Jurnalist və nümayəndəsi məhkəmənin protokolu ilə tanış ola bilmir

Turan agentliyinin və “Amerikanın səsi” radiosunun müxbiri Tapdıq Fərhadoğlu və onun nümayəndəsi artıq 8-ci gündür ki, Yasamal Rayon Məhkəməsinin qərarı ilə tanış ola bilmir. Məhkəmədə müxtəlif bəhanələrlə protokolla tanış olmağa imkan yaratmırlar.   

Tapdıq Fərhadoğlu Yasamal Rayon Prokurorluğunun müstəntiqi Mübariz Əsədovun Bakı Dövlət Universitetinin tələbələrinin etiraz aksiyasının işıqlandırılması zamanı ona fiziki təzyiqlərlə bağlı cinayət işi qaldırmasından imtina qərarından Yasamal Rayon Məhkəməsinə şikayət edib. Dekabrın 8-də hakim Azər Tağıyev şikayəti təmin etməyib.

T.Fərhadoğlunun nümayəndəsi Samirə Ağayeva bildirib ki, artıq beşinci dəfədir məhkəmə protokolu olə tanış olmaq üçün Yasamal Rayon Məhkəməsinə gedib. “İş ilə bağlı protokolla tanış ola bilmirəm. Hakimin ofisi qabaqcadan müəyyən etdiyi vaxtda məhkəməyə getməyimə baxmayaraq, gah onların proses günləri olur, gah katibə yerində olmur və digər başqa bəhanələrlə vaxtı uzadırlar. Dekabrın 16-da  yeni bir bəhanə tapdılar. Hakim Azər Tağıyevin katibəsi protokolla tanış olmaq üçün ərizənin təqdim olmasının lazımlığını bildirdi. Katibənin nəzərinə qanunda belə bir qaydanın olmamasını çatdırdım.

Azərbaycan Respublikası Cinayət Prosessual Məcəlləsinin 51.7-ci maddəsinə əsasən “Bundan sonra məhkəmə tərəfindən onunla tanış olmaq hüququ olan şəxslərə 3 gün müddətində protokolla tanış olmaq imkanı yaradılır". Göründüyü kimi, ərizənin yazılması qaydası qanunda nəzərdə tutulmayıb”, - S.Ağayeva qeyd edib.

Xatırladaq ki, bu il fevralın 20-də BDU mühafizə xidmətinin rəhbəri Mahir Höcətov tələbələrin etiraz aksiyasını çəkən jurnalistin kürəyinə və başına yumruq və təpiklə vurub. Jurnalist xəsarət alıb və əməliyyat olunub. Nəticədə qismən əmək qabiliyyətini itirib. 

T.Fərhadoğlu və nümayəndəsi məhkəmənin qərarı ilə razılaşmır, apellyasiya şikayəti verəcəklərini bildiriblər.  

S. Ağayevanın sözlərinə görə, məhkəmə imtinanı iş üzrə hadisə şahidlərinin olmaması ilə izah edib. O, qərarı əsassız adlandırıb, məhkəmənin dəlillərinin tutarlı olmadığını bildirib. Müstəntiq şahid qismində yalnız BDU-nun digər mühafizəçilərini dindirib. Belə ki, məhkəmə zamanı təkcə şahidlərin yox, aksiya zamanı xəsarət alan digər jurnalistlərin adları açıqlanıb. Cinayət materiallarında sonuncuların da şikayətləri var. Buna baxmayaraq, onların ifadəsi alınmayıb.  

Bununla yanaşı videoyazıya baxış zamanı hakim Höcətov tərəfindən T.Fərhadoğluna xəsarət yetirildiyini təsdiqləyib, faktiki olaraq CM-in 163-cü maddəsində nəzərdə tutulan cinayət (jurnalistin qanuni fəaliyyətinə maneçilik törədilməsi) tərkibini etiraf edib.

“Mənə zərbələrin endirilməsi və jurnalist fəaliyyətimə əngəllərin törədilməsi barədə açıq-aşkar video sübutların olmasına baxmayaraq, məhkəmə şikayətimi təmin etmədi. Mən apellyasiya şikayəti verəcəm, lazım gələrsə Avropa İnsan Hüquqları Məhkəməsinə müraciət edəcəm”, - T. Fərhadoğlu bildirib.

Bundan əvvəl, noyabrın 7-də jurnalist prezident İlham Əliyevə, Baş Prokurorluğa, İnsan Hüquqları üzrə İşçi Qrupuna müraciət edərək ona hücumun obyektiv araşdırılmasına yardım göstərilməsini xahiş edib.-0-