Arif Hacılı: “Əgər Müsavatı qeydiyyata almasalar, partiya mübarizəni davam etdirəcək”

 “Siyasi partiyalar haqqında” yeni qanuna uyğun olaraq Ədliyyə Nazirliyində başlayan yoxlama prosesi Müsavat Partiyasının məğlubiyyətilə başa çatarsa, Azərbaycanın qocaman siyasi partiyası Müsavat qanundankənar ola bilər. Ədliyyə Nazirliyində partiya üzvlərinin siyahısının təhlili bəyan edilmiş siyahının yoxlamanın nəticələrinə uyğun olmamasının göstərilməsilə başa çatıb.

"Siyasi partiyalar haqqında" qanuna görə, Azərbaycandakı siyasi partiyalar Ədliyyə Nazirliyində qeydiyyatdan keçməlidir. Qeydiyyat prosesi çərçivəsində partiya 5000 üzvünün adlarını, ünvanlarını və əlaqə məlumatlarını, habelə öz yerli partiya təşkilatları haqqında məlumati təqdim etməlidir.

Turan-ın “Müsavat Partiyası yoxlamanın nəticələrinin partiya siyahılarına uyğunsuzluğu barədə Ədliyyə Nazirliyinin məktubuna necə reaksiya verir?" sualına Arif Hacılı belə cavab verib:

- Dünən Müsavat Partiyası sədrinin müavini Razim Əmiraslanlı  Ədliyyə Nazirliyində məmurlarla görüşüb və guya partiya üzvlüyündən imtina etmiş vətəndaşlar, bizim siyahılarda barəsində məlumat olmayan partiya üzvləri haqda bilgiləri dəqiqləşdirib. Biz bu adamların adlarını götürdük və özümüz araşdırmaya başladıq.

- Sizin araşdırmanın ilkin yekunları necədir?

-  Partiyaya daxil olan məktubda Ədliyyə Nazirliyi bildirir ki, bizim siyahımızda 2766 partiya üzvünün barəsində məlumat düzgün deyil. Buna inanmırıq ki, belə ki,  2766 rəqəmi Azərbaycan Xalq Cəbhəsi Partiyasına irəli sürülən analoji rəqəmə uyğundur. Hesab edirik ki, bizim siyahının hər ikinci müsavatçıya uyğun olmaması barədə rəsmi məlumatlar real deyil.  Bir neçə yüz səhv ola bilər, amma təxminən üç min olmaz. Hesab edirik ki, səhvlər bizdə yox, Ədliyyə Nazirliyinin nəzarət sistemində buraxılıb.

Bizim siyahılarda 2 mindən çox  ad Müsavatın üzvü kimi təsdiqlənib. 250 nəfər telefonla deyib ki, onlar Müsavatın üzvü deyil. Biz 5212 partiya üzvünün siyahısını təqdim etdik. Bu, partiya üzvlərinin yalnız bir hissəsidir, sadəcə, qanun 5 min partiya üzvünün siyahısını tələb edir. Əslində, partiya üzvlərinin sayı daha çoxdur.

- Ədliyyə Nazirliyi partiya üzvlərinə zəng edir və onlardan partiya mənsubiyyətini soruşur. Bəz Ədliyyə Nazirliyini kim yoxlayır, bu təşkilatın bəyanatına inanmaq olarmı?

- Bizə deyirlər ki,  250 nəfər yoxlayanlara deyib ki, Müsavatın üzvü deyil. Ancaq partiyadan çıxma Ədliyyə Nazirliyindən zəng ilə baş vermir. Bu adamlar Müsavatın rayon şöbələrində prosedura uyğun olaraq partiyaya qəbul ediliblər, onlar qəbul üçün ərizə veriblər, sualları cavablandırıblar, qəbulla bağlı kollektiv qərar olub. Partiyadan  çıxma da prosedura uyğun olaraq, partiya üzvünün yazılı ərizəsilə və ya şəxsin ölümü ilə əlaqədar  həyata keçirilir. Yəni, bu adamların partiyada olmadığını telefon zəngləri əsasında söyləmək olmaz.

-  Haqlı olduğunuzu sübut etmək üçün məhkəməyə müraciət imkanlarını nəzərdən keçirirsinizmi?

- Hələlik Ədliyyə Nazirliyinə təqdim olunan siyahılarımızın yoxlanması və onlardakı texniki nöqsanların düzəldilməsi üzərində iş aparırıq. "Siyasi partiyalar haqqında" qanuna dəyişikliklər mürtəcedir, buna baxmayaraq, Ədliyyə Nazirliyinin bütün iradlarını yerinə yetirəcəyik. Əgər bundan sonra da nazirlik Müsavatı qeydiyyata almasa, o zaman məhkəməyə müraciət edəcəyik.

- Əgər partiyanı reyestrdə qeydiyyata almasalar,   Müsavatın qeyri-leqal fəaliyyəti mümkündürmü?

- Hakimiyyətin siyasəti çoxpartiyalı sistemin məhvinə yönəlib. Hər bir vətəndaş bilir ki, Müsavat tanınmalı olan iki partiyadan biridir. Müsavatdan imtina yolunu seçmək cəmiyyətdə yeni siyasi reallıq yaradacaq. Ancaq ümid edirəm və düşünürəm ki, partiyamız hətta mürtəcə qanunla belə qeydiyyata alınacaq.

Müsavat Partiyası sovet dönəmində 70 ilə yaxın qeyri-leqal fəaliyyət göstərib. Stalin rejimi Müsavatı tamamilə məhv edə bilmədi. Əlbəttə, hakimiyyət bizi tanımaqdan imtina edərsə, işə davam edəcəyik. Biz onsuz da yarı-leqal fəaliyyət göstəririk. Dövlət təşkilatlarında çalışan partiya üzvləri işlərini itirməmək üçün siyasi mənsubiyyətlərini gizlətmək məcburiyyətində qalırlar. Bəzi üzvlərimizin partiyalılığını gizlətməyə məcburuq. Ancaq indi dövran fərqlidir, dünya dəyişir və düşünürəm ki, indiki hakimiyyət Azərbaycan cəmiyyətinin çətin antidemokratik reallığını ağırlaşdıra bilməyəcək. Ümid edirəm ki, Müsavat Partiyası qeyri-leqal fəaliyyətə keçmək məcburiyyətində qalmayacaq.