Azər Qasımlı 30 sutkalıq həbs edildi (YENİLƏNİB)

Bakı/29.05.18/Turan: Bu gün, mayın 29-da Yasamal Rayon Məhkəməsində REAL Partiyasının təmsilçisi Azər Qasımlıya 30 sutka həbs verilib.

Bu barədə jurnalistlərə vəkil Elçin Sadıqov məlumat verib:

"Məhkəmədə o polisə tabe olmamaqda günahlandırıldı. Polisin iddasına görə, O küçədə ünvansız söyüşlər söyüb. Azər Qasımlı ittihamı qəbul etmədi. O, hesab edir ki, inzibati qaydada həbsi dünən, mayın 28-də Bakının mərkəzində 28 May - Respublika Günü münasibətilə yürüş keçirmələri ilə bağlıdır."-0-

* * *

2018 May 29 (Çərşənbə axşamı) 20:20:55

Azər Qasımlı saxlanılıb?

Bakı/29.05.18/Turan: "Respublikaçı Alternativ" partiyasının məclis üzvü Azər Qasımlı bu gün Yasamal Rayon Polis İdarəsinə çağırılıb. Bu barədə Turan-a "REAL" partiyasının digər məclis üzvü Natiq Cəfərli bildirib.

Onun sözlərinə görə, Qasımlı əvvəlcə Baş Prokurorluğa çağırılıb, orada onunla yarım saat söhbət ediblər. Bundan sonra Qasımlı çağırışla Yasamal Rayon Polis İdarəsinə gedib.

Qasımlının hüquq-mühafizə orqanlarına çağırılmasını dəqiq səbəbləri məlum deyil.

Cəfərli bunun Bakının mərkəzində AXC-nin 100 illiyinə həsr olunmuş dünənki aksiya ilə bağlı ola biləcəyini istisna etməyib. Azər Qasımlı bu yürüş iştirakçılarının ilk sıralarında olub.

Qasımlı saat 16.00-dan etibarən Yasamal Rayon Polis İdarəsinin binasındadır. -06D-