Cənubi Qafqaz qadınları dövlət idarəçiliyində təmsil olunmaq üçün birləşirlər

Cümə axşamı Beynəlxalq Mətbuat Mərkəzində (BMM) Cənubi Qafqaz Qadın Konqresinin (CQQK) bir illik fəaliyyətilə bağlı dəyirmi masa keçirilib.

Qurumun üzvü, hüquq müdafiəçisi Novella Cəfəroğlu təşkilatı bir il əvvəl Azərbaycan, Gürcüstan və Ermənistan qadın təşkilatlarının yaratdığını söyləyib. Həm də qeyd edib ki, quruma üzvlük hələ də açıqdır, istənilən qadın təşkilatı üzv ola bilər. 

Onun sözlərinə görə, qurumun əsas məqsədi gender bərabərliyinə, münaqişələrin tənzimlənməsində qadınların rolunun artırılmasına, dövlət idarəetmə sistemində qadın kadrların sayının yüksəldilməsinə nail olmaqdır. Bu mənada üç Qafqaz respublikası qadın təşkilatlarının təcrübə mübadiəsi aparmalarına ciddi ehtiyac var.

Öncə natiqlər Azərbaycanda müstəqil QHT sektorunun, o cümlədən qadın təşkilatlarının, demək olar ki, sıradan çıxarıldığını qeyd ediblər. Hazırda formal olaraq qalan belə təşkilatların maliyyə mənbələrinin olmadığı vurğulanıb. 

Konqres qadın təşkilatlarının birgə fəaliyyəti üçün uğurlu platforma kimi dəyərləndirilib. Natiqlər Konqres formatını Qafqaz qadın təşkilatlarının birgə fəaliyyəti, əməkdaşlığı və həmrəyliyi üçün uğurlu layihə kimi qiymətləndiriblər.

Natiqlər qadınların parlament, icra, məhkəmə hakimiyyəti, bələdiyyə sistemi kimi idarəçilik orqanlarında çox az yer tutmalarına narazılıq ediblər. Bu fərqi aradan qaldırmaq üçün təkliflər səsləndiriblər. Təkliflərdən biri dövlət idarəçilyində qadınların təmsilçiliyi ilə bağlı kvota tətbiq edilməsi olub.

Qadınların dövlət idarəçiliyi sistemində əhəmiyyətli yer tutmamasına səbəb kimi özlərinə inanmamaları, iqtisadi asılılıqda olmaları, cəmiyyətin qadın fəallığını hələ də qəbul edə bilməməsi göstərilib. Bundan əlavə, bəzi qadın təşkilat rəhbərlərinə görə, kişilər özləri də qadınların dövlət idarəçilik sistemində önə çıxmalarında maraqlı olmamaqda ittiham ediliblər. Xanım təşkilat rəhbərləri Gürcüstanda qadınların dövlət idarəçiliyi sistemində irəli çəkilmələrinə Azərbaycandakı qədər qısqanclıq olmadığını nəzərə çatdırıb. Təşkilat rəhbərləri Azərbaycanda 1nəfər qadın icra başçısı, 37 nəfər  qadın icra başçısı müavini, 2 komitə sədri, 3 qadın bələdiyyə sədri olduğunu bildiriblər.

Bir sıra natiqlər isə Konqresi gənclərin siyasi və idarəçilik baxımından formalaşma məktəbi adlandırıblar. Burada çalışaraq, idarəçilik vərdişlərinə yiyələnən gənclərin idarəetmə sisteminə cəlb edilməsi üçün siyahılarının ölkə rəhbərliyinə təqdim olunması təklifini ifadə ediblər. -05C-