Milli Şuranın və Müsavat Partiyasının üzvləri Məhəmməd Əmin Rəsulzadənin abidəsini ziyarət ediblər

Bakı/28.05.20/Turan: Mayın 28-də Demokratik Qüvvələrin Milli Şurasının üzvləri Novxanı qəsəbəsində Azərbaycan Xalq Cümhuriyyətinin (1918-1920-ci illər) banisi Məhəmməd Əmin Rəsulzadənin abidəsini ziyarət ediblər.

Polis abidənin önünə Xalq Cəbhəsi Partiyasının lideri Əli Kərimli də daxil olmaqla, yalnız kiçik bir qrupu buraxıb.

“Azadlıq” qəzetinin əməkdaşları Facebook vasitəsilə aksiyadan birbaşa reportaj aparıblar.

Ə.Kərimli xalqa müraciətində deyib ki, ilk respublikanın qurucuları çox ağır və çətin şəraitdə fəaliyyət göstəriblər və müstəqil dövləti qura biliblər.

“Biz ilk respublikanın dəyərlərinin geri qaytarılması və zəfər qazanması üçün əlimizdən gələni edəcəyik”, - o bildirib.

Bu gün Müsavat Partiyasının fəalları abidəni ziyarət ediblər. Polis abidəyə bir neçə nəfəri buraxıb və bunu karantin tədbirləri ilə izah edib.

Müsavat Partiyasının lideri Arif Hacılı Respublika Gününün böyük əhəmiyyət daşıdığını qeyd edərək hakimiyyəti qısqanclıqda ittiham edib. Məhz buna görə də ölkədə faktiki olaraq belə bir mühüm gün qeyd edilmir, o deyib.

Hər iki ziyarət insidentsiz ötüşüb.-02B-