Elektron xidmətlər və elektron hökumət infrastrukturunun monitorinqinin nəticələri təqdim edilib

Bu gün “Şəffaflıq Azərbaycan” Korrupsiyaya Qarşı Mübarizə İctimai Birliyi Azərbaycanda keçirdiyi elektron xidmətlər və elektron hökumət infrastrukturunun monitorinqinin nəticələrini Beynəlxalq Mətbuat Mərkəzində ictimaiyyətə təqdim edib. Təqdimat mərasimində çoxsaylı hökumət qurumları, vətəndaş cəmiyyəti nümayəndələri iştirak edib.

2014-cü il dekabrın 1-dək Azərbaycanda 42 dövlət orqanı 449 elektron xidmət təqdim etməlidir.

Hesabatlda vətəndaş və biznes sektoru üçün əhəmiyyət kəsb edən 30 elektorn xidmətin monitorinqi  əksini tapıb. Monitorinq nəticəsində məlum olub ki, 30 elektron xidmətdən 14-ü (47%) onlayn şəkildə istifadəçiyə çatır, 6-sı (20%) elektorn müraciət mərhələsinə kimi elektronlaşıb, 10-u (33%) isə informasiya mərhələsindədir və ya ümumiyyətlə elektron mühitdə təmsil olunmur. “İnformasiya mərhələsində olan xidmətlərin əksəriyyəti sosial istiqamətli elektron xidmətlərdir. Halbuki biznes sektoru ilə bağlı elektron xidmətlər nisbətən yaxşı inkişaf edib”, deyə “Şəffaflıq Azərbaycan” Korrupsiyaya Qarşı Mübarizə İctimai Birliyinin layihə koordinatoru Məhəmməd Muradov bildirib.

Monitorinqin problemlər və tövsiyələr hissəsində deyilir ki, elektron xidmətlərin inkişafı ilə bağlı strateji, konseptual plan hələ də tam formalaşdırılmayıb. “Elktron xidmətlərin maliyyə təminatı sahəsində qeyri-müəyyənlik, informasiya sistemləri və ehtiyatların inkişafında, informasiya sistemlərinin məlumat mübadiləsində baryerlər qalmaqdadır”.

Muradov bildirib ki, vətəndaşların qeydiyyatı (pasport, şəxsiyyət vəsiqələrini dəyişmək, sürücülük vəsiqəsi əldə etmək, avtomobil nömrələrini onlayn sifariş vermək, qeydiyyatda olan vətəndaşlıq vəziyyəti sənədlərini əldə etmək), eləcə də sosial yönümlü elektron xidmətlərin inkişafı vətəndaşların həyatını daha da asanlaşdıra bilər. “Elektron Gömrük bəyannaməsinin tətbiqi, biznes lisenziyalarının elektronlaşdırılması, dövlət satınalmaları sahəsində elektron xidmətlərin inkişafı biznes mühitinin inkişafı üçün önəmli olardı”, deyə o qeyd edib.

Bununla yanaşı, ekspertlər elektron xidmətlər sahəsində irəliləyişlərə təkan vermək üçün xidmətlərin fəlsəfəsində dəyişikliklərin olmasını vacib sayır. “Burada vətəndaşlara xidmətdən danışılır. Amma xidmətlərin necə edilməsi, vətəndaşlara cavab verilməsi ilə bağlı da monitorinqə böyük ehtiyac var. Məmurların vətəndaşlara necə xidmət etməsi bu monitorinqdə əksini tapmalıdır”, deyə müstəqil hüquqşünas Ələsgər Məmmədli qeyd edib.

Korrupsiyaya Qarşı Mübarizə Fondunun icraçı direktoru Vasif Mövsümov bildirib ki, vətəndaşların müraciətlərinə operativ baxılmasında problemlər mövcuddur. “Elə müraciətlər var ki, dərhal baxılmalıdır. Müraciətlərə vaxtında baxılıb tədbir görülməməsi vətəndaşlar üçün problemlər yaradır. Əmək müqavilələrinin bağlanması müsbət addımdır. Bəzən əmək müfəttişləri lazımsız tələblər edir. Biz QHT olaraq nazirliyin daxili nəzaərət qurumuna bununla bağlı şikayət edə bilmirik”, deyə o qeyd edib. -03C-