Dini radikallığın aradan qaldırılması üçün dini təbliğ güclənməlidir

“Jurnalistlər Ekstremal Şəraitdə” (JEŞ) İctimai Birliyi “Dini icmaların cəmiyyətə inteqrasiyası tədbirləri” çərçivəsində cümə günü yekun mətbuat konfransı keçirib.

Layihənin rəhbəri Firuzə Bəyməmmədqızı layihənin mahiyyəti və məqsədi barədə açıqlama verib. Layihə çərçivəsində dini icmaların cəmiyyətə inteqrasiyası, dini fərqliliklər və dini vəhdət, tolerantlıq dini barışıq düsturu, cahillik dini radikallığın əsası kimi mövzularında keçirilən tədbirlər haqda məlumat verilib.

Keçirilən tədbirlərdə dini icmaların cəmiyyətə inteqrasiyasında problemin olmadığı xüsusi vurğulanıb. Bəzi radikal cərəyanların dini ibadətləri ibadət olmaqdan çox digərlərindən fərlqənmə üslubuna döndərmələri xüsusi vurğulanıb.

Keçirilən tədbirlərdə Yaxın Şərq hadisələri fonunda ölkə vətəndaşlarının bu döyüşlərə cəlb edilməsi, xüsusilə gənclərin bu “radikal bataqlıq”lardan xilas edilməsi xüsusi olaraq müzakirə edilib. “Cihad” adı ilə insanların döyüşlərə cəlb olunması pislənilib. Bütün bunlar insanların din barədə təsəvvürlərinin az və ya səhv olması, dini maarifçiliyin yetərli olmamasının nəticəsi kimi dəyərləndirilib.

Tədbirlərdə natiqlər dini sahədə vəziyyəti daha da yaxşılaşdırmaq üçün orta və ali məktəblərdə din tarixlərinin öyrədilməsini təklif ediblər. Onların fikrincə, dini bilgi artdıqca insanların düşüncələrində radikallıq meylləri də azalacaq. Nəticə etibarilə, insanlar din barədə düzgün və bitkin bilgi alacaqlar.

Bundan əlavə, gəncləri radikal cərəyanların “ovu”na dönməkdən qorumaq üçün ailə-məktəb-cəmiyyət tandeminin əlbir fəaliyyətinə ciddi ehtiyac olduğu da vurğulanıb. Gənclərin hansı dini cərəyanların mənsubları ilə əlaqəli olmasının nəzarətdə saxlanması təklif edilib.

Layihə çərçivəsində tədbirlərdə iştirakçı olan dini icma rəhbərləri 2011-2013-cü il ilə müqayisədə 2014-15-ci illərdə Azərbaycandan radikal dini qruplaşmalara qoşulanların sayının kəmiyyət baxımından əhəmiyyətli dərəcədə azaldığını da nəzərə çatdırıblar. Bu istiqamətdə telekanallarda dini maarifçilik təbliğinin gücləndirilməsi də qeyd edilib. Həm də telekanallarda aparılan dini maarifçilik təbliğinin daha geniş auditoriyanı əhatə etməsi baxımından gərəkli olduğu vurğulanıb.

Bununla yanaşı layihə çərçivəsində keçirilən tədbirlərə qatılan iştirakçılar bu istiqamətdə bu tip layihələr müntəzəm icra edildiyi halda qarşıya qoyulan hədəflərə yetməyin mümkünlüyünü vurğulayıblar.-05C-