxalifətçilərə qarşı repressiyalara sərt reaksiya verirdi. Amma son zamanlar Amerikanın reaksiyası kifayət qədər kəskin deyil. Bu, ABŞ-ın siyasətinin dəyişməsi deməkdir? Bu suala cavabda səfir bildirib ki, ABŞ dünyanın müxtəlif ölkələrində demokratiya və qanunun aliliyinin təmin edilməsinə, demokratik dəyərlərin təşviqinə yardım etmək istəyir. Bu mesajın Azərbaycan hökumətinə və Azərbaycan vətəndaşlarına çatdırılmasının müxtəlif yolları var.

“Biz bu yaxınlarda etdiyimiz kimi, lazım duyulan məqamda ictimaiyyət üçün bir bəyanatla çıxış da edə bilərik. Lakin elə məqamlar da ola bilər ki, öz ismarıclarmızı daha özəl şəraitdə çatdırmağa üstünlük verək. Yekunda demək istərdim ki, ABŞ müstəqil, suveren və firəvan Azərbaycanın inkişafını dəstəkləyir. Bu baxımdan sözügedən dəyərlər çox vacibdir”, deyə Litsenberger bildirib. -03D06-