Hökumət növbəti neft müqaviləsini təsdiq edib

Nazirlər Kabinetinin № 173 qərarı ilə SOCAR və Zenith Aran Oil Company Limited arasında “Muradxanlı”, “Cəfərli” və “Zərdab” neft yataqlarının daxil olduğu blokun bərpası, kəşfiyyatı, işlənməsi və hasilatın pay bölgüsü haqqında sazişi təsdiq edib. Saziş bu ilin martında imzalanmışdı.

Sazişdə “Zenith” şirkəti 80 faizlik, SOCAR-a məxsus Ortaq Neft Şirkəti isə 20 faizlik iştirak payına malikdir. Saziş 25 il müddətində qüvvədə olacaq.

Ümumi sahəsi 642,4 kvadrat kilometr ərazini əhatə edən “Muradxanlı”, “Cəfərli” və “Zərdab” yataqlarında sutkalıq hasilat təqribən 350 barel xam neft təşkil edir. Yataqlardan həmçinin, az həcmdə təbii qaz da hasil olunur ki, bu da sahənin öz təsərrüfat-istehsalat fəaliyyətində istifadə edilir.

Blokun qalan ehtiyatı 1,8 mln ton neft və 36 mln kubmetr qaz olarq qiymətləndirilir. Hazırda yataqda 77 quyu istismar edilir.

Yataqda hasil edilən kiçik həcmdə qazdan təsərrüfat-istehsal üçün istifadə edilir.

“Muradxanlı”, “Cəfərli” və “Zərdab” neft yataqları Yevlax-Ağcabədi-İmişli ərazisindədir. “Muradxanlı” 1971-ci, “Cəfərli” 1984-cü, “Zərdab” yatağı 1981-ci ildə kəşf edilib. –12--