9 gün ərzində ictimai nəqliyyatın işləməməsi nə kimi problemlər yaradır?

Baki/23.03.21/Turan: Martın 20-dən başlayaraq Azərbaycanda 9 gün ərzində ictimai nəqliyyatın fəaliyyəti dayandırılıb. Bu, Nazirlər Kabinetinin «Xüsusi karantin rejimi ilə bağlı əlavə tədbirlər barədə» qərara etdiyi dəyişiklikdə əksini tapıb.

Belə ki, Novruz bayramı ilə əlaqədar ölkədə 9 günün qeyri-iş günləri elan olunub və həmin günlərdə (20 mart saat 00:00-dan 29 mart saat 06:00-dək) ictimai nəqliyyatın hərəkəti dayandırılıb. Səbəb kimi koronavirus xəstəliyin artımı göstərilir.

Lakin həmin günlər ərzində fəaliyyət göstərməyən rəsmi qurumlarla yanaşı xidmət sektorun, qeyri-dövlət və ən əsası səhiyyə qurumları öz işini davam etdirir. Orada çalışan şəxslər artıq işə gedib-gəlməsi ilə bağlı problemlərlə üzləşdiyini bildirir.

9 gün ərzində ictimai nəqliyyatın işləməməsi nə kimi problemlər yaradır? İctimai nəqliyyatın fəaliyətinin müvəqqəti dayandırılması yoluxma sayına təsir göstərəcəkmi?

Bakı xəstəxanalarından birində çalışan K.Q. AzadlıqRadiosuna bildirib ki, ictimai nəqliyyat olmadan hər gün işə gedib-gəlmək çox çətindir. «Bayram günlərində karantinlə bağlı ictimai nəqliyyatın işləməməsi ilə tam razıyam. Amma biz işçilər, bu günlər ərzində evdən işə qədər necə getməliyik? Ya bu xəstəxanaların, apteklərin, marketlərin, bayram günlərində işləyən başqa müəssisələrin qapısına böyük bir qıfıl vursunlar, ya da bir tədbir töksünlər ki, biz iş yerimizə gedib çata bilək».

Bakı sakini Novruz İmranov isə deyir ki, ictimai nəqliyyatın hərəkətinin dayandırılması barədə qərar çox güman ki, yalnız nəqliyyatda sıxlığına görə yox, bayram günlərində insanların bir-birinə qonaq getməsinin qarşısını almaq üçün verilib. «Lakin məncə bu qərarın müsbət tərəfi yoxdur, çünki istənilən bir adam istədiyi bir yerə hansı yolla olur olsun gələcək. Sadəcə bu insanların maddi vəziyyətini daha da çətinləşdirir».

Nazirlər Kabineti yanında Operativ Qərargahdan Turana bildirilib ki, ölkə ərazisində bayram günlərində ictimai nəqliyyatın hərəkətinin dayandırılmasının əsas səbəbi Azərbaycanda koronavirus infeksiyasına yoluxma halların artmasıdır. «Yoluxma halların artması narahatlıq doğurur. Ölkədə həmçinin koronavirusun yeni Britaniya ştamı da aşkarlanıb, bu da narahatlığını artırır. Uzun məsləhətləşmələrdən sonra bayram günlərində ictimai nəqliyyatın hərəkətinin dayandırılması barədə qərar verilib. Hesab edirik ki, bu, yoluxma halların artmasının qarşısını ala biləcək».

Azərbaycan Həkimləri İctimai Birliyinin təsisçilərindən biri, həkim-radioloq Aydın Əliyev də Turana bildirib ki, bayram günlərində ictimai nəqliyyatın hərəkətinin dayandırılması koronavirusa yoluxmaların sayını azalda bilər. «Bu məcburi çıxış yoludur. İndi yoluxmaların sayı artıb. Bizdə ictimai nəqliyyatdakı basabasdan hamı xəbərdardır. İctimai nəqliyyatın sayı çox olsagdı, onda orada sıxlıq müşahidə olunmazdı və onun fəaliyyəti dayandırılmasa olardı».

Ekspert deyir ki, Azərbaycanda ictimai nəqliyyatın hərəkətini dayandırmaq qapını açmaq üçün sındırmaq kimi bir şeydir. «Çünki açar düzəltmək imkanımız yoxdur. Yəni, ictimai nəqliyyatın sayını artırmaq imkanı yoxdur. Ona görə də məcburi çıxış yolu kimi bu qalıb. Çünki ictimai nəqliyyatda sıxlıq ən güclü yoluxma mənbələrdən biridir».

Mütəxəssis qeyd edib ki, gündəlik yoluxmaların sayı 100-200 arası olanda metronun fəaliyyətini bərpa etməsi haqqında təkliflər səsləndirilmişdi. «O vaxt biz təklif verdik ki, metrolar açılsa basabas azalar və yoluxma çox artmaz. Amma bu gün yoluxma təxminən min civarındadır və bu dönəmdə metronun açmağını tövsiyə etmirəm».

Keçmiş deputat, iş adamı Nazim Bəydəmirli AzadlıqRadiosuna bildirib ki, həm xidmət göstərən obyektlərdə, həm müxtəlif növ malları satılan marketlərdə çalışan insanlar çox cüzi əmək haqqı alırlar və onun bir hissəsi taksiyə gedirsə, bu onların maddi vəziyyətini daha pisləşdirir. «Belə qərarlar xüsusilə günəmuzd çalışan və gündəlik maaşlarını alan şəxslərin vəziyyətini çətinləşdirir. Çünki onlar öz yüksək olmayan maaşından taksi pulunu da verməlidir».

N.Bəydəmirli hesab edir ki, öz işçilərinə taksi xidmətini ödəyə bilməyən sahibkarları bu vəziyyətdə qınamaq lazım deyil. «Çünki indiki şəraitdə bunu etmək çox çətindir. Məsələn biz öz avtomobili olmayan və ictimai nəqliyyatdan istifadə edən işçilərimizin həm bayram günlərində, həm də həftə sonları taksi pulunu qarşılayırıq, bu isə koronavirus şəraitində biznes üçün əlavə itkidir».

İş adamı deyir ki, hökümət bu tipli qərarları verəndə vətəndaşların vəziyyətini nəzərə almır. «Hökümət bu insanları, ailələri, işçiləri demək olar ki, nəzərə almır və heç bir sosial paketlər olmaya-olmaya belə qərarlar verir. İnsanları bu problemlərlə baş başa buraxılıb və hökümətin heç bir addımı nə sadə məntiqə, nə də normal şəraitə uyğun deyil».-0-