Luka Volontenin vəkilləri Bakıdan maliyyələşdirilir - Azərbaycanın AŞ-da keçmiş səfiri

Bakı/05.02.20/Turan: Ötən il 70 illiyini qeyd edən Avropa Şurası bu gün ciddi problemlərlə üzləşir. Xüsusən, korrupsiya qalmaqalları, "kürü diplomatiyası" təşkilatın imicinə zərbə vurub.

Bu fikri "Amerikanın Səsi"nin Azərbaycan xidmətinə Azərbaycanın Avropa Şurasındakı nümayəndəliyinin keçmiş rəhbəri, hazırda Avropada siyasi mühacirətdə olan səfir Arif Məmmədov bildirib.

"Bu problemlərin aradan qaldırıldığını deyə bilmərəm. Bir sıra məsələlərdə hələ də yaxşıya doğru ciddi dəyişiklik yoxdur. Doğrudur, bəzi korrupsionerlər milli nümayəndə heyətlərindən çıxarılıblar. Amma katiblikdə də, bir sıra nümayəndə heyətlərində də hələ də korrupsiyada əli olan şəxslər qalmaqdadır", deyə Məmmədov bildirib.

O, özü AŞPA-da assambleyada korrupsiya faktlarının araşdırılması üçün yaradılmış Müstəqil İstintaq Qrupuna ifadə verib. Məmmədov nümayəndə heyətlərinin tərkibinə nəzarət mexanizminin yaradılmasını zəruri hesab edir. Onlarda həm hakimiyyətin, həm də müxalifətin nümayəndələri iştirak etməlidir. Amma Azərbaycan nümayəndə heyətinə real müxalifət olmadığına görə yalnız hakimiyyət nümayəndələri daxil edilib, deyə o bildirib.

AŞPA-da gələcəkdə korrupsiyanın qarşısının alınması üçün hansı mexanizmlərin hazırlandığı haqqında suala cavabda Məmmədov qeyd edib ki, görülmüş tədbirlər kifayət etmir. Bir sıra deputatların Avropa Şurasının binasına girişi qadağan edilib. Amma bəziləri bu gün də öz parlamentlərində təmsil olunurlar. Bəziləri ümumiyyətlə araşdırmadan qaçıb. Qalmaqalın ən məşhur fiqurantı İtaliyalı deputat Luka Volonte olub. Azərbaycan hökumətinin onun hesabına pul köçürdüyü sübuta yetirilib. "Mən İtaliya məhkəməsində onun işi üzrə prosesdə iştirak etmişəm. Onu müdafiə edən vəkilləri indiyə qədər Azərbaycan tərəfi maliyyələşdirir. Zalda İtaliya polisinin nümayəndələri mənə dedilər, Volonteni ən yaxşı vəkillər müdafiə edir. Biz bilirik ki, onları Azərbaycan tərəfi maliyyələşdirir. Bu arada Volonteyə heç bir məhdudiyyət qoyulmayıb. O, həbs edilməyib, barəsində hem bir məhdudiyyət yoxdur. Yalnız 3-5 ayda bir onu məhkəməyə çağırırlar, bəzi suallar verirlər. Bununla da hər şey bitir. Təəssüf ki, Avropa öz dəyərlərindən xeyli uzaqlaşıb və bu, həqiqətdir", deyə Məmmədov qeyd edib.

2016-cı ilin dekabrında European Stability Initiative (ESI) qeyri-hökumət təşkilatı Azərbaycan siyasətçilərinin rəsmi Bakıya sərf edən qərarların qəbul edilməsi üçün AŞPA deputatlarını şirnikləndirməsi təcrübəsi haqqında "Kürü diplomatiyası - 2" araşdırmasını dərc edib. Bu məruzəyə əsasən, Avropa Xalq Partiyasının Avropa Şurası Parlament Assambleyasındakı fraksiyasının rəhbəri Lula Volonte təmənnalı olaraq Azərbaycan hakimiyyətinin maraqlarını müdafiə edən bir çox Avropa siyasətçilərinin adlarını çəkib. O, dindirilərkən təsdiq edib ki, onun hesabına Azərbaycandan pul daxil olub, ESI-nin fikrincə, bu pul İtaliya və digər Avropa ölkələrinin deputatlarının cəlb edilməsinə xərclənib. Bu deputatlar AŞPA-nın Azərbaycanda insan hüquqlarının pozulmasını pisləyən qətnamə və məruzələrinin əleyhinə səs veriblər, deyə ESI bildirib. Volonte hələ də istintaq altındadır.

Avropa Şurasının missiyasını başa vurduğu, məhz bu səbəbdən Rusiya üzvlük haqqını ödəməyi dayandırdıqda qabaqcıl AŞ dövlətlərinin təşkilatı maliyyələşdirməməsi, sonradan isə AŞPA-ya qayıtması barədə siyasətçilər və ekspertlər arasında yayılan fikri şərh etmək xahişinə cavabda Məmmədov deyib: "Avropa Şurasının onsuz da təsir mexanizmləri yoxdur. Yəni Rusiya da, Azərbaycan da Aİ üzvü deyil. Bu ölkələrə yeganə təsir mexanizmi AŞPA-dır. Buna görə ən demokratik dövlətlər RF-nin, Azərbaycanın, digər qeyri-demokratik və ya avtoritar dövlətlərin təşkilatda qalmasında maraqlıdırlar. Bu, onlara və bu ölkələrdə gedən proseslərə hansısa təsiri göstərmək imkanı verir. Təzyiq, demək olar ki, işləmir, baxmayaraq ki, monitorinqlər aparılır. Bundan başqa, Azərbaycan vətəndaşlarının Avropa Məhkəməsinə müraciət etmək imkanı olması vacib məsələdir. Buna görə bu suala birmənalı cavab vermək olmaz".

Siyasi mühacirətdə olan tənqidçilərin təqibi mövzusuna toxunan Məmmədov deyib ki, o, Aİ hüdudlarından kənara çıxmaqdan çəkinir. Türkiyə, RF, Ukraynaya, yaxın zamandan etibarən isə Gürcüstana da səfərlər təhlükəsiz deyil. Bu yaxınlarda hətta Norveçdən sığınacaq almış Azərbaycan fəalı Polşada saxlanılıb. Onun fikrincə, Azərbaycan hakimiyyəti İnterpoldan xaricdəki tənqidçilərini təqib etmək üçün istifadə edir.

"Əlbəttə, biz ehtiyat tədbirlərinə riayət etməliyik, amma mübarizə davam edir və biz ondan imtina etmək niyyətində deyilik", deyə Məmmədov qeyd edib.

Avropada siyasi mühacirlərin etiraz aksiyalarına gəlincə, Məmmədov təəssüflə qeyd edib ki, onlar Avropanın ictimai rəyinə təsir etmirlər.

"Mitinq və aksiya keçirmək üçün güc və zaman sərf edən həmvətənlərimizin səylərini yüksək qiymətləndirirəm. Amma bu tədbirlər Avropa ictimaiyyətinin, qurumlarının diqqətini cəlb etmir. Bu, daha çox Azərbaycan auditoriyası üçün Avropada mühacirlərin Azərbaycanda ədalət uğrunda mübarizə aparanların hüquqları uğrunda mübarizə apardıqları barədə mesajdır", deyə Məmmədov qeyd edib. -1606D-