Azərbaycan vətəndaş cəmiyyəti nümayəndələrinin iclasının jurnalist Rasim Əliyevin qətli ilə bağlı müraciəti

Vəhşicəsinə döyüldükdən sonra aldığı xəsarətlər nəticəsində ANN.az resursunun jurnalisti, uzun müddət Reportyorların Azadlıq və Təhlükəsizlik İnstitutunda işləmiş Rasim Əliyev avqustun 9-da dünyasını dəyişib. Rasim Əliyev ölkənin müxtəlif on-layn nəşrlərində Azərbaycanın ictimai-siyasi həyatında baş verən hadisələr haqqında foto və videoreportajları ilə məşhurdur.

Azərbaycan DİN və Baş Prokurorluğunun birgə məlumatına görə, “Bakı sakini, 1984-cü il təvəllüdlü Rasim Məmmədəli oğlu Əliyev avqustun 8-də saat 18:00 radələrində Bayıl qəsəbəsi ərazisində “Bayıl market” mağazası yaxınlığında bir qrup naməlum şəxs tərəfindən döyülüb. O, çoxsaylı bədən xəsarətləri ilə şəhər Kliniki Tibb Mərkəzinə yerləşdirilib. Aldığı xəsarətlərdən jurnalist avqustun 9-da saat 5.00-da dünyasını dəyişib.

Faktla bağlı Bakı Şəhər Prokurprluğunun istintaq idarəsində 126.3-cü (qəsdən sağlamlığa ağır zərbə vurma, zərərçəkmişin ölümünə səbəb olduqda) maddə ilə cinayət işi açılıb. Şəhər Prokurorluğu və polis əməkdaşlarından birgə istintaq-əməliyyat qrupu yaradılıb”.

Ölümündən əvvəl Əliyev jurnalistlərə bildirib ki, onu facebook-da “Qəbələ” futbol klubunun oyunçusu Cavid Hüseynovun idmançıya yaraşmayan davranışını qınayan statusuna görə döyüblər. Onu 5-6 nəfər döyüb. “Qəbələ” FK Gilan Holding-ə bağlıdır. Klubun prezidenti Avropa-Azərbaycan Cəmiyyətinin (TEAS) sədri, FHN rəhbəri Kəmaləddin Heydərovun oğlu Taleh Heydərovdur.

Cavid Hüseynov iyulun 31-də “Appolon”-“Qəbələ” maçı zamanı Kiprli azarkeşlərə qeyri-etik jest göstərib, avqustun 6-da “Qəbələ”-“Appolon” cavab maçından sonra yenə Kiprli jurnalistə ədəbsiz jest göstərərək fərqlənib, amma hər iki halda klub rəhbərliyi tərəfindən cəzalandırılmayıb. Maçda “Qəbələ” fanatları özlərini aqressiv aparıblar və polis onları saxlamaq məcburiyyətində qalıb. Amma adekvat reaksiya vermək yerinə, klub rəhbərliyi polisin əməllərini pisləyən bəyanatla çıxış edərək, azarkeşləri “ruhdan düşməməyə və tribunalarda öz yerlərini tutaraq, komandanı dəstəkləməyə davam etməyə” çağırıb.

Bir müddət əvvəl, son hadisəyə qədər Rasim Əliyev sosial şəbəkələrdə fəallığına görə hədələndiyini, bununla əlaqədar polisə müraciət etdiyini bildirmişdi. Amma avqustun 8-də jurnalistin vəhşicəsinə döyülməsindən sonra o, döyülməsinin səbəblərini açıqlasa da, nə “Qəbələ” FK, nə hüquq-mühafizə orqanları, nə ali hakimiyyət orqanları bu amansız cinayətə reaksiya verməyib. Eyni zamanda, onun həyatı üçün təhlükənin aradan qaldırılması, eləcə də cinayət törətmiş şəxslərin axtarışı ilə bağlı operativ tədbirlər görülməyib.

Hüquq-mühafizə orqanları, Prezident Administrasiyası və “Qəbələ” klubu hadisəyə yalnız jurnalistin ölümündən sonra müəyyən dərəcədə reaksiya veriblər. Prezident İlham Əliyev baş verən hadisəni müstəqil KİV-in fəaliyyətinə təhlükə kimi qiymətləndirib və qətlin istintaqını şəxsi nəzarətinə götürüb. 

Rasim Əliyevin qətlinə Azərbaycanda söz azadlığının boğulması mühiti kontekstindən ayrı baxmaq olmaz – indiyədək diffamasiya haqqında qanun qəbul edilməyib, jurnalistlər Elmar Hüseynov və Rafiq Tağının qatilləri tapılmayıb, əksər hallarda jurnalistlərə qarşı zorakılığa yol vermiş şəxslər məsuliyyətə cəlb edilməyib. Elə bu günlərdə, avqustun 7-də Bakı Ağır Cinayətlər Məhkəməsinin binası yaxınlığında polisin fürsət verməsi ilə jurnalistlər mülki geyimli şəxslər tərəfindən fiziki və mənəvi zorakılığa məruz qalıb. 13 jurnalist və bloger həbsdədir, jurnalist Xədicə İsmayılovanın işi üzrə, demək olar ki, qapalı proses keçirilir, hakimiyyəti tənqid edən jurnalistlərin qohumları təqiblərə məruz qalır, qorxu mühiti yaradılır. Bütün bunlar jurnalistlərə və Kütləvi Kommunikasiya Vasitələrinin iştirakçılarına qarşı növbəti cinayətlər üçün şərait yaradır.

Yaranmış vəziyyətlə əlaqədar Vətəndaş Cəmiyyətini Müdafiə Komitəsinin himayəsi ilə keçirilən iclas iştirakçıları bu siyasətə etirazlarını bildirir və hakimiyyətə aşağıdakı çağırışları edir:

1. Jurnalist Rasim Əliyevin qətlinin təşkilatçıları və icraçıları ən sərt şəkildə cəzalandırılsın.

2. Jurnalistlər Elmar Hüseynovun və Rafiq Tağının qətllərinin təşkilatçıları və icraçıları tapılsın və məsuliyyətə cəlb edilsin.

3. Jurnalistlərə qarşı bütün zorakılıq faktları araşdırılsın və təqsirkarlar məsuliyyətə cəlb edilsin.

4. Bütün jurnalistlər və blogerlər həbsdə azad edilsin.

5. Azərbaycanda söz azadlığının inkişafı üçün şərait yaradılsın.

6. Ən qısa zamanda müstəqil, keyfiyyətli və məsuliyyətli mətbuat və bloq sahəsi yaradılması proqramı işlənib hazırlansın və həyata keçirilsin.

7. Jurnalistlərə və sosial şəbəkə iştirakçılarına qarşı zorakılığın qarşısının alınması üzrə preventiv mexanizmlər yaradılsın.

Bakı, 10.08.2015