Məcburi köçkünlərin etiraz aksiyası

Bakı/10.10.19/Turan: Oktyabrın 10-da bir qrup məcburi köçkün Qaçqınların və Məcburi Köçkünlərin İşləri üzrə Dövlət Komitəsinin inzibati binasının qarşısında etiraz aksiyası keçirib.

Onlar yerləşdirildikləri Qaradağ rayonunda yerləşən hərbi yataqxananın qəzalı vəziyyətdə olmasından şikayət ediblər.

Komitə sədri Rövşən Rzayev bir müddət əvvəl onları "Qobu-Park" yaşayış kompleksində mənzillə təmin etməyə söz verib. Amma kompleks artıq təhvil verilib, hərbi yataqxananın sakinləri isə oradan mənzil almayıblar.

"Yaşadığımız ərazidə məktəb, xəstəxana yoxdur, avtobus işləmir. 30 uşaq məktəbə gedə bilmir", - deyə aksiya iştirakçılarından biri bildirib. Etirazçıların qarşısına çıxan Komitə nümayəndəsi bildirib ki, hərbi şəhərcikdə məskunlaşmış məcburi köçkünlərə köçürülməklə bağlı söz verilsə də, sakinlərin hamısına mənzil çatmayıb.

Onun sözlərinə görə, 15 ailə tikilməkdə olan "Ümid" qəsəbəsində mənzil alacaq.

Məmur bildirib ki, idarə müvəqqəti olaraq sakinləri kirayə mənzillərə yerləşdirməyə hazırdır, amma onlar bundan imtina edirlər.

İdarə nümayəndəsi həmçinin əlavə edib ki, əvvəl qəzalı vəziyyətdə olan məktəblərdə, uşaq bağçalarında məskunlaşan vətəndaşlar köçürülür. "Tədricən bütün məcburi köçkünlər evlə təmin olunacaq", deyə məmur vəd edib. -21C-