İntiqam Əliyevin apellyasiya şikayəti təmin edilməyib (YENİLƏNİB)

İyulun 21-də Bakı Apellyasiya Məhkəməsi hüquq müdafiəçisi İntiqam Əliyevin həbsi ilə bağlı birinci instansiya məhkəməsinin qərarını qüvvədə saxlayıb.

“Amerikanın Səsi”nin müxbirinin məhkəmədən verdiyi məlumata görə, hüquq müdafiəçinin apellyasiya şikayəti təmin edilməyib.

Apellyasiya Məhkəməsi hesab edib ki, İntiqam Əliyevə qarşı irəli sürülən ittihamlar birinci instansiya məhkəməsində öz sübutunu tapıb.

Bugünki məhkəmə iclasına beynəlxalq təşkilataların, diplomatik missiyaların nümayəndələri, hüquq müdafiəçiləri, ictimaiyyətin təmsilçiləri qatılıb.

Hüquq müdafiəçisi məhkəmə zalındakı şüşə kameraya salınıb. O, məhkəmədə deyilənləri çox zaman eşidə bilmir, tez-tez şüşə akvariumu əlləri ilə döyəcləyərək eşidə bilmədiyini diqqətə çatdrımağa çalışır.

Məhkəmə vəkillərin Əliyev barəsində həbs qətimkan tədbirinin dəyişdirilməsi, prosesin qismən məhkəmə istintaqı ilə aparılması, Varşava Dövlət Universitetinin professorunun xətşünaslıq ekspertizasının rəyinin işə əlavə edilməsi, yeni xətşünaslıq ekspertizasının təyin edilməsi, birinci instansiya məhkəməsində İntiqam Əliyevin evindən, ofisindən götürülmüş qrant müqavilələri, qrant müqavilələrinin yerinə yetirilməsi ilə bağlı ilkin mühasibatlıq sənədlərinin qaytarılması ilə bağlı təmin edilib icra edilməmiş vəsatətlərin icra edilməsi, hüquq müdafiəçisinin şüşə kameradan çıxarılaraq vəkillərinin yanında oturdulması barədə vəsatətlərini təmin etməyib.

“Bu, akvariumdur, bircə su töküb balıq buraxılması çatışmır. Nəyə görə insan məhkəmə zalında akvariumda saxlanmalıdır. Bu, təhqirdir, insan ləyaqətinin alçaldılmasıdır. Hətta Norveçdə çoxsaylı insanı qətlə yetirən adamı belə kameraya salmamışdırlar. Nəyə görə, Xədicə İsmayıl, Leyla Yunus, Rəsul Cəfərov, mən, digər vətəndaş cəmiyyəti fəalları bu akvariuma salınmalıdır? Bu, Avropa İnsan Hüquqları Konvensiyasının kobud pozuntusudur. Mən burada heç kimi eşitmirəm. Vəkillərimlə danışıb müdafiəmi qurmaq imkanım yoxdur”, deyə İntiqam Əliyev məhkəməyə etirazını bildirib.

Hakim vəkillərin Əliyevlə görüşməsinə icazə verib. Bu zaman mühafizə xidməti vəkilləri şüşə akvariumun içərisinə buraxmayıb. Bu, mühafizə qaydasının pozulmasıdır. Nəhayətdə hakim iki dəfə fasilə elan edib və zaldakı insanlar bayıra çıxarılıb.

Vəkillər İntiqam Əliyevlə bağlı birinci instansiya məhkəməsinin hökmünü qanunsuz və sifariş hesab edir. Çünki ittihamlar sübut olunmayıb.

“Əliyevə qarşı qanunsuz sahibkarlıq və vergidən yayınma ittihamları absurddur. O, QHT rəhbəridir. QHT sahibkarlıqla məşğulı olmur və vergidən azaddır. Vəzifə səhlənkarlığı ittihamı verilib, zərərçəkən yoxdur. Qrant layihələri barədə Ədliyyə Nazirliyinə müraciət edilib və onun müraciətləri sonradan nazirliyin rəsmi saytından silinib. Vəkillər Google arxivindən müraciətlərin qeydiyatını tapıb məhkəməyə təqdim edib, məhkəmə nəzərə almayıb”, deyə vəkil Cavad Cavadov qeyd edib.

Vəkil Elçin Sadıqov deyib ki, istintaq qanunvericiliyi pozub.

“Qanunvericiliyə görə, səyyar vergi yoxlaması başa çatmadan iddia irəli sürülə bilməz. İntiqam Əliyevin rəhbərlik etdiyi QHT-də səyyar vergi yoxlaması olmayıb, bu yoxlamanın qərarı yoxdur. Qanunvericiliyə görə, vergi yoxlamasından sonra verginin ödənilməsi üçün 10 gün vaxt verilməlidir. Bu müddətdə vergi ödənilməsə inzibati məsuliyyət müəyyən edilə bilər. Amma, istintaq orqanı bunlar olmadan ittiham irəli sürüb və 6 illik vergi yoxlaması təyin edib. Halbuki, bu qanunvericiliyə ziddir”, deyə o bildirib.

Vəkil Şəhla Hümbətova Apellyasiya Məhkəməsini formal proses adlandırıb.

“Məhkəmə prosesi göstərir ki, hakim, prokuror, ədliyyə birləşərək İntiqam Əliyevi məhkum etmək istəyir. Vəkillərin heç bir vəsatətinin təmin edilməməsi bunu bir daha sübut edir”, deyə o qeyd edib.

Vəkil Fəxrəddin Mehdiyev hesab edir ki, məhkəmənin hökmü ədalətli deyil və əsaslandlırılmayıb. Onun fikrincə, ittham ehtimal və mülahizələrə əsaslanır.

“Vəzifə saxtakarlığı ittihamı var zərəçəkən yoxdur. Qrant sadələşdirilmiş verginin subyekti ola bilməz, vergi ittihamı irəli sürülüb. İntiqam Əliyev hüquq elminin intellektualıdır. O, çoxsaylı insanın hüquqlarını Avropa İnsan Haqları Məhkəməsində müdafiə edib. Əliyev əslində əhalinin hüquqi maarifləndirilməsi sahəsində Elmlər Akademiyası, Hüquq institutu qədər işlər görüb. Məhkəmə bunları da nəzərə almayıb”, deyə vəkil deyib.

İntiqam Əliyev mövcud şəraitdə, akvariumda saxlandığı halda müdafiə çıxışı etməyi özünə təhqir saydığını məhkəmənin diqqətinə çatdırıb. Sədrlik edən hakim onun çıxışında tənqidi notlar olanda mikrofonu dəfələrlə söndürüb və çıxışının kəsiləcəyi barədə xəbərdarlıq edib.

“Burada müdafiə üçün kommunikasiya yoxdur. Siz əslində polissiniz. Mənim ofisimdən, evimdən götürülən sənədlər prokurorluqda saxlanılır, müdafiəmin təşkili üçün sənədlər qaytarılmır. Bu hakimiyyət Avropa Məhkəməsinin qərarlarını da yerinə yetirmir. Bunlar üçün Avropa Məhkəməsinin qərarı adi kağız parçasıdır”, deyə o qeyd edib.

Hüquq müdafiəçisi vətəndaş cəmiyyəti fəallarının həbsini siyasi sifariş adlandırıb.

“Biz insanlar insan hüquqlarını müdafiə etdiyimizə görə həbs edilmişik. Bizi ona görə həbs ediblər ki, qanunvericiliyi, hüququ müdafiə edirik. Bu, məhkəmə deyil, polis rejimidir”.

“Hazırda həbsdə saxlanılan fəallara təşəkkür edirəm, azadlıqda olub ağır şəraitdə azadlıqlar uğrunda çalışan insanlara təşəkkür edirəm, beynəlxalq təşkilatlara təşəkkür edirəm, dünyanın müxtəlif ölkələrində olub Azərbaycanda insan hüquqlarını müdafiə edən şəxslərə təşəkkür edirəm. Adətən normal ölkələrdə məhkəmələrə də təşəkkür edirlər. Amma, mənim sizə təşəkkür etməyə dilim gəlmir. Bu ölkədə məhkəmə sistemi yoxdur”, deyə o qeyd edib.

Bu zaman vəkil Elçin Sadıqov replika hüququndan istifadə edib: “Siyasi məhbus vəkildən soruşur, məhkəmə nə ilə nəticələnəcək? Vəkil cavab verir ki, təqsirin sübut olunmayacaq, ancaq sənə on il verəcəklər. Bu məhkəmədə də belə olcaq”, deyə o qeyd edib.

Beləliklə, apellyasiya şikayəti təmin edilməyib.

İntiqam Əliyev 2014-cü ilin avqustunda həbs olunub. Aprelin 22-də Bakı Ağır Cinayətlər Məhkəməsi onu vergidən yayınma, vəzifə səlahiyyətindən sui-istifadə, mənimsəmə, vəzifə saxtakarlığı və qanunsuz sahibkarlıq ittihamı ilə 7 il yarım azadlıqdan məhrum edib.

O, ittihamları rədd edir və həbsini siyasi motivli sayır.

“Amnesty International” təşkilatı İntiqam Əliyevi vicdan məhbusu elan edib. -03C-

*   *   *

2015 İyul 21 (Çərşənbə axşamı) 13:34:46

Bu gün Bakı Apellyasiya Məhkəməsi hüquq müdafiəçisi İntiqam Əliyevin şikayətini təmin etməyib və onun barəsində 7,5 il müddətinə azadlıqdan məhrumetmə hökmünü qüvvədə saxlayıb.

Proses zaman məhkəmə müdafiə tərəfin bütün vəsatətlərini rədd edib, hətta Əliyevin iclas zamanı vəkillərinin yanında oturmasına icazə verməyib.

Əliyev şüşə qəfəsə - “akvariuma” yerləşdirilib və mikrofon vasitəsilə danışıb.

Lakin hər dəfə Əliyev ölkənin məhkəmə sistemi ilə bağlı tənqid ifadə etdikdə prosesə sədrlik edən hakim Mirzəli Abbasov mikrofonunu söndürüb.

“Ədalətli mühakimə olan ölkələrdə proses yekunlaşdıqdan sonra hakimlərə adətən təşəkkür edirlər. Amma mənim buna dilim dönmür, çünki bizdə ümumiyyətlə məhkəmə sistemi yoxdur”, deyə Əliyev bildirib və hakim dərhal onun mikrofonunu söndürüb.

Əliyev həbsxanalarda olan bütün fəallara, azadlıqda mübarizəsini davam etdirən fəallara və Azərbaycanda siyasi məhbuslara dəstək üçün səy göstərən beynəlxalq hüquq müdafiəçilərinə minnətdarlığını bildirib.

Əliyev qeyd edib ki, məhkəmədə hətta mikrofonu söndürüldüyü üçün sərbəst şəkildə danışa bilmədiyi bir şəraitdə nitqlə çıxış etməyi özünə təhqir hesab edir.

O bildirib ki, Azərbaycanda hətta insanın öz hüquqlarını müdafiə etməsi üçün ədalətli sistemin minimum standartları belə yoxdur.

Məhkəməyə çox sayda vətəndaş cəmiyyəti fəalı, jurnalist, Qərb diplomatik missiyalarının nümayəndələri gəlib. Bu zaman iclas kiçik zalda keçirilib və bir çox arzu edənlər zala girə bilməyib.

Xatırladaq ki, Əliyev 2014-cü ilin avqustunda həbs edilib. Bakı Ağır Cinayətlər Məhkəməsi aprelin 22-də onu qanunsuz sahibkarlıq, vergi ödənişindən yayınma, mənimsəmə, vəzifə saxtakarlığı və vəzifə səlahiyyətlərindən sui-istifadə ittihamı ilə 7,5 il müddətinə azadlıqdan məhrum edib. Əliyev bütün ittihamları təkzib edir və siyasi motivlərlə hüquq müdafiə və vəkillik fəaliyyəti ilə əlaqədar siyasi motivli hesab edir. Amnesty İnternational beynəlxalq hüquq müdafiə təşkilatı Əliyevi “vicdan məhbusu” kimi tanıyıb. -06B-

Rəy yaz

Cəmiyyət

Zorakılıq cəmiyyətdə nəyin göstəricisidir? – Mehriban Vəzir Çətin sualda



Əziz Bakı şəhəri sakini!

Siz də Qlobal İqlim Dəyişmələri ilə mübarizəyə öz töhfənizi verə bilərsiniz

Dear resident of Baku city!

You too can contribute to the fight against Global Climate Change

Дорогой житель города Баку!

Вы тоже можете внести свой вклад в борьбу с глобальным изменением климата

Bizi sosial şəbəkələrdə izləyin

Xəbər lenti