Keçmiş deputatın sözlərinə görə, binaların üzlənməsinin qiyməti 10 dəfə şişirdilir

Parlamentin keçmiş deputatı, ekspert Nazim Məmmədov hesab edir ki, Bakıdakı çoxmərtəbıli binaların üzlənməsi 3-5 mln. manata başa gəlir. O,  “Amerikanın səsi” radiosuna müsahibəsində deyib ki, bu işlərin real xərci 1 kv. metrə görə 10-15 dollardır. Lakin sənədlərdə bu məbləğ 10 dəfə şişirdilir.

N.Məmmədov qeyd edib ki, üzlük küçə tərəfdən binaların fasadına vurulur, həyətdə isə binanın görünüşü  dəyişməz qalır. Bütün bunlar onu göstərir ki, bu sahədə korrupsiya çiçəklənir.

N.Məmmədov başqa bir problem kimi inhisarı və qeyri-sağlam rəqabəti göstərib. Onun sözlərinə görə,

2012-ci ildə Baku Steel Company  şirkətinin sahibi kimi qeyd olunan Rasim Məmmədov qoçu dəstələri vasitəsilə metallurgiya sahəsində 20- dən çox müəssisəyə basqın təşkil edib.

“Bizim həm vergi qanunvericiliyi, həm təhlükəsizlik baxımından, həm də müvafiq dövlət qurumlarından sertifikatlar alıb keyfiyyətli məhsullar buraxmağımıza baxmayaraq, bunlar bizi zorla bazardan çıxarıblar. Biz bu insanları məsuliyyətə cəlb etmək imkanından məhrumuq”, - o vurğulayıb.

Ekspert dövlət məmurlarının gəlir bəyannamələrini verməsinin vacibliyini qeyd edib. O ümid edir ki, ölkə prezidentinin son çıxışından sonra məmurlar öz gəlirlərini açıqlayacaqlar.

Şıx çimərliyi ərazisində qanunsuz villalara toxunan ekspert  qiyməti 5-10 milyon arası olan 42 villanın söküləcəyi barədə paytaxt merinin sözlərini xatırladıb. Bu, təqribən  210-420 milyon manatın dövriyyədən çıxmasıdır.

“Bütün bunlar sıravı vətəndaşların yox, məmurların pullarıdır. Söhbət dövlət vəzifələrindən sui- istifadə edən, ölkə prezidentinin etimadından öz məqsədləri üçün istifadə edənlər, öz qohum əqrabalarına iş yerləri açan, dövlət vəasitlərini mənimsəyən məmurlardan gedir”, - N.Məmmədov bildirib.-16/03D-