Keçmiş siyasi məhbusların həbsxanalarda koronavirusun yayılması haqqında fikirləri

Bakı/13.05.20/Turan: Dünən Ədliyyə Nazirliyi 13 saylı cəzaçəkmə müəssisəsində 33 məhbusun koronavirusa yoluxduğunu etiraf edib. Məlumatda xəstəliyə yoluxanların təcrid edildiyi və koronavirusun yayılması təhlükəsi olmadığı iddia edilirdi.

4 ildən çox 13 saylı cəzaçəkmə müəssisəsində saxlanılmış keçmiş siyasi məhbus, NİDA hərəkatının fəalı İlkin Rüstəmzadə isə fərqli düşünür.

"13 saylı cəzaçəkmə müəssisəsində dostlarım yüksək temperaturu olan çox sayda məhbus olduğunu bildiriblər. Bu, hələ 10 gün əvvəl idi. Ümumiyyətlə, bütün cəzaçəkmə müəssisələrində tibb hissələri təyinatına görə deyil, "otel" kimi fəaliyyət göstərir. Pulu olan orada qalır. Hətta pandemiya dövründə də belədir.

Məndə olan məlumata görə, 13 saylı cəzaçəkmə müəssisəsində klubu karantin məntəqəsinə çeviriblər ki, bu klub bunun üçün tamamilə yararsızdır.

Koronavirus şübhəsi olan məhbusları beton döşəməli bu otaqda saxlayırlar. Virus olduğu təsdiq edilən məhbusları penitensiar xəstəxanaya aparırlar", deyə Rüstəmzadə bildirib.

O, 33 məhbusun xəstəliyə yoluxmasına şübhə ilə yanaşıb.

"Orada şərait elədir ki, bir nəfər qripə yoluxanda çox qısa müddətdə bütün məhbuslar xəstələnirdi. 280 nəfərlik müəssisədə 1400 məhbus saxlanılırdı, hazırda orada 1200 nəfər var. Bu şəraitdə virus sürətlə yayılır", deyə Rüstəmzadə qeyd edib.

Rüstəmzadənin sözlərinə görə, dərmanların 99%-i penitensiar müəssisələrə çatmır, satılır. Amma penitensiar müəssisələrə daxil olan dərmanlar da bazar qiymətinə yaxın qiymətə satılır.

Orada "pulsuz dərman" yoxdur. Yalnız şikayət edənlər və öz hüquqlarını müdafiə edənlər dərman əldə edə bilir.

Rüstəmzadə hesab edir ki, Ədliyyə Nazirliyinin Müalicə Müəssisəsi yüzlərlə virus yoluxan insanı müalicə etmək iqtidarında deyil. "Xəstəliyə yoluxanların qohumları deyirləri ki, xəstələri yalnız analginlə müalicə edirlər. Vəziyyət acınacaqlıdır", deyə Rüstəmzadə qeyd edib.

"Heç olmasa pandemiya dövründə korrupsiyaya son qoysunlar ki, insanlar əziyyət çəkməsin", deyə o əlavə edib.

Onun sözlərinə görə, həbsxanaların müstəqil monitorinq sistemi, o cümlədən nəzarətə ictimai nəzarət yoxdur. Hazırki nəzarət məhbusların boğulması məqsədi daşıyır və korrupsiya üzərində qurulub.

Koronavirus riskinin azaldılması üçün siyasi məhbuslar, az ağır cinayətlərə görə mühakimə edilmiş, cəza müddətinin yarısından çoxunu çəkmiş şəxslər azad edilməlidir.

"Məhbusların həyatlarına görə hakimiyyət məsuliyyət daşıyır. Amma hakimiyyət onların azadlığa çıxmaqdansa, ölməsinə üstünlük verir. Heç olmasa pandemiya dövründə məhbusları müvəqqəti azad etmək və ya hansısa hospitala yerləşdirmək olardı", deyə Rüstəmzadə bildirib.

Digər bir keçmiş siyasi məhbus Anar Məmmədli də hesab edir ki, 13 saylı cəzaçəkmə müəssisəsinin tibb məntəqəsində də, Penitensiar Xidmətin hospitalında da virusa yoluxanların müalicəsi üçün kifayət qədər şərait yoxdur.

Hakimiyyət məhbuslar üçün lazımi şəraiti təmin edə bilmirsə, qoy epidemiya dövründə günahsız yerə həbs edilmiş siyasi məhbusları və az ağır cinayət törədilməsinə görə həbs edilmiş digər şəxsləri azad etsin, deyə Məmmədli bildirib.

AXCP sədr müavini Seymur Həzi 13 saylı cəzaçəkmə müəssisəsində saxlanılan Gədəbəy rayonunun keçmiş icra başçısı, Qarabağ müharibəsi veteranı Saleh Rüstəmlinin həyatı üçün təhlükə olduğunu bildirib.

"Hakimiyyət heç olmasa indi məsuliyyətini dərk etməli, bütün siyasi məhbusları təcrid etməli, daha sonra isə həm də azad etməlidir", Həzi belə hesab edir. -03B06-