Xəzər Dəniz Gəmiçiliyi kredit reytinqi alacaq

"Azərbaycan Xəzər Dəniz Gəmiçiliyi" QSC “Fitch Rating” agentliyindən kredit reytinqi almaq istəyir, deyə AXDG inzibati işlər və ictimaiyyətlə əlaqələr departamentində Turan-a bildiriblər.

Kredit reytinqinin verilməsi haqqında müqavilə 2015-ci ildə imzalanıb və yaxın vaxtlarda verilməsi gözlənilir. Agentliyin mütəxəssisləri AXDG-nin təsərrüfat-maliyyə fəaliyyətini öyrənməkdə davam edir.

Strateji inkişaf istiqamətlərinin müəyyən edilməsi üçün paralel şəkildə 2016-2020-ci illərdə Azərbaycan Respublikasında gəmiçiliyin inkişafına dair Dövlət Proqramının hazırlanıb. Sənəd hökumətlə razılaşdırma mərhələsindədir.

AXDG-də Turan-a deyiblər ki, 2015-ci il mənfəətli olub. Hazırda “Ernst & Young” şirkəti maliyyə hesabatlarının auditini həyata keçirir.

"Azərbaycan Xəzər Dəniz Gəmiçiliyi" QSC-də 9 min nəfər çalışır. 2015-ci ildə orta aylıq əmək haqqı 2014-cü ilə nisbətən 15% artaraq 749 manat, üzücü heyət üzrə isə 835 manat təşkil edib.

  AXDG-nin sərəncamında 290 gəmi və başqa üzən qurğu var. Bunun 90-ı tanker (33), quru yük gəmisi (20), bərə (13) və s-dir. Yaxın vaxtlarda Qara və Aralıq dənizlərdə üzən gəmilərin sayı 5-dən 11-ə artırılacaq. 08B