İctimai ədəb etiketlərinə nə qədər bələdik?

“Demokratiya və İnsan Haqları komitəsi” ictimai birliyi “Milli-mənəvi dəyərlər və ictimai davranış qaydaları haqqında təbliğat tədbirlərin təşkili” layihəsinin icrasına başlayıb.

Birlik çərşənbə günü milli-dəyərlərin təbliği formatında ilk dəyirmi masanı keçirib. Qloballaşma şəraitində milli-mənəvi dəyərlərin qorunması, gələcək nəsillərə ötürülməsi məsələsi ətrafında müzakirə gedib. Sovet dönəmində rejim dünyaya qapalı olduğu üçün milli-mənəvi dəyərləri qorumağın daha asan olduğu iddia edilib. Amma XX əsrin 90-cı illərindən sonra sovet rejiminin dağılması, dünyaya açıq dövlətlərin yaranması ilə milli-mənəvi dəyərlərin qorunması sahəsində problemlər yarandı və indi də davam edir. Müzakirələrdə milli-mənəvi dəyərlərin müdafiəsi sahəsində problem yaranması insanların maddi rifahlarını ön plana çıxarmaları, milli-mənəvi dəyərlərin qorunmasını arxa plana keçirmələrilə əlaqləndirilib. Natiqlərin fikrincə, fərdlərin “yaşamaq uğrunda” mübarizələri hər cür dəyəri və o cümlədən milli-mənəvi dəyərləri “dəyər”dən salıb. Yenə də natiqlərə görə, artıq elə zaman gəlib ki, bu sahəni boş buraxmaq olmaz və bu sahədə təbliği önə keçirmək zərurəti yaranıb.

Tədbirə qatılan gənclərin təmsilçiləri milli-mənəvi dəyərləri qorumağı vacib saysalar da, müasir dünyanın öz tələbləri olduğunu xatırladaraq, həmin tələblərlə ayaqlaşmağı da arxa plana keçirməmək zərurətini xatırladıblar. Onların firkincə, təkcə milli mənəvi dəyərlərə “sədaqət”lə dünyada yer qazanmaq olmaz. Buna görə də gənclər “dünyanın bizdən nə istəməsi və bizim dünayadan nə istəməyimiz” sualına düzgün cavab verməyi ön plana çıxarıblar.

Daha sonra məişət etiketləri və onlara əməl edilməsi mövzusu müzakirə obyekti olub. Bu mövzuda etiket standartları, onların yaranma səbəbləri, bu sahədə qadın-kişi münasibətləri, sağlamlıq, xeyirxahlıq, süfrə mədəniyyəti və süfrə arxasında davranış, ictimai nəqliyyatdan istifadə zamanı yaranan narazılıqlar və onların aradan qaldırılması kimi məsələlər barədə mövqelər açıqlanıb. Müzakirə zamanı bu etiket standartlara əməl olunması ədəbdən sayılıb. İctimai nəqliyyatda həm hərəkət, həm də sürücü-sərnişin münasibətlərinin yaxşılaşdırılmasına ciddi ehtiyac olduğu xüsusi vurğulanıb. Bununla bağlı xüsusi treninqlərin keçirilməsinin vacibliyi qeyd edilib.

Tədbirin sonunda müzakirə iştirakçıları ictimai ədəbin yüksəldilməsi baxımından belə tədbirlərin davamlı olmasına ehtiyac olduğunu bildiriblər. -05C-