Diabet və vərəmə qarşı proqramlar təsdiqlənib

Nazirlər Kabineti  bu günlərdə 2016-2020-ci illər üçün 2 dövlət proqramını təsdiqləyib. Bunlardan biri “2016-2020-ci illər üçün şəkərli diabet üzrə”, ikincisi isə  “2016-2020-ci illər üçün vərəmlə mübarizə üzrə Tədbirlər Proqramı”dır.

Dünyada şəkərli diabet xəstələrinin sayı hər il 15-20 faiz artır. Azərbaycanda ilbəil bu  xəstəliyə yoluxanların sayında 15 faizə qədər artım müşahidə olunur. 2015-ci ilin 9 ayının nəticələrinə əsasən ölkədə 204 964 nəfər diabet xəstəsi qeydiyyatdadır. Respublika Endokrinoliji Mərkəzin direktor müavini Babək Salekin “Turan”a verdiyi məlumata görə, bu xəstələrin 1100 nəfəri 18 yaşadək olan uşaqlardır. Ancaq həkim hesab edir ki, “bu rəqəm şəkərli diabetə tutulmuş uşaqların sayının real göstəricisi deyil. Çünki bölgələrdə valideynlər qız uşaqlarının xəstəliyini ətrafdakılardan gizlətməyə çalışırlar”.

Şəkərli diabet xəstələrinin sayı son 10 il ərzində 3 dəfədən çox artıb, bu xəstəlik səbəbindən  ölüm səviyyəsi 2 dəfədən çox enib. Şəkərli xəstələr arasında I tip diabetə tutulanlar 28921, II tip diabet üzrə isə 176043 nəfərdir.

Bu  proqrama əsasən Səhiyyə Nazirliyi 2016-2020-ci illərdə endokrinoloji yardım göstərən  tibb müəssisələrinin avadanlıq və reaktivlərlə təmin edilməsini, şəkərli diabetli şəxslərə göstərilən ixtisaslaşdırılmış tibbi yardımın keyfiyyət standartının yüksəldilməsini nəzərdə tutur.  Proqrama görə, diabetli uşaq və gənclərin uçotunun aparılması, onlara növündən və tipindən asılı olmayaraq təhsil aldıqları bütün təhsil müəssisələrində tibb işçiləri və müəllimlər vasitəsilə xüsusi nəzarətin təşkil edilməsini planlaşdırlır.

Şəkərli diabetdən fərqli olaraq vərəmli xəstələrin sayında artım yox, stabillik müşahidə olunur. 

Ağ Ciyər Xəstəlikləri İnstitutunun şöbə müdiri Sevinc Tağıyeva “Turan”a bildirib ki, 2014-cü ilin yekunlarına görə, vərəmli xəstələrin sayı hər yüz min nəfər üçün, 43,5 faizdir. Vərəmlilər arasında ölüm göstəricisi hər yüz min nəfərə görə 3,9 faiz olub. S.Tağıyeva əvvəlki illərlə müqayisədə ölüm hallarının azaldığını deyib. “Vərəmin ağır forması azalıb, yoluxmada isə stabilləşmə müşahidə olunur.” Vərəm daha çox əhalinin 16-65 yaş arasındakı qrupu, xüsusilə də kişilər arasında müşahidə olunur. “18-24 yaş arası qrupda göstəricilər yüksək olur. Bu da əsgərlik yaşlı oğlanların tibbi müayinədən keçməsi və xəstəlin erkən aşkarlanması ilə bağlıdır. Yoluxma 0-14  yaş arasında hər yüz min nəfərə görə, 15,7 faiz olub “. “Bəs öklənin hansı bölgəsində vərəmə yoluxma halları daha yüksəkdir“ sualına S.Tağıyeva cənub bölgəsini göstərib. O səbəb kimi, “həmin regionlarda profilaktik işlərin zəif aparılmasını” göstərib.-0—