RF Ermənistanda sabitliyin pozulmasında birbaşa iştirak edir – Georgi Vanyan

- Necə düşünürsünüz, baş nazir N.Paşinyanın 10% barədə sözləri qəsdən, Rusiyanı sancmaq üçün deyilib, yoxsa o səhv edib, təcrübəsizlik nümayiş etdirib və bunu təsadüfən ağzından çıxarıb? Kreml Ermənistanda qanuna və Konstitusiyaya riayət olunması zərurəti haqqında bəyanat verib. Necə düşünürsünüz, indi Putin əslində kimin tərəfindədir: Nikolun, ya baş nazirə qarşı çıxan hərbiçilərə?

- Nikol Paşinyan Ermənistanın postsovet siyasi elitasının məhsuludur. O, öz karyerasını üç Ermənistan prezidentinin yaratdığı sistemdə qurub. Əsas müxalif qəzetlərdən birinin redaktoru vəzifəsi onun bazar qaydalarını, qarayaxma qaydalarını, sözün və faktın gücünü dəyərsizləşdirmək qaydalarını mənimsəməsinə imkan verib. Baş nazir olduqdan sonra onun peşəkar özünə güvəni fəlakətlə nəticələnən səhvlərə gətirib çıxarıb.

Azərbaycan ərazisində “İsgəndər”dən istifadə olunması haqqında məlumat müharibə zamanı aşağı səviyyəli Rusiya ekspertləri tərəfindən ortaya atılıb. Güman edirəm ki, bu silah növünün adının çəkilməsi təsadüfi olub, ağızdan qaçıb. Paşinyan özünün qarayaxma, mobbinq, böhtan obyektinə çevrilməsi fikri ilə barışa bilmir. O, populizm mövqeyində qalmaqdadır. Bəlkə də ona görə ki, başqa çıxış yolu görmür.

Mən, islahedilməz romantik olaraq, hətta onun Rusiyada istehsal edilmiş silahın keyfiyyətsizliyinə istinad etməsinin Azərbaycan ərazisində dinc əhali arasında qurbanlara şüuraltı bəraət qazandırmaq cəhdi olduğunu ehtimal etməyə cürət edərəm. Axı Nikol Paşinyanın şəxsən bombalama əmri verdiyi haqqında da məlumatlar yayılıb.

Müharibə zamanı da, ondan sonra da bütün hərbi əməliyyatlar tarixi yalana bürünür. Ermənistanın informasiya məkanı ölkənin təhlükəsizliyi və öz təhlükəsizlikləri məsələsindən baş aça bilməyən vətəndaşlara qarşı terror silahına çevrilib.

Hazırda Azərbaycan və Türkiyə düşmən dövlətlər statusunu qoruyub saxlayır, hərbi vəziyyət ləğv edilməyib. Obyektiv müharibə mənzərəsinin və obyektiv müharibəsonrası proseslər mənzərəsinin bərpa edilməsi gələcəyə təxirə salınır.

Bu gün Paşinyan vətəndaşların təhlükəsizliyinin zəmanəti deyil, əksinə, vətəndaşlar Paşinyanı qoruyur, öz seçim hüquqlarını qoruyur və bunu mitinqlərdə iştirakdan daha çox müxalif qüvvələrə qoşulmamaqla edirlər. Paşinyan hələlik şantaja tabe olur və “satqın ovuna” aludə olub, amma bu, uzun müddət davam edə bilməz. İnsanlar təhlükəsizlikləri təhdid altında olan bir şəraitdə yaşamaqdan yorulublar, hakimiyyətsizlikdən yorulublar.

- Yerevanda baş verən hadisələr separatçı rejimin başçısı Araik Arutyunyana necə təsir edəcək?

-   Araik Arutyunyanin sozçüsü dünən (24 fevral – Turan) geniş bəyanat verib, onun son abzasında qan axıdılması mümkünlüyü haqqında xəbərdarlıq (təhdid) var. Şəxsən mən hesab edirəm ki, vətəndaş müharibəsi təhlükəsindən danışan hər kəs keçmiş hakimiyyət klanına, Robert Koçaryanın hakimiyyətə qayıtması ideyasına qoşulur. Araik Arutyunyan haqqında danışa bilmərəm, çünki hazırda onun hansı hakimiyyətə malik olduğunu və üzərinə məhz hansı öndəliklərin qoyulduğunu başa düşmürəm. Və ümumiyyətlə, 9 noyabr tarixli Bəyanatın yerinə yetirilməsi prosesində nə baş verir? Bu proses ümumiyyətlə gedirmi? Bütün tərəflər susur. Əvvəllər olduğu kimi, yenə vaxtaşırı fəaliyyəti təqlid edir, hər şeyi ədavət təbliğatının öhdəsinə buraxırlar.

- Kreml Ermənistanda qanuna və Konstitusiyaya riayət etmək zərurəti haqqında bəyanat verib. İndi prezident V.Putin əslində kimin tərəfindədir: Nikol Paşinyanın, ya baş nazirə qarşı çıxan hərbiçilərə Rusiyanın müdafiə naziri S.Şoyqu rəhbərlik edir?

- Ermənistan prezidenti 3 gün ərzində Baş Qərargah rəisinin vəzifədən azad edilməsi barədə əmri imzalayıb-imzalamayacağına qərar verməlidir. Vəziyyət özü konstitusiyaya ziddir. Baş Qərargah rəisi hərbi çevriliş barədə ərizə verib və təqdir gözləyir. Ermənistanda hakimiyyətin ələ keçirilməsinin belə bir modelini irəli sürməyə çalışırlar.

RF bildirir ki, bizim işlərimizə qarışmayacaq. Və bu, doğrudur. Putin niyə qarışsın? Prinsipcə, hazırki mərhələdə Ermənistana kimin rəhbərlik edəcəyinin onun üçün fərqi yoxdur. Baxmayaraq ki, müttəfiqlik öhdəliklərinə əsasən, Nikol Paşinyan ölkədə daxili sabitliyə dəstək xahişi ilə müraciət edərsə, Rusiya ona kömək etməlidir.

RF öz təbliğatçı vətəndaşlarının şəxsində və zənnimcə, maliyyə axınları ilə Ermənistanda sabitliyin pozulmasında birbaşa iştirak edir. Amma, bir daha təkrar edirəm, Putinin üstün tutduğu tərəf yoxdur, ola da biməz. Putin üçün fərqi yoxdur, müharibə - Ermənistanda vətəndaş müharibəsi, Ermənistan və Azərbaycan arasında müharibə, Qarabağda müharibə olacaq, ya yox. O, yalnız Ermənistanı qeyd-şərtsiz işğal etmək imkanı yarandıqda hərəkətə keçəcək və onda ermənilər üçün öz əlaltısını tapacaq.