Baxış: Əkbərov döyüş vəzifəsini yerinə yetirmədiyinə görə cəzalandırılıb

***

Sual: İlham bəy, Rövşən Əkbərovun həbsi ilə bağlı siz nə düşünürsünüz? Bu qətlin arxasında bilmədiyimiz hansısa siyasi səbəblər ola bilərmi?

Cavab:  Birinci onu deyək ki, Rövşən Əkbərovun həbsində sözün birbaşa mənasında “siyasi səbəb” yoxdur. Yəni, Rövşən Əkbərovun ya özünün, ya da yaxın ətrafının siyasi ambisiyası haqqında heç vaxt azacıq olsa da məlumatlar, söhbətlər dolaşmayıb. Siyasətlə məşğul olanlarla da hər hansı bağlılığı barədə cəmiyyətdə söz-söhbət belə yaranmayıb. Sualınızın birinci hissəsi barədə onu deyə bilərəm ki, 44 günlük müharibə zamanı və müharibədən sonra Rövşən Əkbərovun haqqında yalnız mənfi fikir formalaşırdı. Tutduğu vəzifəsi, rütbəsi, üstəlik Milli Qəhrəman statusu ilə müharibədə heç cür özünü göstərə bilməməsi bir təzad yaratdı və istər-istəməz hamıda sual yarandı ki, Rövşən Əkbərov niyə bu qədər passivlik nümayiş etdirib? Və görünür, bizə məlum olmayan digər konkret səbəblər də mövcuddur. Hər halda 2003-cü ildən Azərbaycana verilmiş cinayət işinin məhz müharibədən sonra yenidən aktiv istintaqa çevrilməsinin səbəbini müharibədə axtarmaq lazımdır.

Sual:  Birinci Qarabağ Müharibəsinin iştirakçısı, 4 saylı Bakı Ordu Korpusunun komandanı, 1994-cü    ilin yazında Tərtər yaxınlığında erməni ordusunun məğlub edilməsində mühüm rol oynamış 777-ci   motoatıcı alayın komandiri 55 yaşlı Rövşən Əkbərovun ötən il 44 günlük müharibədə iştirakdan kənarlaşdırıldığı barədə məlumatlar dolaşırdı. Eyni zamanda dekabrın 8-də Zəfər paradında iştirak edən generalların, mükafat alanların siyahısında onun adı yox idi. Bütün bunlar qəribə deyilmi?

Cavab:  Rövşən Əkbərov 44 günlük müharibənin əvvəlində  iştirakdan kənarlaşdırılıb. Bu müharibədə Rövşən Əkbərov özünü göstərə bilməyib,  hətta deyilənə görə, döyüş tapşırıqlarını yerinə yetirməyib. Biri var bacarmayasan, bir də var ki, ümumiyyətlə, gərgin, ağır döyüşlərdən imtina edəsən. Rövşən Əkbərovun haqqında məhz ikinci variant danışılır. Müharibə zamanı bir korpus komandiri kimi nə ilə, hansı şücaətilə yadda qaldı? Müharibənin ilk ongünlüyündə Müdafiə Nazirliyində əməliyyat müşavirəsi keçirən ali baş komandan bildirdi ki, bəzi əməliyyatlar ləngiyir və səbəbi də məlum deyil. Bu, Murov istiqamətində və Cənub bölgəsinin bir hissəsində əməliyyat tapşırığını yerinə yetirməyənlərə ünvanlanmışdı. Bu, məhz Rövşən Əkbərov və başqa bir generala ünvanlanmışdı, ona görə də müharibənin gedişində komandir kimi bəzi şəxslər döyüşlərdə iştirakdan təcrid edildilər. Müharibə bitəndən sonra da ordudan tərxis edildilər. Aşağı səviyyədə olan bəzi komandir zabitlər də elə müharibənin gedişində döyüş tapşırığını yerinə yetirməkdən imtina etdiklərinə görə həbs edilmişdilər. Belə komandirlər, generallar nədən Zəfər paradında iştirak etməli və ya mükafatlandırılmalıydı? Belələri qalib ordunun məglub parad generallarıdır.

Sual:  Qeyd etmək lazımdır ki, Rövşən Əkbərovun keçmiş Baş Qərargah rəisi Nəcməddin Sadıqovla yaxın dostluq münasibətlərinin olduğu deyilir.  44 günlük müharibənin ilk günlərində Nəcməddin Sadıqov Baş Qərargah rəisi vəzifəsindən kənarlaşdırılıb. Dekabrın 12-də isə Nəcməddin Sadıqovun bacısı oğlu, Azərbaycan Müdafiə Nazirliyinin Daxili Təhlükəsizlik Baş İdarəsinin rəisi, general-mayor Ramil Əsgərov tutduğu vəzifədən azad edilib. Yerli medianın yazdığına görə, 2020-ci ilin dekabrından Rövşən Əkbərov Kiyevə köçüb. Amma onun ehtiyata buraxılması haqqında əmri müdafiə naziri Zakir Həsənov 8 fevral 2021-ci ildə imzalayıb. Bütün bunlar Rövşən Əkbərovun məhz 20 il bundan əvvəl baş vermis qətllə bağlı həbs olunmasına dair şübhələr yaradır. Sizcə, bu, əvvəlcədən planlaşdırılmış oyun ola bilməzmi?

Cavab:   Qətiyyən oyun deyil. Təsəvvür edin, müharibənin ən gərgin dövründə ordu üçün ən vacib fiqur- Baş Qərargah rəisi vəzifəsindən kənarlaşdırılır. Deməli, o qədər ciddi əsaslar olub ki, N.Sadıqov vəzifəsindən kənarlaşdırılıb və həmin dövrdə bu, rəsmən elan olunmasa da artıq onun müharibənin gedişinə müdaxilə etmədiyi və edə bilmədiyi bütün ictimaiyyətə məlum oldu. Dediyiniz kimi, Rövşən Əkbərovunda Nəcməddin Sadıqovla yaxınlığı göstərir ki, bu zabitlər ciddi tapşırıqların yerinə yetirilməsində əngəl olublar, hətta mane olduqları barədə də o dövrdə müharibə iştirakçıları arasında söhbətlər gəzirdi. Nəcməddin Sadıqov və onun ətrafı haqqında, bacısı oğlu Ramil Əsgərov barədə müharibədən əvvəl də çox mənfi imic formalaşmışdı.  Rövşən Əkbərovun Kiyevdə biznesinin olması barədə məlumatlar hələ müharibədən xeyli əvvəl də mətbuatda yer almışdı. Kiyevdə Hərbi Akademiyada oxuduğu vaxtdan onun orada biznesinin olması və kriminal avtoritet tərəfindən idarə olunması da yayılan xəbərlər arasında idi.

Sual: Bu həbslərin ardı olacağı deyilir.  Burada bir çox general və keçmiş məmurun adı çəkilir. Bütün bunlar generalın həbsinin siyasi aspekti haqqında versiyanın inkişafına səbəb olur. Daha kimlər həbs oluna bilər?

Cavab:  Azərbaycanda ranqından asılı olmayaraq istənilən məmurun, generalın  həbs edilməsində problem yoxdur. Onların əməllərində cinayət tərkibi tapmaq hər zaman mümkündür. İndiyədək tutulan icra başçılarının, nazir müavinlərinin hansının həbsində siyasi aspekt versiyası olub? Bu həbslərdə siyasi çalar yalnız korrupsiya və rüşvətxorluqla mübarizə imitasiyası ola bilərdi. Tutulanların əməlində isə konkret cinayət var idi, siyasi  tərəflər olmamışdı. Rövşən Əkbərovun həbsində isə bir qədər fərqlilik var. 20 il əvvəl törətdiyi və indiyədək formal istintaqda saxlanılan konkret cinayətə start verilməsinin səbəbini müharibədə axtarmaq daha düzgün olardı. Cəzalandırılmalıdır! Bu qərar veriləndən sonra 20 il əvvəl törədilən cinayətin səbəb olması çox təbiidir. Perspektiv həbslər mümkündür, gözlənilir, amma kimlərin olması barədə heç nə deyə bilmərəm.

Sual: Əgər Rövşən Əkbərov vətənə xəyanət edibsə, onu niyə başqa adla həbs edirlər? Əgər xəyanət edibsə, bunu gizlətmək mümkündürmü? Və ya belə bir şey varsa, niyə bunu gizlətməyə cəhd edirlər?

Cavab:  Vətənə xəyanət ağır dövləti cinayətdir. Rövşən Əkbərov döyüş tapşırığını yerinə yetirməyibsə və ya səhlənkarlıq edibsə, bu, vətənə xəyanət kimi qiymətləndirilə bilməz. Rövşən Əkbərovun başqa bir dövlətin maraqları naminə döyüş tapşırığına əməl etməməsi inandırıcı deyil. İstənilən vaxt bu həbsin arxa planı deyil, hüquqi tərəfi artıq elan edilib. 2001-ci ildə törədilmiş cinayət. Onu da qeyd edək ki, Rövşən Əkbərovun həbsi ilə bağlı dediklərimiz müəyyən dərəcədə ehtimallardır və bu barədə  bilmədiklərimiz də var.