Elina Hacıyevanın anası məhkəməni Sevinc Abbasovaya ağır cəza verməyə çağırıb

Bakı/18.10.19/Turan: Bu gün Bakının 162 saylı məktəbinin 8-ci sinif şagirdi Elina Hacıyevanın ölümü ilə bağlı iş üzrə məhkəmə prosesində zərərçəkmiş tərəfin vəkillərin yekun nitqlə çıxış ediblər.

Səbail rayon məhkəməsində bugünki iclasda zərərçəkmiş tərəfin vəkilləri prokurorun təqsirləndirilən şəxs, məktəbin keçmiş direktoru Sevinc Abbasovanın 2,5 il azadlığın məhdudlaşdırılması cəzasına məhkum edilməsi təklifi ilə razı olmadıqlarını bildiriblər. Vəkillər qeyd ediblər ki, məktəb direktoru yeniyetmənin kritik vəziyyətdə olmasına baxmayaraq, saat yarım ərzində "təcili yardım" çağırmayıb və başqalarının bunu etməsinə imkan verməyib.

Vəkillər həmçinin Səhiyyə Nazirliyindən mənəvi ziyana görə təzminat kimi 100 min manat və vəkil xidmətlərinə görə 8500 manat tələb edən zərərçəkmiş tərəfin mülki iddiasını dəstəkləyiblər.

Səhiyyə Nazirliyinin nümayəndəsi bu idarəyə qarşı iddianın əsassız olduğunu bildirib.

Elinanın anası Sevil Hüseynova məhkəmədən direktora onun ittiham olunduğu maddələrdə nəzərdə tutulan ən ağır cəzanı verməyi xahiş edib. Məhkəmə prosesi oktyabrın 24-də saat 11:00-da davam edəcək.

* 2019-cu il aprelin 4-də 162 nömrəli məktəbin şagirdi, 2004-cü il təvəllüdlü Elina Hacıyeva məktəbin üçüncü mərtəbəsindən özünü atıb. Faktla bağlı Bakı şəhər Prokurorluğunda CM-in 125-ci (özünü öldürmə həddinə çatdırma) maddəsi ilə cinayət işi açılıb.

Sonradan məktəbin direktoru Abbasova iş üzrə məsuliyyətə cəlb edilib. Ona qarşı CM-in 143 və 314.2-ci maddələri ilə ittiham irəli sürülüb. Amma 125-ci maddə ilə heç kim məsuliyyətə cəlb edilməyib. -21B-