Media-icmal 02.06.2016

Mərhəmət, alicənablıq olmayanda…

Deputat Bəxtiyar Sadıxov baş redaktoru olduğu “Azərbaycan” qəzetində “Mərhəmət, xeyirxahlıq, alicənablıq” sərlövhəli məqalə ilə çıxış edib. Məqalədə müəllif dünyadakı qaçqınçılıq problemlərinə toxunur. Təkcə Azərbaycanın yox, dünyanın hazırda belə bir problem yaşamasına diqqət çəkilir. Müəllifə görə, problemə səbəb məhz insanlığın mərhəmət, xeyirxahlıq və alicənablıq kimi keyfiyyətləri dövlətlər səviyyəsində itirməsidir.

Bundan sonra məqalədə XX əsrin 90-cı illərində Azərbaycanın qaçqın problemi yaşaması, bu problemi həll etməsi, qaçqın və köçkünlərə yaradılan şərait barədə danışılır. Hazırda bu problemi Yaxın Şərqin yaşadığı vurğulanır.

Müəllif bu qaçqınların Türkiyədə cəmləşməsinə və dünyanın Türkiyəni bu problemlə təkbaşına qoymasına toxunur. “Özlərini insan hüquqlarının qarantı sayan Avropa dövlətləri bu qəbildən olan insanları qəbul etmək istəmirlər. Adlarını “miqrant” qoyaraq dini ayrı-seçkilik salır, onlara bəzən qeyri-insani münasibət göstərir, sığınacaqlarını yandırır, itlərlə, tikanlı məftillərlə, gözyaşardıcı qumbaralarla qarşılayır, ölkədən deportasiya edirlər.

Müəllif digər tərəfdən dünya dövlətlərini terrora dəstək verməməyə çağıraraq belə bir xəbərdarlıq edir: “Terrorçunu öyrədən, yaşadan, təmin edənlər var. Belə dövlətlər gec-tez əməllərinin bəhrəsini yeyirlər. Onsuz da dünyanın problemləri çoxdur. Haçansa terrorçular nüvə silahı əldə edəcəklər. Bax, əsl problem o zaman yaşanacaq. Terrorçu əli ilə partladılacaq nüvə silahı insanları milli, dini, irqi və digər əlamətlərə görə fərqləndirmək iqtidarında olmayacaq”.

Hakimiyyət daxilində parçalanma

“Azadlıq” qəzeti Prezident Administrasiyasının rəhbəri Ramiz Mehdiyevin Qərbi tənqid hədəfinə gətirən məqaləsini şərh edir. Məqalədə hazırkı şəraitdə dövlət başçısı İlham Əliyevin Qərblə yaxın təmaslar qurduğu halda bu məqalənin üzə çıxması hakimiyyət daxilində cəbhələşmə və hakimiyyət daxilində parçalanma kimi dəyərləndirilir. 

R.Mehdiyev bütünülükdə Qərbin beynəlxalq maliyyə, ticarət institutlarını ciddi tənqid edərək dünyanın sonrakı taleyinin heç kəsə aydın olmadığı mövqeyi ifadə edir. Bütünlükdə isə inkişaf etmiş dünya dövlətlərini dünya itqisadiyyatını nəzarətə almaqda, milli iqtisadiyyatları dağıtmaqda ittiham edir.

Məqalədə R.Mehdiyevin bu mövqeyi haqda deyilir: “Maliyyə böhranından çıxmaq üçün Azərbaycan hakimiyyəti məhz R.Mehdiyevin ittiham etdiyi maliyyə institutlarına ümid edir. Bir müddət öncə Beynəlxalq Valyuta Fondu və Dünya Bankı missiayalarının Azərbaycana səfəri təsadüfi deyildi. Hətta siyasi məhbuslardan bəzilərinin azad edilməsini də bu qurumlarla aparılan danışıqlara bağlayanlar var”.

Müəllifin fikrincə, bu mövqe hakimiyət daxilində ikitirəliyin yaranması deməkdir və antiqərb mövqeyində duranlar bu danışıqları pozmağa çalışacaqlar.

Ekspertlərin rəyi: dolların uçotunun qaldırılmasının manata təsiri olacaq

“Yeni Müsavat” qzəeti ekspertlərlə ABŞ Federal Ehtiyat Sisteminin dolların uçotunu qaldırması və bu halda manatın taleyilə bağlı müzakirələri diqqətə çatdırır.

Ekspert Natiq Cəfərli qeyd edir ki, keçirilən sorğularda ekspertlər uçot dərəcəsinin qaldırılacağını deyirlər, bu da Azərbaycana təsirini göstərəcək. “Qonşu dövlətlərin milli valyutalarının dəyərdən düşməsi, həm də neftin qiymətindəki müəyyən azalmalar Azərbaycan manatına təsir edəcək”. N.Cəfərli Azərbaycanın bu təsridən kənarda qalacağı barədə Mərkəzi Bankın bəyanatını əsassız adlandırıb.

N.Cəfərli ölkədə kəskin devalvasiya olacağını düşünmədiyini desə də dolların məzənnəsinin 1,65 həddinə qayıtmasını mümkün sayır.

Ekspert Vüqar Bayramov da dolların uçotunun qaldırılmasının manata təsir edəcəyi haqda ekspertlərin mövqeyini bölüşdüyünü  bildirir.  V.Bayramov mərəhələli şəkildə valyuta bazarının liberallaşdırılmasına başlamağın lazım gəldiyi qənaətindədir.

Turizm obyektlərində qiymətlər ona görə bahadır ki…

“Bizim Yol” qəzeti turizm mövsümü başlaması ilə bağlı turizm obyektlərində qiymətlərin hansı səviyyədə olmasını araşdırır.

Məqalədə qeyd edilir ki, istirahət mərkəzlərində bir şəxsin yalnız səhər yeməyi daxil olmaqla bir günlük istirahəti 80 - 120 manat arasında təşkil edir. Belə bir məqam da özünə yer tapır ki, qiymətlərin daha da bahalaşacağı istisna deyil. Bu qiymətlərlə bağlı məqalədə deyilir: “Beləliklə, istirahət mərkəzləri, regionlardakı otellər göstərəcəkləri xidmətlərə görə yenə yüksək qiymət təklif edirlər. Odur ki, vətəndaşlar ölkə daxilində istrahətdənsə xaricdə istirahətə üstünlük verirlər”.

Ekspert Dinara Ağaliyeva qiymətlərin bahalığını belə izah edir: “Buna səbəb ölkədə yeyinti məhsullarının istehsalının aşağı səviyyədə olmasıdır. Üstəlik, idman əyləncə mərkəzlərinin qiymətinin nisbətən yüksək olması və nəlqiyyat xərclərinin şişirdilməsi nəticəsində tur paketlərinin qiyməti də baha başa gəlir”.