Roland Kobiadan açıqlama: fikirlərimi təhrif ediblər

Səfir Roland Kobia cümə günü BBC Azərbaycanca və Azadlıq qəzeti ilə söhbətində bildirib ki, o, bir beynəlxalq konfrans zamanı qeyri-rəsmi olaraq jurnalistlərin “gələn ilki seçkilər barədə” suallarını cavablayıb.

Kobia, ona verilən ikinci yardımçı sualın “İlham Əliyevin seçkilərdə şansı” barədə olduğunu qeyd edib.“Mən dedim ki, Aİ siyasi pluralism istəyir, Aİ seçkilər üçün şəffaf şərait istəyir, Aİ daha çox namizədin iştirakını istəyir, amma seçkilərdən danışmaq hələ ki tezdir”.

“Dedim ki, o tanınır, bu faktdır, Azərbaycanda keçirilən sorğuların nəticələrinə əsaslanmışam, dedim ki, o bir çox sahələrdə yaxşı işlər görüb, bu baxımdan onun şansları çoxdur”, deyən Kobia, bu sorğuların Azadlıq Radiosu, Regnum İA və Caspian Sorğu Mərkəzi tərəfindən keçirildiyini və onların hamısında təxminən 90 faizdən çox cavabın İlham Əliyevin lehinə olduğunu bildirib.

APA agentliyindəki xəbərin müəllifi Şamil Əlibəyli BBC Azərbaycancaya bildirib ki, yazıda səfirin dediklərinin məğzini əks etdirib: "Təhrif varsa, niyə bizə xəbərdarlıq edilməyib", Əlibəyli sual edib.

Ən güclü namizəd

Dekabrın 5-də yerli agentliklərdə çap edilən informasiyada deyilir ki, səfir Roland Kobia seçkiqabağı vəziyyətdən danışmağın hələ tez olduğunu desə də, seçkilərdə “ən güclü” namizədin qalib gələcəyini bildirib.

“Avropa Birliyi olaraq biz təbii ki, siyasi plüralizmin, demokratiyanın olmasını, islahatların aparılmasını, namizədlərin sayının çox olmasını istəyirik. Seçkilərdə ən güclü namizəd qalib gələcək. Amma düşünürük ki, İlham Əliyevin bu seçkilərdə qalib gəlməyə daha çox şansı var, çünki o xalq arasında tanınır. Bununla belə gözləyirik ki, seçkilərdə namizədlərin sayı çox olsun və insanlara öz namizədliyini irəli sürmək üçün imkanlar yaradılsın”, APA İA yazıb.

Aİ Bakı Ofisi həmin gün Roland Kobianın bu sözləri dediyini BBC Azərbaycancaya təsdiqləyib.

Səfir bildirib ki, Aİ hər zaman Azərbaycanda demokratiya və insan hüquqları sahələrində daha çox iş görülə biləcəyini bəyan edib.

Səfirin fikirləri sosial şəbəkələr, media və ictimaiyyətdə müxtəlif cür anlaşılıb.

Müxalifətçilər “özü namizədliyini irəli sürməmiş birinin adının seçkilərdən aylar əvvəl çəkilməsində” məna axtarıb.

Namizəd

“Bu, sanki arxanda durmuşuq, namizədliyini ver deməkdir”, Musavat partiyası başqan müavini Gülağa Aslanlı şəxsi fikirlərini BBC Azərbaycanca ilə bölüşür.

Onun sözlərinə görə, Azərbaycanda keçirilən seçkilərdə müxalifətə heç vaxt eyni hüquqlu rəqabət şəraiti tanınmır. Məhz bu səbəbdən, Aslanlı beynəlxalq təşkilatların bu cür bəyanatlarını "beynəlxalq prinsiplərə zidd" sayır.

“Avropa ölkələrində bir nəfərin iki müddətdən artıq prezident seçilməsi məsələsi pislənən zaman, beynəlxalq diplomatın, Aİ-ə daxil olmaq üçün təşəbbüslər göstərməyən və Şərq Tərəfdaşlığı layihəsində normalara xidmət etməyən birisinin adını çəkməsi o təşkilatın mandatına uyğun deyil”, - Müsavat Partiyası rəsmisi deyib.

Aslanlı, həm də Avropa İttifaqının mərkəzi ofisinin bu məsələni şərh etməsini istəyib.

Sosial media

Facebook-da səfirin sözlərindən sonra Aİ-nin Azərbaycandakı nüfuzunun “dağıldığını” yazan hüquqşünas Erkin Qədirli bildirib: “Aİ bunu ciddi hesab etməli və Roland Kobianın geri çağrılması kimi həlledici addımlar atmalıdır. Aİ həmçinin, İttifaqın Azərbaycanda potensial namizədlərə fərq qoymaması və İttifaqın hakim ailə ilə deyil, Respublika ilə əməkdaşlıq etməsi” barədə təkzibedici bəyanat verməlidir”.

Qədirlinin fikirləri ilə razılaşan Emin Milli isə Prezident Əliyevi təbrik edib: “Aİ seçkilərdən bir il əvvəl Əliyevin namizədliyini dəstəkləyir, Təbriklər, cənab Prezident!”

2013-cü ilin oktyabrında Azərbaycanda prezident seçkiləri keçiriləcək. Prezident İlham Əliyev 2003-cü ildən bəri iki dəfə seçkilərdə qalib gəlib.

Onun üçüncü müddətə prezidentliyini irəli sürəcəyinə dair rəsmi məlumat açıqlanmayıb.

Ancaq Prezident Administrasiyasının rəhbəri Ramiz Mehdiyev Yeni Azərbaycan Partiyasının irəli sürəcəyi namizədlə bağlı sualı cavablandıraraq deyib ki, seçiləcək namizəd "məlumdur".

"Azərbaycan Prezidentinin böyük planları var və bu işlər 2020-ci ilə qədər davam edəcək”, Mehdiyev bazar ertəsi Bakıda jurnalistlərə belə deyib.

Onun bu sözləri Azərbaycan mətbuatında İlham Əliyevin 2013-cü ildə namizədliyini irəli sürəcəyinin təsdiqi kimi izah olunub.

Qaz və şou

Britaniyada fəaliyyət göstərən Azərbaycan Demokratik Assosiasiyasının rəhbəri Murad Həsənli Avropa İttifaqının hər zaman Azərbaycanda "rejimə dəstək verdiyini" iddia edib.

"Təbii ki bu, Avropanın Azərbaycan enerjisinə böyük ehtiyacı ilə əlaqədardır - 1990-cı və 2000-ci illər ərzində Aİ regional enerji layihələrinin önündə olub" - o Roland Kobianın sözlərini BBC Azərbaycancaya şərh edərək deyir.

"Bu günün məsələsi qazdır və Qərb ümumi olaraq Bakıdan Avropaya gedən qaz kəmərləri haqqında siyasət və maliyyə qərarlarının veriləcəyi müddətdə sabitliyi qorumaq istəyir" - Həsənli belə hesab edir.

Onun fikrincə, amerikalılar və avropalılar üçün İlham Əliyevin üçüncü müddət və daha sonra prezident qalması zəruridir.

"Lakin Avropa həmçinin bunu legitimləşdirməlidir, demokratik, plüralist kimi görünən bir proses zəruridir. Buna görə Qərb müxalifətin seçkilərdə iştirak etməsini istəyir. Onlara bir şou lazımdır" - o deyib və 2013-cü il prezident seçkilərinin boykot olunmasının tərəfdarı olduğunu bildirib.

Azərbaycan rəsmilərinin Kobianın sözlərinə münasibəti hələlik məlum deyil.