Ekspertlər hökumətin korrupsiyaya qarşı mübarizə tədbirləri haqqında

Azərbaycan hökuməti birinci dəfə deyil ki, korrupsiyaya qarşı mübarizə planlarını açıqlayır və proqram sənədləri qəbul edir. 2011-ci ilin başlanğıcında hakimiyyət “korrupsiyaya qarşı amansız müharibə” elan etmişdi, amma hər şey məişət səviyyəsində cüzi rüşvətə qarşı mübarizə ilə nəticələndi. Bu fikri Turan-ın müxbiri ilə söhbətində “İqtisadi təşəbbüslərə yardım” QHT-nin rəhbəri Azər Mehdiyev prezidentin təsdiq etdiyi 2012-2015-ci illər üçün korrupsiyaya qarşı mübarizə üzrə milli fəaliyyət planını və Açıq Hökumətin təşviqi üzrə milli planı şərh edərkən bildirib. 

Onun fikrincə, sözügedən sənədlərin qəbulu ölkənin beynəlxalq öhdəliklərindən irəli gəlir və hökumət bu barədə hesabat verməlidir.

Xüsusən Açıq Hökumət ideyası ABŞ prezidenti Barak Obamanın dəstəklədiyi beynəlxalq təşəbbüsdür. Azərbaycan hakimiyyəti artıq bu təşəbbüsə qoşulduğunu bildirib və bunu əməldə göstərməlidir.

Lakin Azərbaycan hakimiyyətinin addımları göstəriş xarakteri daşıyır, real mübarizə üçün isə problemin səbəbləri aradan qaldırılmalıdır, deyə o bildirib. Korrupsiya Azərbaycanın dövlət-hüquqi sisteminin özündən irəli gəlir, hakimiyyət real olaraq icra, qanunverici və məhkəmə hakimiyyətinə bölünməyib. “Bundan başqa, Azərbaycanda iqtisadi və siyasi hakimiyyət eyni əllərdə - məmurların oliqarx qruplarının əlində cəmlənib. Bu qayda aradan qaldırılmadan və iqtisadi azadlıqlar təmin edilmədən korrupsiyaya qalib gəlmək olmaz”, deyə Mehdiyev bildirib.

Öz növbəsində, QHT-lərin Korrupsiyaya qarşı mübarizə şəbəkəsinin rəhbəri, “Konstitusiya” araşdırmalar fondunun prezidenti Əliməmməd Nuriyev qəbul edilmiş sənədləri müsbət qiymətləndirib. Onun sözlərinə görə, vətəndaş cəmiyyəti institutlarının bir çox təklifləri nəzərə alınıb.

Korrupsiyaya qarşı mübarizə üzrə əvvəlki iki milli fəaliyyət planından fərqli olaraq, hazırki sənəddə gözlənilən nəticələr və məsul qurumlar göstərilib, bundan başqa, plan vətəndaş cəmiyyəti ilə əməkdaşıq və QHT-lər tərəfindən monitorinqlərin həyata keçirilməsini nəzərdə tutur.

Nuriyev müsbət məqamlar arasında hakimlərin toxunulmazlıq hüququnun məhdudlaşdırılmasını, korrupsiya faktları haqqında xəbər verən şəxslərin məsuliyyətdən azad edilməsi, istintaqla sövdələşməyə girənlərin cəzalarının yüngülləşdirilməsi və s. məqamları müsbət qiymətləndirib. “Bütün bunlar beynəlxalq təcrübədə var və bu təcrübənin bizdə də mənimsənməsi sevindirici haldır”, deyə Nuriyev bildirib.

O, həmçinin elektron xidmətlər sahəsinin genişləndirilməsini, dövlət qurumlarının fəaliyyətinin şəffaflığının artırılmasını müsbət qiymətləndirib.

Nuriyev Xidmətlər və Sosial İnnovasiyalar üzrə Dövlət Agentliyinin yaradılmasını mühüm yenilik adlandırıb. Agentlik nəzdində 24 xidmət növü göstərən “asan xidmət” mərkəzləri olacaq. Vətəndaşlar bir mərkəzdən eyni zamanda fərqli xidmətlər ala biləcəklər. -06C-