Elmira İsmayılova: «Xədicə kimi cəsur olun – azadlıq günəşi yaxındadır»

Həbsdə olan jurnalist Xədicə İsmayılovanın anası Elmira İsmayılova ağır açıq ürək əməliyyatından sonra “Amerikanın səsi”nə müsahibə verib. O 8 mart Beynəlxalq Qadınlar Günü münasibəti ilə dünyada azadlıqlar uğrunda mübariz qadınları, ilk növbədə isə Azərbaycan qadınlarını və Xədicəni təbrik edib.

Sual: İlk öncə Amnesty İnternational tərəfindən vicdan məhbusu kimi tanınan Xədicə İsmayılovanın anasının 8 mart Beynəlxalq Qadınlar Günü münasibəti ilə təbrikini dinləmək istərdik.

Cavab: Mən bütün xalqımı qadınlar günü münasibəti ilə təbrik etmək istəyirəm. Əsasən də o qadınları ki, hansı ki öz xalqına görə azad söz naminə vuruşurlar. Təkcə azad sözə görə yox, həm də bizim hökumətin inkişafına görə vuruşan qadınları mən ürəkdən təbrik etmək istəyirəm. Onlara cansağlığı və cəsur olmalarını arzu edirəm. Qadınlara sözüm budur ki, qorxmaq lazım deyil. Mən fəxr edirəm ki, mənim Xədicəm bu cür insandır. Baxmayaraq ki, o tutulub, azad deyil, evdə deyil, mən onunla fəxr edirəm. Bütün qadınlara, millətimə, xalqıma arzu edirəm ki, onlar da qorxmadan vuruşsunlar, xalqımızın azadlığı, ölkəmizin inkişafı uğrunda mübarizə aparsınlar və buna nail olsunlar. 

Sual: Xədicə İsmayılova dünyada azadlıqlar uğrunda mübarizə aparan ölkələrin simvolu kimi də səslənməkdədir. Dünyada azadlıqlar uğrunda həbslərə, təqiblərə məruz qalan qadınlara da müraciətiniz varmı?

Cavab: O qadınlar ki, öz xalqının azadlığını, inkişafını istəyir, mən o qadınların qarşısında baş əyirəm və onlara can sağlığı arzulayıram, onların hamısını təbrik edirəm. Onlara sözüm odur ki, qorxmasınlar, mübarizə aparsınlar, türmə o qədər də qorxulu bir şey deyil. Mübarizə aparan insanlar bilirlər ki, çətinliklər də olur. O çətinlikdən qorxmasınlar.

Sual: Xədicə İsmayılova həbsxana divarları arasında da azadlıqların genişləndirilməsi ilə bağlı yazılarla çıxış edir. O hətta həbsxana divarları arasında “Çakaranda ağacının uşaqları” əsərini Azərbaycan dilinə tərcümə edib. Sizin üçün azadlıq nə deməkdir? Azadlığın tərifini  necə verərdiniz?

Cavab: Mənim üçün azadlıq təkcə Xədicə üçün yox, uşağım üçün yox, azadlıq mənim üçün bütün xalqım, təkcə öz xalqım da yox, bütün dünya xalqlarının azad olması üçün ən dəyərli bir nemətdir. Bütün dünya azadlığa qovuşmalıdır, bütüm dünya inkişaf etməlidir ki, bir-biri ilə mehriban yaşasın.

Sual: Hazırda həbsxana divarları arasında olan qızınız Xədicəyə sözünüz?

Cavab: Mənim Xədicəyə sözüm - özü cəsurdur, baxmayaraq ki, qapalı yerdədir, ona baxmayaraq işini görür. Həm məktublar göndərir, həm siz bilən kimi kitabı da tərcümə edib. İndi yenə də tərcümə üçün kitab götürüb. İstəyir onu da tərcümə etsin. Xədicə öz işini görür. Mənim də ona sözüm, can sağlığıdır. Yəni mənim ona sözüm artıqdır, o hər şeyi gözəl bilir. Ona cansağlığı və möhkəm olmağı arzulayıram. Düzdür o hər dəfə görüşəndə, - “mama möhkəm ol” deyir. O hamını sakitləşdirir. Mənə də deyir ki, çöldə hamıya de ki, möhkəm olsunlar, mübarizəyə getsinlər, yəni dayanmasınlar.      -0-