Azərbaycan daha çox gəlir əldə edir, limit artırılmalıdır

Azərbaycan Respublikası Tarif (qiymət) Şurasının qərarına əsasən təbii qazın illik istehlak limiti 1700 kubmetrdən 2200 kubmetrədək artırılıb. Qərar mayın 1-dən qüvvəyə minir.

İqtisadiyyat naziri Şahin Mustafayev qərarı şərh edərkən onun prezident İlham Əliyevin tapşırığı əsasında qəbul olunduğunu qeyd edib. Onun sözlərinə görə, qərardan əvvəl 1,5 milyon abonent və ya 6 milyon nəfər 1700 kubmetr limitindən istifadə edirdi. "Mövcud qərara əsasən, əlavə olaraq 300 min abonent (təxminən 1 milyon 200 min nəfər) də bu imkanlardan istifadə edəcək. Beləliklə, güzəştli tariflərdən abonentlərin 70 faizi istifadə edirdisə, bugünkü qərardan sonra həmin göstərici 85 faizədək artacaq".

Aprel ayında Milli Məclisin plenar iclasında bəzi deputatlar qaz limitini 2 dəfə artırmağı və ya ümumiyyətlə, ləğv etməyi təklif etmişdi.

Milli Məclisin İqtisadiyyat, sənaye və sahibkarlıq komitəsinin üzvü Vahid Əhmədov "Azadlıq" radiosuna bildirib ki, qazın və işığın istifadəsinə limitin ləğv edilməsi məsələsi gündəmdə hələlik yoxdur. Lakin limitin artırılması məsələsi artıq 2 aydan çoxdur müzakirə olunur. "Limitin ləğvi birbaşa insanların aldığı məvaciblərlə əlaqədardır. Əgər əmək haqları, pensiyalar, müavinətlər artırılarsa, limiti ləgv etmək mümkün olacaq".

Deputatın sözlərinə görə, limit insanların sosial vəziyyətini yaxşılaşdırması üçün tətbiq olunub və əhalinin çoxu istehlak limitinin çərçivəsindən çıxmır. "Əhalinin 70%-i 1700 kubmetr ərtafında qaz istehlak edir. İşığa gəlincə, əhalinin 80%-i limiti keçmir. Cənab prezident yəqin ki, bütün məsələləri araşdıraraq, humanist addım atdı və qərarı imzaladı", - o deyib.

V.Əhmədov qazın istehlak limitinin artırılmasını "ölkədə aparılan sosial islahatların davamı" kimi qiymətləndirib.

Deputat işığın istehlak limitinin qaldırılmasını istisna etməyib və bununla bağlı müzakirələrin aparıldığını vurğulayıb.

İqtisadçı Vüqar Bayramov hesab edir ki, qazın istehlak limitinin artırılması ilə bağlı qərar digər kommunal xidmətlərdəki limitə baxılması üçün zəmin yaradıb.

V.Bayramovun sözlərinə görə, limiti ümumiyyətlə ləğv etmək və ya daha da artırmaq lazımdır. Çünki 2016-cı ilin noyabrda mavi qaza limitlər tədbiq olunan dövrlə müqayisədə artıq iqtisadi şərait başqadır. "2018-ci ildə Azərbaycanda mavi qazın hasilatında və ixracatında əvvəlki dövrlə müqayisədə 7% artım var. Beləliklə, qazdan əldə olunan gəlirlər də artıb və 1 499 dollar təşkil edib".

Sonda ekspert limitə yenidən baxılmasının və daha da genişləndirilməsinin vacibliyini qeyd edib.

Xatırladaq ki, 2016-cı ildə Tarif (qiymət) Şurası təbii qaz və elektrik enerjisi ödənişləri üçün differensiallaşmış tarifə keçməsilə bağlı qərar verib və təbii qazın illik limitinin 1500 kubmetr, elektrik enerjisində isə aylıq 250 kilovatt-saat müəyyən edib. --0--