Millət vəkilliyinə namizəd, tanınmış jurnalist: “Seçiləndən sonra Türk dünyasının bütün bölgələri üçün azadlıq istəyəcəyik”

İYİ Partiya siyahısının Tekirdağ bölgəsindən millət vəkilliyinə namizədlər siyahısında birinci sırada olan  “Yeni Çağ” qəzetinin tanınmış köşə yazarı Selcan Taşçı Hamşioğlu Turan agentliyinin suallarını cavablandırdı.

Turan:Namizədliyinizi özünüz irəli sürdünüz, yoxsa İYİ Partiyadan təklif gəldi?

Taşçı Hamşioğlu: Özüm namizəd olmaq istəyirdim. Müraciət edəndən sonra nə partiyanın sədrindən,  nə də funksionerlərindən  namizədliyimin təsdiqlənməsi üçün heç bir  xahişim olmadı. Tekirdağ vilayətində  İYİ Partiya siyahısının birinci sırasında olduğuma görə partiyanın  sədri hörmətli Meral Akşenerə təşəkkür edirəm.

Turan: Namizədliyinizin Tekirdağ vilayətindən irəli sürülməsində orada doğulub-böyüməyinizin rolu, şübhəsiz ki, var. Seçki təbliğatı dönəmində bu faktor sizə nə dərəcədə kömək edəcək?

Taşçı Hamşioğlu: Ömrümün ilk 20 ili Tekirdağda keçib. Ali təhsilimi başa vurandan sonra İstanbula gəlib “Yeni Çağ” qəzetində işə girdim, o vaxtdan bəri yeganə iş yerim bura olub. Tekirdağda anam, bacı-qardaşlarım var. Bayram günlərimi, məzuniyyətimi Tekirdağda keçirirəm. Özümü daim Tekirdağa aid bir insan hiss edirəm. Əlbəttə, bunları deyərək qətiyyən seçicilərin boynuna minnət qoymuram. Seçki yarışında mən də vətəndaşların qabağına partiyamızın təmsil edildiyi Millət İttifaqının seçki bəyannaməsi və öhdəsindən gələ biləcəyim konkret vədlərlə çıxacağam. Partiyamızın Tekirdağ vilayət təşkilatı deputatlığa birinci sıradan namizəd göstərilməyimi müsbət qarşıladığına görə məni ürəkdən dəstəkləyəcəklərinə şübhə etmirəm.

Turan: Partiyaların deputatlığa namizədlər siyahısı Türkiyədə həyəcan yaratdımı?

Taşçı Hamşioğlu: Öz partiyamızın siyahısı barədə bunu deyə bilərəm ki, qadın namizədlərin çoxluğu hamını həyəcanlandırdı. İYİ Partiya 9 vilayətdə birinci sıradan qadınları namizəd göstərib. 10 vilayətin namizədlər siyahısının ikinci sırasında yenə İYİ Partiyanın qadın namizədləri var. O biri partiyaların heç birində belə bir göstərici yoxdur. Bu faktın özü Türkiyədə həyəcan  yaratmaq üçün kifayət etməlidir. Çünki hazırda ölkəmizdə ən çox mübahisəyə səbəb olan problemlərdən biri qadınların haqlarının tapdalanması, günahsız qadınların öldürülməsi və qatillərin çox vaxt cəzasız qalmasıdır. Ona görə öz haqlarını axtaran qadınların bizim namizədlərimizə səs verəcəklərinə inanıram. Qadınların yaşadığı problemlərə partiyaların göstərdikləri münasibət ölkəmizdəki qütbləşmənin əsas faktorlarından biridir. Biz bunu aradan qaldırmaq üçün mübarizəmizi davam etdirəcəyik. 30 yaşdan aşağı 6 namizədimiz var, bu durum  da  məni həyəcanlandırır.

Turan: Türkiyədəki qütbləşməyə diqqəti cəlb etdiniz. Bunu edənlər eyni zamanda azadlıqları məhdudlaşdırırlar. Azadlığını getdikcə itirən insanların haqlarını hansı formalarda müdafiə edəcəksiniz?

Taşçı Hamşioğlu: Tariximizdəki azadlıq uğrunda mübarizənin şanlı səhifələrindən birinin şüarı: “Qəhr olsun istibdad, yaşasın hürriyyət”dir. Təəssüf ki, ölkəmizin gəldiyi mərhələdə bu şüara çox ehtiyacımız var. Bu sahədəki mübarizəmizin Türk dünyasını da həyəcanlandıracağını düşünürəm. Çünki sizlərin də azadlıq, hürriyyət həsrətində olduğunuzu bilirəm. Biz Türk dünyasının hamısında azadlıq istəyən bir siyasi qurumuq. 20 illik təkpartiyalı iqtidarın Türkiyəni gətirdiyi nöqtə “Azad əsirlər” nöqtəsidir. Bizim rəqibimiz olan siyasi düşüncə 80 illik cümhuriyyəti “mötərizə” kimi dəyərləndirir, o mötərizəni bağlamaqdan dəm vurur. Biz isə o mötərizənin bağlanmasına icazə verməyəcəyik.

Turan: Yəni,cümhuriyyətin 100-cü ilində əldən getmiş bir cümhuriyyəti yenidən geri almağın mübarizəsini aparırsınız, aparacaqsınız. Səhv anlamadım ki?

Taşçı Hamşioğlu: Biz müstəqilliyini öz vətəndaşlarının gücüylə qazanıb inqilablar etmiş bir ölkədən danışırıq.1950-ci ildə-soyuq müharibə təzəcə başlayanda biz çoxpartiyalı sistemə keçərək demokratiya inqilabı etmiş bir millətik. İndi o dövləti tək partiyanın dövlətinə çevirməyə çalışırlar. Buna icazə verməmək üçün mübarizə aparırıq, aparacağıq. Türk milliyyətçiliyinin təməlini Azərbaycandan, Kazandan, Krımdan gəlmiş ziyalılar atıb. Rumelindən gələn miqrantlar isə bu ideologiyanı dövlətləşdiriblər. Biz bu təməlin sarsılmasına heç vaxt icazə verməməliyik, verməyəcəyik.

Turan:Təbliğat mexanizminizi  hansı prinsiplər üzərində quracaqsınız?

Taşçı Hamşioğlu: Bilirsiniz ki,seçki təbliğatının dili və üslubu gündəlik üslubdan fərqli olmalıdır. Mən seçicilərlə birbaşa dialoq qurmağın tərəfdarıyam və əvvəldən axıra bu prinsipimə sadiq qalacağam. Digər partiyalardan olan namizədlərlə vədlərimiz bir-birinə bənzəyə bilər, ancaq insanlarla dialoqun həlledici  rolu var. Bölgənin övladı olmağımla yanaşı, jurnalist-yazar kimi Türkiyədə tanınmağımın da təbliğat prosesində köməyimə çatacağına inanıram. Buna əminəm ki, Tekirdağ vilayətində millət vəkili seçiləcək yeganə qadın namizəd mənəm.