Polis AXCP tərəfdarlarını məhkəmənin qarşısından dağıdıb

Bakı/07.01.19/Turan: Bu gün Bakı Ağır Cinayətlər Məhkəməsində AXCP-nin "Qanunsuz maliyyələşdirilməsi haqqında" cinayət işi üzrə hazırlıq iclası başlayıb.

Məhkəmənin qarşısında 100-ə yaxın insan - təqsirləndirilən şəxslərin tərəfdarları yığışıb. Amma zala cəmi bir neçə nəfər, o cümlədən AXCP lideri Əli Kərimli buraxılıb.

Müstəqil mətbuat nümayəndələri də prosesə buraxılmayıb. Müxalifətin qalan tərəfdarları məhkəmə binasının qarşısında qalıb. Amma yığışanlar sakitcə dayanmalarına baxmayaraq, gücləndirilmiş polis dəstələri onları dağıdıb. Bu zaman beş nəfər, o cümlədən Demokratik Qüvvələrin Milli Şurasının üzvü Vahid Məhərrəmli, AXCP-nin iqtisadi komissiyasının sədri Nemət Əliyev, partiya fəalı Kənan Basqal və daha iki fəal saxlanılıb.

Xatırladaq, üç AXCP fəalı - partiyanın rəyasət heyətinin üzvü Aqil Məhərrəmli, Nərimanov rayon təşkilatının rəhbəri Babək Həsənov, gənclər komitəsinin fəalı Ruslan Nəsirli, habelə Gədəbəy rayon icra hakimiyyətinin keçmiş başçısı Saleh Rüstəmov və onun qardaşı oğlu Vidadi Rüstəmli məhkəmə qarşısına çıxarılıb.

2018-ci il mayın 26-da ölkənin Baş Prokurorluğu onların AXCP-nin "qanunsuz maliyyələşdirilməsi" ittihamı ilə həbs edildiyini bildirib. Onlar qanunsuz sahibkarlıqda, cinayət yolu ilə əldə edilmiş pulların yuyulmasında və s. ittiham olunublar.

AXCP qanunsuz maliyyə vəsaiti almaq ittihamlarını təkzib edib. Həbs edilənlər hamısı hüquq müdafiəçiləri tərəfindən siyasi məhbus kimi tanınıblar. -21C-