Elmar Şaxtaxtinski: Amerika-Azərbaycan münasibətlərində miflər təhlükəlidir

“Demokratiya uğrunda Amerika Azərbaycanlıları” (AZAD) təşkilatının rəhbəri Elmar Şaxtaxtinski “Azadlıq” qəzetinə müsahibəsində rəsmi Bakının antiqərb ritorikasına və ikitərəfli əlaqələrə münasibət bildirib.

Azərbaycan və ABŞ arasında münasibətlər bir çox miflər əsasında qurulub. Bu miflər həm Bakı, həm də Vaşinqtonda müəyyən dairələr tərəfindən yaradılıb. Ən böyük mif Azərbaycanın Amerika üçün strateji əhəmiyyəti ilə bağlıdır, deyə Şaxtaxtinski bildirib.

ABŞ-ın strateji müttəfiqləri böyük dövlətlər – Türkiyə, Avropa ölkələri, Yaponiya, Misir, Səudiyyə Ərəbistanı, Pakistan və s.-dir. Bu ölkələrin hər biri real gücə, böyük əhaliyə, hərbi iqtisadi gücə malikdir.

Azərbaycanda bütün bunlar yoxdur, buna görə ABŞ və Azərbaycan arasında strateji tərəfdaşlıq haqqında danışmaq olmaz.

Lakin rəsmi Bakının ABŞ-ın onu hər şeydə dəstəklədiyi, buna görə insan hüquqlarının pozulmasına göz yumduğu haqqında iddia formalaşıb.

Lakin Azərbaycan həqiqətən çətin vəziyyətə düşərsə, çətin ki, Vaşinqton Bakıya gözlənilən köməyi etsin. Belə ki, hazırki münasibətlər pul müqabilində ölkənin Vaşinqton üçün böyük əhəmiyyəti və rolu haqqında miflər yaradan lobbiçilərin fəallığı üzərində qurulub.

Bu fonda Bakıda hakimiyyət faktiki olaraq qərbyönlü qüvvələri məhv edir, korrupsiya və oğurluqla barışan, diktaturaya meylli qruplara bel bağlayır.

Təəssüf ki, ABŞ özü bu siyasətin Amerikanın öz maraqları üçün ziyanını dərk etmir və sanki Bakının antiqərb siyasətini dəstəkləyir.

 Məhz bu fonda ABŞ dövlət katibinin köməkçisi Viktoriya Nulandın Bakıya səfəri baş tutub ki, bu, səhv addım idi.

Azərbaycan hakimiyyəti öz korrupsiyası, hüquqları israrla pozması və digər əməlləri ilə ölkənin imicini o qədər korlayıblar ki, müharibə başlayarsa, bu, Qərbin dəstəyini almaqda ciddi maneə olacaq.

Maraqlıdır ki, bu gün Vaşinqtonda Qarabağ məsələsində Azərbaycanın maraqlarını dəstəkləyən şəxslər var, lakin onlar Bakı üçün arzuolunmaz şəxslərə çevriliblər. Yalnız ona görə ki, onlar Bakını tənqid edirlər.

1992-ci ildə ABŞ Konqresi Azadlığa Dəstək Aktına 907-ci düzəlişlə Azərbaycana qarşı sanksiyalar tətbiq etdi. Bu sanksiyalar 20 ildən çoxdur ki, qüvvədədir və Bakı onların aradan qaldırılması üçün heç nə etməyib.

“Biz Vaşinqtonda deyirik ki, öz torpaqlarını qoruyan Azərbaycan xalqına qarşı sanksiyalar tətbiq etməkdənsə, qoy ABŞ hökuməti xalqın hüquqlarını pozan hökumət üzvlərinə qarşı sanksiyalar tətbiq etsin”, deyə o qeyd edib.

Əksinə olmalıdır: Qarabağa görə sanksiyalar ləğv edilməli və ən yuxarılardan başlayaraq, məmurlara qarşı sanksiyalar tətbiq edilməlidir.

ABŞ-ın yeni səfiri, öz sələfindən fərqli olaraq, fəaiyyətinə Şəhidlər Xiyabanının ziyarəti ilə başlayıb və hələ ki, sələfi kimi Heydər Əliyevin abidəsi önündə görünməyib. Görünür, vətəndaş cəmiyyətinin bu məsələ ilə bağlı tənqidi Vaşinqtonda eşidilib.

Bu, bir daha sübut edir ki, vətəndaş cəmiyyətindən və xalqdan çox şey asılıdır, deyə Şaxtaxtinski qeyd edib. -25B-