Elxan Şahinoğlu: �Paşinyan Sarqsyan və Köçəryandan daha çox separatçıdır�

"Azərbaycan demokratik islahatlara gedərək Qafqazda ən liberal ölkə olsa belə, ermənilər Qarabağa ərazi iddialarından imtina etməyəcəklər və Yerevanın tərəfdarları öz müttəfiqlərinin maraqlarını müdafiə etməyi dayandırmayacaqlar", - "Atlas" Analitik Araşdırmalar Mərkəzinin rəhbəri Elxan Şahinoğlu bu gün "Avrasiya" Beynəlxalq Mətbuat Fondunda keçirilən mətbuat konfransında bildirib.

O, azərbaycanlıların tələb etdiyi səviyyədə demokratiyanı təmin etməyən rəsmi Bakının Qarabağ ermənilərinin təhlükəsizliyilə bağlı məsuliyyəti öz üzərinə götürə bilməməsini Turan-ın redaktoru Şahin Hacıyevə söyləyən yerevanlı siyasətçinin fikirləri barədə sualın cavabında deyib.

"Paşinyan özünü sülhə və Azərbaycan-Ermənistan münaqişəsinin qarşılıqlı faydalı həllinə tərəfdar kimi göstərərək Azərbaycanı aldatdı. Çoxumuz düşünürdük ki, elə indi də belə hesab edənlər var ki, Paşinyan sülhməramlıdır, Levon Ter-Petrosyanın məlum ideyalarının davamçısıdır. Ancaq baş nazir olan Nikol əslində prezidentlər Köçəryan və Sarqsyandan da böyük separatçı imiş. Hətta Ermənistan Milli Məclisinin deputatı olarkən Dağlıq Qarabağın Azərbaycana qaytarılmasının tərəfdarı olan Georgi Vanyanla tanışlığına son qoydu, halbuki, doxsanıncı illərdən onun ideologiyasını bölüşüb", - politoloq bildirib. E.Şahinoğlu Azərbaycanda Nikol Paşinyana belə qiymət verən ilk politoloqdur.

O, ATƏT-in Minsk Qrupunun tərkibindən, xüsusilə ATƏT-in hazırki sədrinin şəxsi nümayəndəsi Anjey Kasprşikin fəaliyyətindən narazı olduğunu bildirib.

Danışıqlar prosesinin yubadılmasının yeni mərhələsi Madrid prinsiplərinin reallaşmasının təfərrüatlarının açıqlanması barədə Paşinyanın təklifinin ATƏT-in Minsk Qrupu tərəfindən icrası ola bilər. Açıqlamalarla proses yubanacaq, "ərazi müqabilində sülh" ideyasını isə Paşinyan prinsipial olaraq qəbul etmir", - E.Şahinoğlu hesab edir.

Eyni zamanda Paşinyan Qarabağ mövzusunu prezident İlham Əliyevlə müzakirə etməkdən qorxur, iki dəfə - Düşənbə və Davos görüşlərində bu müzakirələrdən yayınıb. Nikol İnternetdə tvit yerləşdirərək İ.Əliyevlə danışıq aparmaqdan imtina etdiyini bildirib.

Politoloq Qarabağ azərbaycanlılarının icmasının və icmanın yeni lideri diplomat Tural Gəncəliyevin passivliyindən narazılığını bildirib. Belə ki, o, təşəbbüskarlıqda qanunsuz Qarabağ rejiminin rəhbəri, ATƏT-in Minsk Qrupunun üç həmsədr ölkəsinə səyahət edən Bako Saakyana uduzur. Çox güman ki, həmin səfərlərdə erməni tərəfinin təklifləri müzakirə olunub.

"Gəncəliyev Qarabağ azərbaycanlılarından ibarət nümayəndə heyətilə (7-8 nəfər) Qarabağ prosesində əhəmiyyət daşıyan dövlətlərin paytaxtlarına səfər etməlidir, ölkə hökumətlərini bizim tərəfə çəkməlidir. Paşinyan Qarabağ probleminə görə öz üzərinə məsuliyyət götürmək istəmir, hətta onun həllini istəmir. Bunlar hansı dövlətlər ola bilər? ABŞ Obamanın dövründən başlayaraq, xüsusilə də Trampın vaxtında Qarabağ prosesindən uzaqlaşdı. Birmənalı olaraq bizim tərəfimizi Türkiyə, Səudiyyə Ərəbistanı və Pakistan tutur. İran özünü Qarabağ şiələrinin hüquqlarının müdafiəçisi kimi qələmə verir, ancaq Ermənistanla alver edir. Rusiya Dağlıq Qarabağ problemindən Azərbaycan üçün qarmaq kimi istifadə edir və Türkiyənin nizamlanmaya müdaxiləsinə imkan vermir. Söhbət zamanı problemin həllinin vacibliyini söyləyən Ərdoğana Putin deyib ki, Qarabağ düyünü "çox mürəkkəbdir", yəni, işarə edib ki, Rusiya məsələni həll etmək niyyətində deyil. Bu il Azərbaycanın Rusiya silahını almadığını anlayan Moskva ölkəmizə təzyiq göstərməyə başlayıb, rusiyalı ermənilərin Azərbaycana səfərinə qadağa məsələsini qaldırıb", - politoloq deyib. E.Şahinoğlu Moskvanın RF vətəndaşları olan ermənilərin Azərbaycan sərhəddini keçməsinə icazə verilməsi tələbini qanunsuz və bizim ölkə üçün təhlükəli adlandırıb. O xatırladıb ki, RF vətəndaşı olan azərbaycanlılar Rusiyaya getmirlər.

E.Şahinoğlu Ermənistan ordusunun müdafiə doktrinasından hücuma keçməyə hazır olması barədə bu ölkənin müdafiə naziri Tonoyanın bu yaxınlardakı fikrini ermənilərin Qarabağ ritorikasında yeni səhifə hesab etmir. "Hələ Tonoyanın sələfi vəd etmişdi ki, Azərbaycan tərəfdən fəal hərbi hərəkətlərin olduğu halda Mingəçevir HES-ə zərbə endiriləcək", - E.Şahinoğlu qeyd edib.

Müharibənin mümkünlüyü barədə danışarkən politoloq şübhə etdiyini bildirib ki, əgər Azərbaycan ordusu döyüşlər zamanı hansısa ərazini qaytararsa, hətta böyük əraziləri bu, Yerevanı Azərbaycanı qane edən sülh müaviləsini imzalamağa məcbur edəcək. Məlum olduğu kimi, 2016-cı ilin aprel döyüşlərində lokal qələbə və 2018-ci ildə bizim ordunun Naxçıvan istiqamətində yerləşdirilməsi Azərbaycana ərazi əldə etməkdən başqa bir şey vermədi. Rusiya Qafqazda qeyri-sabitlik faktoru olaraq qalır, erməni təcavüzkarı müdafiə edir və Azərbaycana ərazilərini azad etmək üçün müharibə etməyə və ya antiterror əməliyyatı (necə istəsən adlandırmaq olar) keçirməyə imkan vermir. Moskva Qarabağda genişmiqyaslı hərbi əməliyyatlara qarşıdır. Ötən il müdafiə naziri Zakir Həsənov bildirmişdi ki, hərbi əməliyyatların sonuncu günü RF müdafiə naziri S.Şoyqu ona telefon edərək atəşin dayandırılmasını xahiş etmişdi.

"Bu dialoqun əslində necə olduğu - xahiş edib, yoxsa tələb edib, bizə məlum deyil, ancaq Rusiya Ermənistana tərəf olub", - politoloq əlavə edib.

Aprel hadisələrinin (2016-cı il) yekunlarına görə, ermənilərin tərəfini ancaq Rusiya tutub. Ötən ilin mayında isə Azərbaycan qoşunlarını Naxçıvana yerləşdirməklə Ermənistana yaxınlaşırkən heç bir ölkə Yerevanın tərəfində olmadı", - E.Şahinoğlu deyib.

KTMT ermənilərin ekspansionist səylərinin müdafiəçisi ola bilməz, belə ki, bu təşkilat bir tərəfdən türk dövlətlərinə, digər tərəfdən Ermənistan və Rusiyaya bölünüb. KTMT-nin beşinci üzvü Belarus Azərbaycanın mövqeyini dəstəkləyir. Ermənilər Tovuz-Qazax istiqamətində Azərbaycanla müharibəyə təhrik edərək KTMT-ni öz ölkələrinin ərazi bütövlüyünün müdafiəsinə sövq etməyə cəhd edirlər, ancaq alınmır", - E.Şahinoğlu bildirib.

Yeni hərbi hərəkətlərin mümkünlüyünə qayıdan E.Şahinoğlu əvvəla istənilən günün yeni müharibədə ilk gün olduğunu istisna etməyib və xatırladıb ki, "2016-cı ilin apreli" başlayanda İ.Əliyev ABŞ-da səfərdə idi.

E.Şahinoğlu 2019-cu ilin yayını Ermənistanda sosial-iqtisadi gərginlik dövrü kimi proqnozlaşdırır, o vaxta qədər erməni xalqı Paşinyanın vədlərinin həyata keçməsini gözləməkdən yorulacaq. Bu, növbəti lokal hərbi əməliyyatın keçirilməsi üçün münasib vaxt olacaq", - politoloq hesab edir.

E.Şahinoğlu dövlət tərəfindən yaradılan və prezident İ.Əliyevi Qarabağ və digər proseslər barədə analitik arayışlarla təmin etməli olan analitik mərkəzlərin fəaliyyətinin effektivliyinin yetərsiz olduğunu hesab edir. Politoloqun fikrıncə, yaradılan iki Mərkəz prezident tərəfindən bağlanmış Strateji Araşdırmalar Mərkəzinin uğursuz işini davam etdirəcək. Müstəqil politoloqlar ilə əməkdaşlıq etmək istəməyən qurum sonda məmurların fəaliyyətsizlik məkanına çevrilmişdi.