![İstefa olacaqmı?](https://turan.az/resized/750/500/resize/media/2018/main/030400008202.jpg)
Belə hadisələr üçün standart olan göstəriş və tapşırıqlar verilib: yanğının səbəblərinin araşdırılması üzrə Dövlət Komissiyası yaradılıb, Baş Prokurorluq günahkarların aşkar edilməsi üçün cinayət işi qaldırıb, Bakı Şəhər İcra Hakimiyyətinin başçısına və səhiyyə nazirinə həlak olanların ailələrinə dəfnin təşkilində, xəsarət alanlara isə lazımi tibbi yardımın göstərilməsi tapşırılıb.
Yanğının ilkin səbəbi artıq açıqlanıb: "Azərişıq" şirkəti tez-tələsik bildirdi ki, hadisə elektrik naqillərinin nasazlığından baş verib. İstintaq faciənin günahkarlarını müəyyən etməli, hadisənin başvermə şəraitini araşdırmalı və bir çox suallara cavab verməlidir. Məsələn, yataq xəstələrinin taxta binada yerləşdirilməsinə kim göstəriş verib, yanğın təhlükəsizliyinə cavabdeh kim olub, niyə yanğın əleyhinə siqnalizasiya işləməyib?
Bütün bunlar məsələnin texniki tərəfidir. Bəs siyasi? Kiminsə məsuliyyətsizliyi, səriştəsizliyi, laqeydliyinin qurbanı olan bu qədər insanın ölümünə görə günahın heç olmasa bir hissəsini öz üzərinə götürməyə və könüllü istefa verməyə kimin cəsarəti çatacaq?
Qərbdə bundan da az ciddi hadisələrə görə nazirlər öz postundan məhrum edilirlər. Bu yaxınlarda İsveçdə infrastruktur naziri Anna Yohanson və daxili işlər naziri Anders İqeman dövlət qulluqçularının şəxsi məlumatlarının sızdırılmasına görə istefa veriblər.
Qalmaqal İsveç Nəqliyyat İdarəsi və İBM şirkətinin Çexiya filialı arasında ölkə nəqliyyatı, o cümlədən polis və hərbi, həmçinin İsveç vətəndaşlarının sürücülük hüququ haqda baza məlumatlar üzrə xidmət göstərilməsinə dair müqavilə səbəbindən yaranıb.
Nəticədə filial işçilərinin əlinə məxfi məlumatlar düşüb. Onların arasında İsveç vətəndaşlarının məhkumluğu və aparılan təhqiqatlar barədə bilgi, Nəqliyyat İdarəsi və İsveçin digər hakimiyyət orqanları arasında kommunikasiya haqqında informasiya olub.
Yaponiyanın maliyyə naziri Soiti Nakaqavanın postdan getməsinə isə telekamera qarşısına sərxoş vəziyyətdə çıxması səbəb olub. Bu, G7 sammitində çıxış zamanı baş verib. Sonradan siyasətçi inandırmağa çalışırmış ki, nitqinin ləng olmasına və koordinasiya probleminə qəbul etdiyi tibbi preparatlar səbəb olub. Ancaq yaranan qalmaqaldan sonra getməli olub.
Təsəvvür edin ki, hətta başqa ölkələrdən olan siyasətçilərlə, eləcə də biznes nümayəndələri ilə planlaşdırılmayan görüşlər xoşagəlməz hadisələrə səbəb ola bilər. Ötən il Böyük Britaniyanın beynəlxalq inkişaf naziri Priti Patel istefa verib. Məlum olub ki, məmur xanım məzuniyyət zamanı İsraildə yerli siyasətçilərlə 12 qeyri-rəsmi görüş keçirib.
Politoloq Şahin Cəfərli qeyd edir ki, bu və ya digər səbəblərdən istefa vermək istənilən Avropa ölkəsi üçün tamamilə təbii proses və ənənəvi dünya praktikasıdır. Bu, onilliklər əzrində formalaşmış siyasi mədəniyyətdir. Demokratik ölkələrdə idarəetmə modeli, dövlət və vətəndaş arasında münasibətlər insanın öz hüquq və azadlıqlarını reallaşdırması üçün iqtisadi və sosial şəraitin təminatı üzrə dəyərlərə əsaslanır. Odur ki, insanların hüquqlarının qorunması məqsədilə yüksək vəzifəli məmurun istənilən hərəkətinə siyasi düzgünlük, mənəviyyat, şəxsi məsuliyyət prizmasından baxılır.
"Demokratiya olan yerdə dövlət vətəndaşlar üçün çalışır, vətəndaş cəmiyyətinin inkişafı üçün şərait yaradılır. Azərbaycanda siyasi elita peşəkarlıq və işgüzar keyfiyyətlər prinsipinə əsasən formalaşmayıb, şəxsi etimad, dövlət başçısına loyallıq, varislik kursunun nümayişinə əsaslanıb. Mərhum Heydər Əliyev tərəfindən qoyulmuş bu mexanizm həbs cəzası ilə nəticələnə biləcək könüllü istefanı istisna edir. Odur ki, bizim ölkədə korrupsiya qalmaqalları və ya insan ölümü ilə nəticələnən böyük qəzalar nazirlərin işdən çıxmasına səbəb olmur", - politoloq Pərviz Səlimov Turan-ın müxbirilə söhbətində bildirib.
Respublika Narkoloji Mərkəzində baş vermiş faciəyə qayıdaq. Məhkəmə-Tibbi Ekspertiza və Patoloji Anatomiya Mərkəzində yanğın zamanı həlak olanların şəxsiyyətinin müəyyənləşdirilməsi prosesi davam edir. Qohumlarının cəsədlərini almaq üçün qapıya toplaşan insanlar suallara cavab axtarırlar: Bəyəm, səhiyyə naziri Oqtay Şirəliyev bir dəfə də olsun bu mərkəzdə olmayıb, vəziyyəti bilmirdi? FHN rəhbəri Kəmaləddin Heydərova tabe olanlar məktəblərdə, xəstəxanalarda yanğın təhlükəsizliyinin vəziyyətini yoxlamırlar?
Bu cinayətə görə kimi cəzalandıracaqlar? Gözətçi, sanitarka yoxsa baş həkimi?
Rəy yaz