Media-icmal 02.02.21

Vaksinləşməyə birmənalı olmayan münasibətin səbəbləri, suyun qiymətinin artmasının təsir edəcəyi sahələr, dövlət başçısının məmurları tənqid etməsi, intihar hallarının artmasına görə medianı qınamaq cəhdləri və s. məsələlər medianın  mövzuları sırasındadır...

“Yenisabah.az” saytı “İnsanlar vaksinasiyadan niyə qorxurlar?” sərlövhəli məqalədə koronavirus infeksiyasına qarşı peyvəndləməyə vətəndaşların birmənalı münasibətləri olmamasının səbəblərini araşdırır.  

Bəzi dünya ölkələrində olduğu kimi  Azərbaycanda da koronavirus infeksiyasına qarşı peyvəndləmə keçirilir, bu məcburi deyil, mütəxəssislər isə vaksinasiyadan keçməyi tövsiyə edirlər. Lakin bəziləri inyeksiyadan imtina edəcəklərini deyirlər, odur ki, bu narahatlığın səbəbələrinin nə olması ortaya çıxır.

Mütəxəssislərin fikrincə, peyvəndləməyə belə mənfi münasibət prosesə inamsızlıqdan irəli gəlir, hələ də bəziləri vaksinlərin “təhlükəli olması” fikrini bölüşürlər. 

Mütəxəssislər belə hesab edirlər ki, COVİD-19 vaksininə inamsızlıq və qorxu keçmişdəki təcrübə, siyasi və sosial mənşəli amillərə əsaslana bilər.

Belə ki, 2015-2019-cu illərdə 6 ölkədə peyvndlərin təhlükəsiz olduğu ilə qəti şəkildə razılşmayan respondentlərin sayında ciddi artım müşahidə olunub, bu sırada Azərbaycanın da adı çəkilir.

Ekspertlər isə bəyan edirlər ki, bir çox ölkələrdə vaksinlərə qarşı kampaniya qorxu və inamsızlıq hissini gücləndirir və ən çox da peyvəndlərin təhlükəsiz olmadığı düşüncəsi dövriyyəyə buraxılır, beləliklə vaksinin təhlükəsizliyini sual altına alır.   

Mütəxəssislər əlavə edirlər ki, peyvənddən imtina dənlər onların qeyri-effektiv və yan fəsadları olmasını əsas kimi göstərirlər.

“Bizimyolinfo.az”  saytı isə “Suyun qiymətinin artması başqa sahələrdə bahalaşmaya səbəb olacaq” sərlövhəli məqalədə Tarif Şurasının yanvarın 31-də su sərfiyyatının qiymətini 35 qəpikdən 70 qəpiyə, tullantı suların isə qiymətini 15 qəpikdən 30 qəpiyə qaldırıb.

“Azərsu” qiymətin qaldırılmasına səbəb kimi son illər su təchizatının əhatə dairəsinin genişləndirilməsi, əhalinin elektrik enerjisi, mal-material, nəqliyyat və təmir xərclərinin, maaşların  artmrılmasını göstərir.

İqtisadçı Xətai Alıyev isə deyir ki, su qiymət artımında cüzi yer tutan məsələdir və fantastik qiymət artımı gözləmək lazım deyil. Ümumi olaraq götürdükdə suyun daimi olaraq istifadə edildiyi sahələr var, suyun qiymətinin artması tərəvəz, göy-göyərti, maşınların yuyulmasında, içməli suyun qiymətində  artım yaradacaq.

“Müsavat.com” saytı isə “Prezident vəzifəli məmurları darmadağın etdi” sərlövhəli məqalədə dövlət başçısı İlham Əliyevin yüsək rütbəli məmurları tənqidə məruz qoymasını diqqət mərkəzinə çəkir. 

Dövlət başçısı İham Əliyev bu tənqidlərə “AZ.TV” yə müsahibısində yer verib.

Dövlət başçısı bəzi məmurları rəhbərləri olduqları qurumların məhz Şuşa şəhərində bölmələrini yaratmaq istəmələrinə görə tənqidə məruz qoyub.

Onun deməsinə görə, bu sırada bəzi nazirliklər, komitələr, xidmətlər vardır.

“Biri filial açmaq istəyir, biri nə bilim başqa qurum açmaq istəyir. Bu, yolverilməzdir və qəbuledilməzdir”, deyə Prezident mövqeyini bildirir.

Şuşa şəhərinə gəlincə dövlət başçısı bu şəhəri Azərbaycanın mədəniyyət paytaxtı elan etdiyini diqqətə çatdırır: “Bunu hər kəs bilir və bu qərar yüksək qiymətləndirilib. Şuşa nəinki Azərbaycanın, bölgənin, bəlkə də dünyanın mədəniyyət paytaxtlarından birinə çevriləcəkdir.

Rəhbərlik etdikləri qurumların Şuşada bölmələrini yaratmaq istəyənlərə isə dövlət başçısı deyir: “Kimin üçün filial açacaq? Özü üçün ki, gedib orada otursun, yaxud da ki, gedəndə bunun bir iqamətgahı olsun, şəraiti olsun, oraya pullar xərclənsin və insanların buna hansı xeyri dəyəcək? Heç bir”, deyə mənfi münasibətini ifadə edir.

Dövlət başçısı hesab edir ki, məmurların bu istəkləri özləri üşün Şuşada rahatlıq yaratmaqdır: “…Yenə də eyni məqsədlə, yenə də torpaq, hələ ki, orada indi heç kim yoxdur, yenə də hasar, yenə də nə bilim tikanlı məftil, iqamətgah”.

Prezidentin deməsinə görə, hətta nə İran, nə Ermənistanla sərhəddi olmayan Şuşada Dövlər Sərhəd Xidməti Şuşa zastavası yaratmaq müraiəti edib.

Dövlət başçısının sözlərinə görə, məmurlar Şuşada iqamətgahlar qurmağa maraqlıdırlar: “Amma daha mənim də artıq səbrim tükənir və deyirəm ki, vətəndaşlar da bilsinlər, bu məmurlar da bilsinlər. Məmurlar öz yerini, yerlərini bilsinlər, öz işləri ilə məşğul olsunlar. Bir də mən Şuşanı mədəniyyət paytaxtı elan etmişəm, məmurlar paytaxtı elan etməmişəm. Ona görə hərə otursun yerində, öz işi ilə məşğul olsun, məni də əsəbləşdirməsin”, deyə xəbərdarlıq edir .

“Redaktor.az”  saytı isə “İntihar xəbərlərinə mediada qadağa…-kimdən və nəyi gizlədirik?” sərlövhəli məqalədə son vaxtlar intiharların artması səbəbləri incələnir.

Müəlif deyir ki, son günlər intihar hadisələrinin sayında artım var və hətta bəizləri bu artıma səbəb kimi, intiharlara dair hadisələrin KİV-də yayılmasını göstərirlər, bəziləri isə belə xəbərlərin medada yayımlanmasına qadağa qoyulmasını təklif edirlər.

Bəzi media mənsubları isə hesab edirlər ki, intihar hadisələrinin artması ilə bu xəbərlərin medada yayılması arasında bərabərlik işarəsi qoymaq olmaz, bu medainı qınamaqdan başqa bir şey deyil.

Bəzi media mənsublarına görə isə belə hadisələr cəmiyyətin həmin vaxtdakı psixoloji vəziyyəti ilə bağlı olur, odur ki, qadağalar məsələnin həlli yolu deyil.

Bəzi media mənsubları isə bu düşüncədədir ki, intihar xəbərlərinə qadağa qoymaqdansa, cəmiyyəti intihara sürükləyən problemləri aradan qaldırmaq lazımdır.

Hətta bir sıra psixoloqlar da mediada belə məlumatların dərc olunmasını qadağan etməkdənsə, cəmiyyət olaraq insanlar arasında münasibət uçurumunun qarşısını almağ önə çəkir.

Psixoloqlara görə, bu intiharların motivi əsasən özünü öldürmə həddinə çatdırma, depressiyalar və intihar edənin öz nifrət etdiyi yaxınlarını cəzalandırmasıdır.