Bütün xoş niyyətlər Allaha görədir

Ramazan ayının (birinci günü iyun ayının 18-i) və orucluq ibadətinin artıq bir həftəsi geridə qalır.

Bu müddət ərzində orucluq ibadətilə bağlı icmaların yanaşmalarında fərqli hallar müşahidə etdik. İcmaların müəyyən qismi məsciddə namaz qılaraq bununla üzərlərinə düşən vəzifələri yerinə yetirilmiş sayıblar.

İcmalar da var ki, ehsanat etməklə, oruc tutan şəxslərin oruclarını məsciddə aça bilmələri üçün şərait yaratmaqla fərqləniblər. Sonuncu dediyimiz keyfiyyət paytaxtın bəzi məscidlərinin icmalarına, əsasən də Bakı kəndlərində fəaliyyət göstərən icmalara aid olub. Həm də iftar mərasimlərinə maliyyə dəstəyi verən şəxslər fərqli baxışlar sərgiləyiblər. Elələri olub ki, iftar mərasimlərini Allaha xatir maliyyələşdirdiklərini deyiblər, elələri olub ki, adının bəlli olmasını şərt sayıb.

Bundan əlavə, ayrı-ayrı oruc tutan və ya tutmayan imkanlı şəxslər iftar süfrələri açırlar. Bu addım Bakının kəndlərində istisnasız olaraq atılır. Bu addım, yeri gəlmişkən, “Quran-i-Kərim”də təşviq edilən keyfiyyətdir. Kimsə hər-hansı səbəb üzündən oruc tuta bilmirsə, orucun savabından məhrum olmamaq üçün “Quran-i-Kərim” onları oruc tutanlara iftar süfrələri açmağa təşviq edir. Bir iftar süfrələrində iştirakçı sayına gəlincə, burada konkret rəqəm söyləmək belə yersiz görünür. O səbəbdən ki, məscidə namaza gələn 30-50, 100 nəfər də ola bilər, həmin saydan asılı olaraq icma oruc açmaq mərasiminə hazırlıq görür. Amma istər Bakı kəndlərinin məscidlərində, istərsə də ayrı-ayrı fərdlərin ehsanatlarında yüzlərlə şəxsin iştirakından danışmaq olar. Bəzənsə bu hədd min nəfərə və daha yuxarı çıxa bilir.

Yeri gəlmişkən, iftar süfrələrində onun zənginliyi heç zaman diqqəti cəlb etmir. Daha çox rastlaşdığımız oruc tutan şəxslər iftardan sonra belə deyirlər: “Mən nəyi nəyə dəyişdim, bu ana qədər dualarım Həqq dərgahında qəbul edilə bilərdi, dua-sənalarım ona yetə bilərdi, indi isə...”.

Yeri gəlmişkən, bəzi şeylər orucluq mərasiminə aid olduğuna görə,  onları açıq yazmağı daha üstün saydıq. Orucluğa aid “əhya günləri”ndə məsciddə adətən daha çox kütlə toplaşır. Bu “əhya günləri” Ramazan ayının üçüncü 10 günlüyünün tək günlərinə təsadüf edir. Bu mərasim “Quran-i-Kərim”in nazil olması ilə bağlıdır. Hədislərə görə, “Quran-i-Kərim” Ramazan ayının üçüncü 10 günlüyünün tək günlərinin birində yer üzünə göndərilib. Həmin günlərin müqəddəs kitabda yüksək dəyəri var. Belə ki, “Quran-i-Kərim”də “Qədr surəsi”ndə “qədr gecəsi min aya bərabər” bir gün kimi dəyərləndirilir. Bu gecə oyaq qalmağın savabının xeyrindən danışılır.

Ramazan ayında daha bir məsələ orucluğun 19-cu günü sübh azanı vaxtı Həzrəti Əlinin məsciddə qılıncla vurularaq qətlə yetirilməsidir. Belə ki, həmin qılınc zərbəsinin nəticəsi olaraq Həzrəti Əli Ramazan ayının 19-20-ci günlərini yaralı yatıb, 21-ci günü vəfat edib. Bu tarix islam dünyası üçün qəmli günlərdən biridir. Odur ki, həmin gün Həzrəti Əlinin xatirinə məscidə gələnlərin sayı artır.

Həm də bu hadisə Ramazan ayına təsadüf etdiyi üçün məscidlərdə Həzrəti Əli adına ehsanlar verilir, “Əli süfrə”ləri açılır, üstəgəl, iftar süfrələri açılır.

İnsanlar bütün xeyir əməlləri Allah razılığını qazana bilmək üçün əmələ gətirdiklərini deyərək işlərinin rəvanlığı, axarlığı, niyyətlərinin gerçəkləşməsi üçün hər cür xoş niyyətli əməldə iştirakçı olmağa razılıq verirlər. -05C/B-