ABB-nin vəsaitlərinin mənimsənilməsi işi üzrə prosesdə daha üç müttəhim ifadə verib

Баку/16.02.19/Turan: Cümə günü günortadan sonra Bakı Ağır Cinayətlər Məhkəməsində Azərbaycan Beynəlxalq Bankı ASC-nin keçmiş rəhbəri Cahangir Hacıyev, biznesmen Dünyamin Xəlilov və həmin maliyyə müəssisəsinin vəsaitlərinin mənimsənilməsi işi üzrə ittiham olunan digər 19 nəfərin məhkəmə prosesi davam edib.

Fasilədən sonra müttəhim Təbriz Əbdülhəmidov ifadə verib. O 17 mln. manatdan çox vəsaiti mənimsəməkdə ittiham olunur. O qeyd edib ki, əvvəllər D.Xəlilovun şirkətində kuryer kimi çalışıb, sonra "General Consalting" şirkətində inşaat üzrə mütəxəssis təyin edilib. "Dünyamin müəllim məni "Pərvanə" MMC-yə direktor təyin edəcəyini vəd etdi. Mən razılaşdım. Bu 2007-ci ildə olub. Mən hər zaman obyektdə olurdum. Ora mənə imzalamaq üçün sənədlər gətirirdilər. Mənim əməkhaqqım 450-500 manat idi", -T. Əbdülhəmidov bildirib. O deyib ki, Zaqatala, Şəki, Qucar, Qazaxda Olimpiya komplekslərinin inşasına nəzarət edib.

Sonra iş üzrə digər müttəhim, "Xəzər Menecment"in rəhbəri Adil Mikayılov dindirilib. O bildirib ki, D.Xəlilovdan Şəki Hidroelektrik Stansiyasının tikintisilə bağlı təklif alıb. "Mən əvvəlcə 700, sonra 1000 manat alırdım. Direktor olandan sonra 2500 manat almağa başladım. 2009-cu ildə ABB-nin zəmanətilə Almaniya şirlkətilə müqavilə bağladıq. Mən sənədləri imzaladım. Ümumilikdə, bizə nə deyirdilər, onu edirdik. Bütün şirkətlərə D.Xəlilov rəhbərlik edirdi. Biz bankdan pulu hissə-hissə götürüb kassir Mikayıl Muradova verirdik", - o bildirib.

A.Mikayılov 1 mln. 14 min manatı mənimsəməkdə ittiham olunur.

Sonra müttəhim Erhan Cavad dindirilib. O, "Azərbaycan Consaltinq Qrup" şirkətinin rəhbəri olub. E.Cavad bildirib ki, "Cargill" şirkəti "Buta Kitchen" ilə 163 mln. manat məbləğində məhsulun alınmasına dair müqavilə bağlayıb. ABB bu sövdələşmənin qarantı kimi çıxış edib. "Cargill" bizə məhsul satıb, sonra yenidən onları alıb başqa şirkətə satırdı. Azərbaycana qarğıdalı göndərməliydilər. Sonra onu satdılar. Faizlər tutulduqdan sonra "Cargill" "Buta Kitchen"ın xaricdəki hesabına 130 mln. manat köçürüb. 30 milyon Azərbaycana göndərilib, qalan 100 milyonu şirkətin səhmdarə Nəsib Piriyev borc kimi başqa şirkətə köçürüb. Həmin pulların sonra necə olduğunu bilmirəm", - müttəhim deyib.

Hakim Qəribov bildirib ki, E.Cavad və N.Piriyev birlikdə 249 mln. manatdan çox mənimsəyiblər. N.Piriyevin barəsində axtarış elan edilib və onun işi ayrıca icraata götürülüb.

Proses fevralın 18-də davam edəcək.

*Cahangir Hacıyev 2015-ci il dekabrın 5-də həbs olunub. Bakı Ağır Cinayətlər Məhkəməsi onu 15 il azadlıqdan məhrum edib.

C.Hacıyev və digər yeddi nəfər külli miqdarda ziyan vurmaqla sui-istifadə, dələduzluq, mənimsəmə, israfçılıq, vəzifə səlahiyyətini aşmaq, rüşvət verməkdə təqsirli bilinib.

Dekabrın sonunda baş prokuror bildirib ki, C.Hacıyevə qarşı yeni maddə - külli miqdarda vəsaitin mənimsənilməsi, cinayətkar yolla əldə edilmiş vəsaitin leqallaşdırılması, vergidən yayınma və s. üzrə ittiham irəli sürülüb.

O, real dəyəri olmayan veksellerin alqı-satqısına dair ümumı məbləği 3.4 milyard dollar və 987 milyon avro həcmində sövdələşmələr bağlamaqda ittiham olunur.

Istintaqın bildirdiyinə görə, C.Hacıyevin göstərişi ilə ümumi məbləği 900 mln. manat həcmində pul vəsaitinin manat və xarici valyutada leqallaşdırılması məqsədilə çoxsaylı kredit müqavilələri bağlanıb. Həmin vəsaitlər mənimsəmə məqsədilə bankın hesabından başqa hesablara köçürülüb.

İstintaq C.Hacıyevi keçmiş deputat Dünyamin Xəlilov və digər 20 nəfərlə birlikdə 4,7 milyard manatı məminsəməkdə ittiham edib.

Bundan əlavə, istintaqın məlumatına görə, C.Hacıyev D.Xəlilov (2011-2014-cü illərdə "Aztorq" MMM-nin faktiki rəhbəri olub) ilə birlikdə 1 mln. 752 min manat məbləğində vəsaiti dövlət büdcəsinə ödəməyib.

C.Hacıyev və D.Xəlilov bütün ittihamları rədd ediblər.-21С-