CRRC-Azerbaijan gənc tədqiqatçıları dəstəkləyəcək

Qafqaz Resurs Araşdırma Mərkəzi –Azərbaycan (CRRC-Azerbaijan) gənc araşdırmaçılar üçün stipendiat proqramının yekunlarına dair konfrans keçirib.

CRRC-Azerbaijan İdarə Heyətinin üzvü, Xəzər Universitetinin rəhbəri Hamlet İsaxanlı bildirib ki, Azərbaycanda elmi işlənmələrin lazımi səviyyədə olmadığı bir vaxtda gənc araşdırmaçılara dəstək prpqramının olması çox vacibdir. Elmi araşdırmalar olmadan keyfiyyətli universitet ola bilməz. 

CRRC-Azerbaijan direktoru Yuliya Əliyeva deyib ki, bu qurum 10 il əvvəl Karnegi korporasiyasının  dəstəyilə araşdırma mərkəzləri şəbəkəsi çərçivəsində yaradılıb.

İlkin olaraq CRRC-Azerbaijan tədqiqatların aparılması üçün informasiya-kommunikasiya infrastrukturunun yaardılması üzrə resurs kimi formalaşıb.

Hazırda CRRC-Azerbaijan-ın nəzdində sosial, siyasi elmələrə dair kitabların yer aldığı kitabxana yaradılır, elmi axtarışların metodologiyasının öyrənilməsi üzrə treninqlər keçirilir və elmi araşdırmalar aparılır. 

Mərkəzin ən maraqlı layihələrindən biri “Qafqaz baromerti” adlanır. Bu, üç Cənubi Qafqaz ölkəsində müxtəlif fəaliyyət sahələri ev təsərrüfatlarına dair illik sorğuların keçirilməsidir. Bu araşdırmalar rəsmi statistik məlumatların tutuşdurulması abxımından vacibdir və jurnalistlər, tədqiqatçılar üçün informasiya mənbəyi kimi çıxış edir.

CRRC-Azerbaijan öz fəaliyyəti dövründə gənc alimlər üçün 30 qrantı dəstəkləyib. Gənc araşdırmaçılar üçün təqaüd proqramı “Avrasiya” Tərəfdaşlıq Fondunun və Açıq Cəmiyyət İnstitutunun dəstəyilə keçirilir. 

Proqramın meneceri Sevinc Məmmədova qeyd edib ki, proqramda 155 tələbə iştirak edib. Onlar beynəlxalq standartlar üzrə sosial araşdırmaların tətbiqi metodikasını öyrəniblər. Onların bir hissəsi ikinci mərhələdə daha geniş tədris keçiblər. Yekun mərhələdə 9 iştirakçıdan 3 nəfər qalib seçilib.

Birinci mükafata Günay Balaşova “Azərbaycanda aqrar sektorda məhsuldarlığın necə artırılması” mövzusunda işə görə layiq görüıüb. İkinci yeri Zeynəb Dadaşova “Azərbaycan kəndlərində İnternetdən istifadə” mövzusunda araşdırmaya görə, üçüncü yeri Ləman Məmmədli “18 yaşından sonra ailəsiz uşaqların sonrakı həyatı” işinə görə tutub.

 Aktual mövzu sayılan “Azərbaycan Dövlət Neft Fondunun Müşahidə Şurasının idarəçilik funksiyasını necə təkmilləşdirməli” işinə görə Ramil Kazımov həvəsləndirici mükafata layiq görülüb.

Mahım Ələkbərova da “Zibilin düzgün atılması maarifləndirmə” işinə görə həvəsləndirici mükafat alıb.—06D--