Gürcüstan marixuanadan istifadəni dekriminallaşdırıb. Azərbaycan düşünür...

Gürcüstanın Konstitusiya Məhkəməsi noyabrın 30-da marixuanadan (çətənə bitkisindən hazırlanır) istifadə dekriminallaşdırılıb. Qonşu ölkədə çətənədən və marixuanadan istifadə artıq cinayət hesab olunmayacaq və "şəxsi istifadə və ya həkim təyinatı olmadan qanunsuz istifadə üçün qanunsuz olaraq kiçik həcmdə narkotik vasitələrin, onların analoqlarının və ya prekursorların hazırlanması, əldə olunması, saxlanması" maddəsi ona şamil olunmayacaq.

Gürcüstanlı jurnalist və bloger Tengi Ablotiya Turan-a müsahibəsində izah edib ki, ölkəsində narkotiklərin leqallaşdırılmasına başlandığını iddia edənlər haqsızdırlar. "Bu, sadəcə olaraq cinayət məsuliyyətindən azadetmədir. Bizdə marixuana çəkməyə görə 5 ilədək həbs edirdilər. İndi sadəcə olaraq həbs etməyəcəklər. Böyük inzibati cərimələr tətbiq edilir. Satışı və yayılması isə yenə də qadağandır. Gürcüstanda narkotik qanunvericiliyi həddindən artıq sərt idi. Marixuanadan başqa, indi də elədir - bütün digər narkotiklərə görə beş illik həbs cəzası almaq olar və bu məsələ ümumiyyətlə müzakirə olunmur. Saakaşvilinin zamanında narkotikdən istifadəyə görə 6000-ə yaxın insan həbsdə idi. İndi onların sayı azdır, amma yenə də var, həm də indiki hakimiyyət dövründə həbs olunanlardır. Odur ki, burada bu məsələ çox sərtdir", deyə T.Ablotiya əlavə edib.

Marixuanadan istifadəyə görə cinayət məsuliyyətinin ləğvi leqallaşdırılma demək deyil, deyə Gürcüstan parlamentinin deputatı Georgi Kaxiani bildirib. Kaxianinin sözlərinə görə, dekriminallaşdırma yalnız cinayət məsuliyyətindən azad edir, amma inzibati məsuliyyət qalır və bunların bir-biri ilə əlaqəsi yoxdur. "Bu və ya digər tənzimləmə dekriminallaşdırıla bilər, amma bu, o demək deyil ki, onunla bağlı məsuliyyət olmayacaq. Bu, cinayət məsuliyyəti olmaya bilər ki, dekriminallaşdırma da bunu nəzərdə tutur, amma inzibati-hüquqi məsuliyyət ola bilər".

Gürcüstan AM-nin qərarının həyata keçirilməsi Azərbaycanlıların narkotikdən istifadəsinə təsir edəcəkmi? Axı 2017-ci ilin yanvar-sentyabr aylarında Azərbaycandan Gürcüstana 151 min nəfərdən çox insan gedib, bu da ötən ilki göstəricilərdən 15,6% çoxdur. Azərbaycanlılar kazinoda oynamaq, ucuz Gürcüstan aviareysləri ilə üçüncü ölkələrə getmək, daha ucuz mal və xidmət əldə etmək üçün qonşu ölkəyə gedirlər. Görəsən, bundan sonra vətəndaşlarımız, almanların Niderlanda getdikləri kimi, Gürcüstana narkotik turları həyata keçirməyəcəklər ki?

Turan-ın bu sualına Azərbaycanın dövlət təşkilatlarından birinin əməkdaşı cavab verib, ölkəmiz üçün təhlükə olmadığını bildirib, belə ki, respublikanın sərhədindən qanunsuz narkotik keçirilməsinin qarşısı gömrükçülər tərəfindən alınır. Dövlət qurumunda Gürcüstan AM-nin qərarını araşdırıblar və qonşu ölkədə narkotik cinayətləri ilə bağlı vəziyyətin çox dəyişəcəyini hesab etmirlər. Telefonla sualları cavablandıran əməkdaş israrla Turan-ın təşkilatın adını açıqlamamasını xahiş edib və öz adını deməkdən imtina edib.

Azərbaycanda Nazirlər Kabinetinin 12 oktyabr 2000-ci il tarixli "Şəxsi istifadə üçün nəzərdə tutulmuş narkotik vasitələrdən və psixotrop maddələrdən istifadə miqdarı haqqında" qərarında göstərilmiş həcmdən artıq narkotikdən və psixotrop vasitələrdən istifadəyə görə 2 ayadək həbs şəklində inzibati cəza və ya pul cəriməsi, yaxud narkoloji dispanserdə məcburi müalicə tətbiq edilə bilər. Bu tədbirlər ictimai asayişi pozan narkomanlara qarşı tətbiq olunur.

Qərarda 30 narkotik vasitə və 30 psixotrop maddə göstərilir. Kokain üçün maksimum gündəlik istifadə miqdarı 30 mq-a qədər müəyyən edilib.

Şəxsi istifadə üçün nəzərdə tutulmuş narkotik maddələrdən istifadə edən vətəndaşlara qarşı inzibati təsir tədbirləri AR "Narkotik vasitələrin, psixotrop maddələrin və onların prekursorlarının dövriyyəsi haqqında" qanununda nəzərdə tutulur.

Azərbaycanda bəzi insanlar qanunda göstərilən tədbirlərin həddindən artıq sərt olduğunu hesab edir. 6 mart 2016-cı il tarixində Milli Məclisin sessiyasında çıxış edən deputat Qüdrət Həsənquliyev ölkədə yüngül narkotiklərdən, xüsusən marixuanadan istifadəni leqallaşdırmağı təklif edib. "Narkotiklərin satışı, daşınması faktı varsa, buna görə cinayət məsuliyyətinə cəlb etmək lazımdır, - deyə Həsənquliyev bildirib. - Amma narkotik şəxsi istifadə üçün nəzərdə tutulubsa, belə insanları cinayət məsuliyyətinə cəlb etməyə son qoymaq lazımdır".

"Sirr deyil ki, ölkələrin əksəriyyətində həbsxanalara salınanlar narkomanlardır, - deyə deputat bildirib. Həbsxanaları narkomanlarla doldurmaq mənasızdır, dövlət onları saxlamaq üçün böyük vəsait xərcləyir. Bu insanları məcburi müalicəyə göndərmək lazımdır". Dünyanın bir sıra ölkələrində isə yüngül narkotiklərdən, məsələn, marixuanadan istifadəyə icazə verilib, deyə Həsənquliyev xatırladıb. Azərbaycan da bu ölkələri nümunə götürməlidir.

BƏƏ-də istənilən narkotikdən istifadəyə görə dövlət ölümlə cəzalandıra bilər.

Kamal Əli