İcra başçısının müavini məhkəmə qərarının icrasına maneçilikdə ittiham edildi

İmişli rayon Yeni Allahmədətli kənd sakini Rafael Məmmədov qardaşı Vahid Məmmədov və ailəsinin rayon icra hakimiyyətinin haqsızlığına düçar olması ilə bağlı çərşənbə günü RATİ-də mətbuat konfransı keçirib.

2010-cu ilin may daşqınları ilə bağlı Hacımustafalı kəndi indi Yeni Allahmədətli adlanan əraziyə köçürülüb. Yeni ərazidə kənd sakinlərinə evlər tikilib. 2010-cu ilin noyabrında evlər paylanılarkən məlum olur ki, V.Məmmədovun ailəsinə ev tikilməyib. 2011-ci ilin yanvarında V.Məmmədov məsələnin araşdırılması ilə bağlı rayon Fövqəladə Hallar Komissiyasının sədri Səfa Ağayevə müraciət edir. Daha sonra rayon prokurorluğuna müraciət edilir. Rayon prokurorluğunun araşdırması nəticəsində məlum olur ki, V.Məmmədovun ailəsi üçün tikilən ev bu kəndin sakini olmayan Murtuz Məmmədovun adına tikilib. 

Bundan sonra S.Ağayev rayon məhkəməsinə M.Mahmudova məxsus evin açarlarının alınaraq rayon icra hakimiyyətinə verilməsi iddiası ilə müraciət edib. Amma məhkəmə prosesində hakim rayon icra hakimiyyətinin iddiasını təmin etməyib. V.Məmmədov ailəsi bu məsələdə üçüncü maraqlı tərəf olaraq rayon məhkəməsinin qərarından Şirvan Apellyasiya Məhkəməsinə şikayət verib. Apellyasiya Məhkəməsi V.Məmmədovu haqlı sayaraq, M.Mahmudov barəsində evin açarlarının icra hakimiyyətinə təhvil verilməsi qərarı çıxarıb. Daha sona V.Məmmədov Ali Məhkəməyə müraciət edir. Ali Məhkəmə V.Məmmədovu haqlı sayaraq, qərar verir və işi icraya yönəldir. 

Amma icra dayandırılır. Məlum olur ki, qərarın icrasına başqa şəxs yox, elə rayon fövəqladə hallar komissiyasının rəhrəbi S.Ağayev özü imkan vermir. T.Məmmədovun fikrincə, belə münasibət tərəflər arasında hansısa sövdələşmənin olmasından xəbər verir. Onun sözlərinə görə, qardaşının evi M.Mahmudova təsadüfi səhv nəticəsində yox, belə sövdələşmə nəticəsində bilərəkdən verilib. “Əgər belə deyilsə, əvvəlcə məhkəməyə müraciət edən S.Ağayev məhkəmə qərar verdikdən sonra niyə onun icrasına mane olur?”, - deyə S.Ağayevin mövqeyinə toxunub.

R.Məmmədov qeyd edib ki, qardaşı V.Məmmədov səhər icra başçısı Vilyam Hacıyevin qəbulunda olanda icra başçısı evin boşaldılaraq V.Məmmədova verilməsini təmin etmək tapşırığı verir, günortadan sonra icranın dayandırılmasını tələb edir. 

Son olaraq T.Məmmədov mətbuat vasitəsilə dövlət başçısı İlham Əliyevə və evlərin tikintisinə cavabdeh olan fövqəladə hallar naziri Kəmaləddin Heydərova müraciət edərək, pozulan mülkiyyət hüquqlarının aradan qaldırılmasına yardımçı olmalarını istəyib. -05C-