Dövlət Mikayılovları evsiz qoyub

Emil Mikayılovun ailəsi - xanımı, iki övladı (kiçiyi 6 aylıqdır) və yaşlı, ağır xəstə olan qayınatası 1975-ci ildən Bakıda Bayıl massivində Qurban Abbasov küçəsi, 4 ünvanında birmərtəbəli evdə yaşayır. Evi ailənin başçısı, Emilin xanımının atası tikib. Ev sahibi evi qanuniləşdirmək istəyib, ancaq ondan elə bir məbləğ istəyiblər ki, heç ev üçün sənəd də ala bilməyib. Mütəmadi olaraq kommunal xidmətlərə görə pul ödəyiblər, həmin evdə qeydiyyatda olublar, bu müddətdə heç kim yaşayış yerilə bağlı ailəyə irad irəli sürməyib. Yaxınlıqda qonşular yaşayıblar, bəziləri qohumlardır.

2015-ci ildə evin yerləşdiyi yer Bakı Şəhər İcra Hakimiyyətinin 15.04.2014-cü il tarixli 173 saylı sərəncamı ilə bu rayonun renovasiyasını həyata keçirən RahatHayatYasayısKompleksi tikinti şirkətinin diqqətini cəlb edib. Ev sahiblərinə təzyiq kampaniyası başlayıb, bu evin adı çəkilən şirkətə satılmasını tələb ediblər. Firma ailənin evi tərk etməsi üçün onlara son qiyməti təklif edib – 52 kv. metr yaşayış sahəsinə görə 50 min manat. Amma təklif olunan məbləğə Bakıda normal mənzil almaq mümkün olmadığından ev sahibləri çıxmaqdan imtina ediblər. Uzun sürən təzyiqlər nəticəsində Emilin qaynatasının həyat yoldaşı ürək xəstəliyindən dünyasını dəyişib.

Təhdid kampaniyası davam edib. Qonşular şirkətin şərtləri ilə razılaşıblar və gediblər. Tikinti şirkəti bu evdə yaşadıqları illər ərzində daşınmaz əmlak vergisini və kommunal ödənişləri  vaxtlı-vaxtında ödəyən ev  sahiblərinin mülkiyyət hüququnu qanuniləşdirməməsindən istifadə edib. Mikayılovlar ailəsinin “kupça”sı yoxdur. “Təsadüfən” inşaatçılar Mikayılovun yaxınlıqda yaşayan qaynanasının evinin damını dağıdıblar və orada yaşamağı çətinləşdiriblər. O, şirkətdən pulu alaraq  çıxmaq məcburiyyətində qalıb. Dərhal onun evini dağıdıblar, yerində  qazılmış çala Mikayılovlarun evinə təhlükə yaradıb, ev çalaya düşə bilərdi. Evdə qeydiyyatda olan yaxın adamlardan biri həbs cəzası çəkir və tikinti şirkəti də bu faktdan istifadə edərək ev sahiblərini adamın təkrar məhkum edilməsinə nail olacağı ilə hədələyib.

Sonra məhkəmə olub. Məhkəmə ailənin faktiki sahiblik və yaşayış hüququnun mənsub olduğu evdən çıxarılması barədə qərar qəbul edib. Məhkəmə evin sökülməsi barədə qərar çıxarıb, daşınmaz əmlak reyestrindən mülkiyyət hüququnu təsdiq edən çıxarışın olmamasına görə ailənin bu evə sahibliyinin qanunsuz olması barədə tikinti şirkətinin dəlillərini qəbul edib. Məhkəmə digər sənədləri və ailənin dəlillərini nəzərə almayıb. Məhkəmənin qərarında tikinti şirkətinin təkidi ilə sökülməli olan ev bu şirkətin köçmüş qonşudan aldığı evə əlavə kimi “qanunsuz tikili” adlandırılıb. Emil izah edib ki, əslində onların evi qonşu evdən 5-6 metr məsafədədir, əlavə ola bilməz. Məhkəmə Mikayılovların evini qanunsuz “tikili” adlandırıb, hakim yerə baxış keçirməyib, onun məqsədi evin sökülməsini qanuniləşdirmək olub və onu tikinti şirkəti tərəfindən alınmış binaya qanunsuz əlavə tikili adlandırıb.

6 iyul 2006-cı il tarixindən sonra daşınmaz əmlak reyestrindən çıxarışdan başqa, ev sahiblərinə verilən bütün sənədlər qanunla mülkiyyət hüququnu təsdiq edən sənəd hesab edilmir.

Səbayel məhkəməsinin qətnaməsində deyilir: Bakı Şəhər İcra Hakimiyyətinin 15.04.2014-cü il tarixli 173 saylı sərəncamı ilə Qurban Abbasov küçəsi, 4 ünvanında yaşayış evinin tikintisini RahatHayatYasayısKompleksi həyata keçirir. Mübahisəli qanunsuz mənzil RahatHayatYasayısKompleksi şirkətinə məxsus olan Qurban Abbasov küçəsi, 4 ünvanındakı 2 saylı mənzilə əlavə tikilidir.

Həmin məhkəmənin başqa qərarında deyilir ki, ikinci mənzilə əlavə tikili Rahat... şirkətinə məxsusdur və buna görə də  Baladadaş Babayev, Səbinə Babayeva, Emil Mikayılovun oraya girişi qadağandır. Həmçinin onların orada yaşaması, həmin evdə tikinti aparması da qadağan edilir.

Bu iki məhkəmə qərarından irəli gələrək görünür ki, şirkət qonşuluqdakı  2 saylı evə (sakinlər çıxan kimi söküb) mülkiyyət hüququ əldə edib, Mikayılov-Babayevlərin mənzili isə bu mənzilə əlavə tikilidir və iddiaçıların bununla bağlı qanuni hüquqları yoxdur.

Lakin Emil Mikayılov Turan ilə söhbətində deyib ki, mətbəxi, vanna otağı və tualeti olan birotaqlı mənzil qonşu evdən 5-6 metr məsafədə yerləşdiyinə görə 2 saylı evə əlavə tikili olmayıb. Ev 1974-75-ci illərdə qayınatası tərəfindən tikilib, evin sənədləri yoxdur. Ancaq bu evin sakinləri elektrik enerjisi, su və qaza görə ödəniş ediblər, orada qeydiyyatda olublar, bu illər ərzində heç kim bu mənzilə iddia irəli sürməyib, nə formal olaraq, nə də reallıqda. Evi “əlavə tikili” adlandıran hakim qanunu aldadıb, mübahisəli daşınmaz əmlaka yerində məhkəmə baxışı olmayıb. “Əlavə tikili” termini Babayevlər-Mikayılovlarun evinin qanunsuz olduğunu əsaslandırmaq üçün istifadə olunub, - E.Mikayılov bildirib.

Beş gün sonra Səbayel Rayon İcra Hakimiyyətinin əməkdaşları ev sahiblərinin fikrini soruşmadan bütün əmlaklarını evdən çıxararaq qaraja yığıblar. Orada iki il ərzində mebel, çilçıraqlar və digər məişət əşyaları nəm və pasdan yararsız hala düşüb. 2018-ci ilin yanvarında isə ev tamamilə dağıdılıb.

O vaxtdan Mikayılovlar ailəsi Bakının Əhmədli qəsəbəsində kirayədə yaşayır. Mənzilə görə ayda 430 manat pul verirlər, çünki evi dağıdan şirkət onlara bir qəpik də ödəməyib və kompensasiya vermək niyyətində deyil. Səbayel Rayon Məhkəməsinin hakimi Nurəddin Bağırov bu insanların ehtiyaclarını “unudub”.

O zamandan Emil və onun həyat yoldaşı ölkə prezidentinə, birinci vitse-prezidentə və digər dövlət məmurlarına, təşkilatlara xahiş və şikayətlər göndərirlər. İki il ağır keçən müddətdə heç bir dövlət təşkilatı onlara kömək etməyib, hətta heç bir günahı olmayan ailənin problemi ilə məşğul olmağa söz verməyib. Məhkəmələr Mikayılovların işini bir instansiyadan digərinə göndərirlər.

2018-ci ilin payızında Məhkəmə-Hüquq Şurasının qərarı ilə hakim Nurəddin Bağırov digər həmkarları ilə yanaşı Səbayel rayonunda hakim postundan məhrum edilib. Lakin elə həmin il Sabirabad rayonuna hakim təyin edilib.

Mikayılovun azyaşlı oğlu Azərbaycan vətəndaşıdır. O böyüyüncə ölkə onu hərbi xidmətə çağıracaq, bütün ömrü boyu ondan vergi tutacaq. Ancaq bu dövlət vətəndaşların mənzil hüququ ilə bağlı Konstitusiyanın 43-cü maddəsini yerinə yetirmir. Bundan əlavə, dövlət məhkəməsi bu adamları ona görə evsiz qoyub ki, onlar “kupça” rəsmiləşdirməyiblər. RahatHayatYasayisKompleksi şirkətinin kommersiya maraqları Azərbaycan vətəndaşlarının ailələrinin taleyini və konstitusiya hüququnu üstələyir.

Oxşar hüquqi kolliziya 2019-cu ildə Nəsimi rayonunda Abbas Səhhət küçəsindəki mənzillərin sahibləri ilə GloriaPalace MMC tikinti şirkəti arasında olmuşdu. O zaman iddiaçılar Nəsimi Rayon Məhkəməsinin qərarını ləğv etmək niyyəti ilə Ali Məhkəməyə qədər getdilər, lakin ali məhkəmə instansiyaları ilkin qərarı dəyişməz saxladılar.

“Bütün bunlardan belə çıxır ki, yerli icra hakimiyyəti başçılarının sərəncamları və Nazirlər Kabinetinin qərarı nə olursa olsun, bu qərarlar qanunun aliliyinə - Respublika Konstitusiyasına uyğun olmalıdır. AR Konstitusiyasında deyilir: Azərbaycan Respublikasında daşınmaz əmlak toxunulmazdır və dövlət tərəfindən qorunur. Məhkəmə qərarı olmadan heç kəs mənzildən məhrum edilə bilməz. Ancaq nəticə: Azərbaycan Ali Məhkəməsi kassasiya şikayətinə mahiyyəti üzrə baxmayıb, Apellyasiya Məhkəməsinin qanunların təfsirinin düzgünlüyünə dair qərarını yoxlamayıb, məhkəmələrimiz korrupsiyalaşıb və vətəndaşların hüquqlarını müdafiə etmirlər. Mülkiyyət hüquqları kobud şəkildə pozulur”, - Azərbaycanda daşınmaz əmlak haqqında qanunvericilik sahəsində ekspert Y. Sapunkov hesab edir.

Eyni zamanda Azərbaycanda evlərin və mənzillərin sahiblərinin bu daşınmaz əmlaka mülkiyyət hüququ haqda reyestrdən çıxarışları olmadan evlərin sökülməsi zamanı dövlətdən və tikinti şirkətlərindən qanuni sahiblərə verildiyi kimi eyni kompensasiya aldıqları ilə bağlı hallar da çoxdur. Elektrik ötürücü xəttlərinin altında, neft obyektlərinin və digər dövlət strateji qurğularının yaxınlığında qanunsuz evlər tikən vətəndaşlarla da belə olub. Yəni, əgər  hakimin vətəndaşın konstitusion hüququnu müdafiə etmək istəyi olsaydı, bunu edə bilərdi, iki uşağı olan ailəni evsiz-eşiksiz qoymazdı. Həmin adamları hələ də xilas etmək olar, dövlət (prokurorluq) müdaxilə edə bilər, Səbayel məhkəməsinin qərarından etiraz edə bilər və tikinti şirkətini son pullarını ödəyərək özgə mənzillərində yaşamaması üçün ailəyə lazımi  miqdarda pul ödəməyə məcbur edə bilər.

Hakim Nurəddin Bağırovun karyera irəliləyişi haqda məlumatların mənbələri:

https://www.turan.az/ext/news/2018/10/free/Social/ru/75681.htm

https://courts.gov.az/ru/sabirabad/judge/Bagirov-Nuraddin-Abuzer-oglu_296