Media-icmal 05.03.2016

Ölkənin iqtisadi siyasi həyatı, regional münasibətlər, sosial problemlər ölkə mediasının  aparıcı mövzusudur 

“Azərbaycan və İran yerləşdikləri regionda sabitləşdirici rol oynayır” Bu, rəsmi “Respublika” qəzetində məqalənin başlığıdır. Son vaxtlar Azərbaycan- İran münasibətlərinə toxunan qəzet iki ölkə arasında birlik nə qədər güclü olsa bölgədə təhlükəsizliyin o qədər yüksək səviyyədə qorunacağını vurğulayır.

“Neft-qaz sektorunda perspektivlər də kifayət qədər önəmlidir. İran Azərbaycanın neft-qaz yataqlarına investisiya qoyur və bu əməkdaşlıq daha da genişlənəcək. Xəzər dənizindəki neft-qaz yataqlarının birgə işlənməsi məsələsi də müzakirə edilib. Xəzər dənizinin ölkələrimizn ümumi sərvəti olduğu, bundan sonra da əməkdaşlıq, təhlükəsizlik və sülh dənizi olacağına diqqət yetirilmişdir”, - qəzet ikitərəfli münasibətlərin perspektivlərinə toxunur.

Uçot dərəcəsinin qaldırılması davam edəcək

“Mərkəzi Bankın uçot dərəcəsini artıracağı gözlənilən idi”. Ekspert Samir Əliyev bunu Mərkəzi Bankın (MB) uçot dərəcəsini 7%-ə qaldırmasını “Azadlıq” qəzetinə şərhində bildirib.

Amma ekspertə görə, bu addım son deyil, il ərzində MB mərhələlərlə uçot dərəcəsini qaldıracaq və hətta ikirəqəmli həddə çatdırılması istisna edilmir. “MB bu addımı ilə son aylar artan inflyasiyanı cilovlamaq və manat aktivlərinin gəlirliyini qorumaq niyyətindədir”, - ekspert bu addımın mahiyyətini izah edib.

S.Əliyev ölkənin idxaldan asılı olmasını xatırladarq bu fonda dolların bahalaşmasının yüksək inflyasiya vəd etdiyini bildirib. Onun fikrincə, hətta son aylar alıcılıq qabiliyyətinin itməsi səbəbindən bəzi malların ucuzlaşması belə inflyasiyanın qarşısını almaq gücündə deyil. “Mərkəzi Bank son bir ildə pul kütləsini azaltmağa, hökumət isə inzibati tədbirlər hesabına tənzimləməyə çalışır. Amma bunun səmərəsi uzunmüddətli ola bilməz”. S.Əliyev maliyyə bazarındakı durumu belə şərh edir.

İqtisadi sahələrin böyüməsinə baxmayaraq, pul kütləsinin 2010-cu il səviyyəsində qaldığını deyən S.Əliyev bu vəziyyəti qeyri-neft sektorunun inkişafına böyük əngəl adlandırıb.             

Avropa Mərkəzi Bankı Azərbaycanda da filialı olan Latviyanın “Trasta Komersbank”ını bağlanması barəqə qərar verib. “Novoe Vremya” qəzeti Latviya mətbuatına isnadən bunu yazır.

“Bankın bağlanması ona görə maraq yaradır ki, bu bankın Azərbaycanda filialı olub və bu fililalın adı “çirkli pulların yuyulmasında keçir. Bir neçə il öncə “Komersbank” Azərbaycanda “İKB Leasing” törəmə şirkətini qurub, əsas funksiyası da pulların  Avropa ölkələrinə köçürülməsi və yerləşdirilməsi idi”, - qəzet yazır. Həm də bu bankın təkcə Azərbaycanda yox, MDB-nin bir neçə ölkəsində çirkli pullar “yuduğunu” bildirir.

2014-cü ildə ölkə prokurorluğu təhqiqat apararaq bankın fəaliyyətində mənimsəmələr, irihəcmli leqallaşdırmalar  və s. kimi qanunsuz fəaliyyəti müəyyən edib.

Əmanətləri dağıdan azadlıqda, əmanətçilər məhkəmələrdə

“Texnikabank”ın 100-ə qədər müştərisi Bakı fililalının keçmiş müdiri Zal Yusifovun və oğlu İlham Yusifovun dələduzluğu ilə üzləşiblər. “Bizim Yol” qəzeti zərərçəkənlərə isnadən belə yazır. Bu iki şəxs bankın əmanətçiləri olan 81 nəfərin 36 milyon manat pulunu mənimsəyib, həbs cəzası alıb, amma İ.Yusifov ziyanı ödəmədən həbsdən azad edilib. Əmanətçilər bundan narazılıq edirlər. Bundan əlavə, əmanətçilər bu məsələdə maraqlı olan keçmiş MTN rəhbərliyi tərəfindən qorxudularaq bankdan pullarını istəməmək hədə-qorxusuna məruz qalıblar. “Kimi MTN-in hədə- qorxularından çəkinib əmanətlərindən imtina etdi, kimi də geri çəkilmədi, indi də əmanətlərini tələb edir”. Bunu isə qəzetə müraciət edən əmanətçilər bildirirlər. “Bizim qarşımızda “Texnikabank”ı məsuliyyətdən uzaqlaşdırmaq olub, bu tapşırıq da MTN rəhbərindən yox, müavinlərindən biri tərəfindən verilib”. Bunu isə əmanətçilərə bu məsələ üzrə istintaq qrupunun rəhbəri Vüsal Ələkbərov bildirib.

“Bu işlə əlaqədar müxtəlif məhkəmə instansiyaları hakimlərinin iştirakı ilə son 8 ildə 420 məhkəmə iclası keçirilib” deyən əmanətçilər buna baxmayaraq, əmanətlərini hələ də ala bilmədiklərini söyləyirlər.

“Yeni Müsavat” qəzeti Gürcüstanla Azərbaycan arasında qaz anlaşması məsələsini diqqət mərkəzinə çəkib. Həm də qəzet bu anlaşmanı “SOCAR-ın Gürcüstanda qaz bazarını qoruması” kimi dəyərləndirir. Qaz alqı-satqısı ilə bağlı Gürcüstanda sənədlərin imzalandığı vurğulanır.

“Ermənistanın tranzit ölkə olmaq arzusu gözündə qaldı, Rusiyadan təhlükəli qaz asılılığı gündəmdən çıxdı”, - qəzet bu anlaşmanın mahiyyətinə toxunur. “Artıq İrandan qaz nəqlinə ehtiyac yoxdur”. Bunu isə Gürcüstanın energetika naziri Kaxa Kaladze bəyan edərək ölkəyə qaz satıcısı axtarışına son qoyulduğunu bildirib.

“Bununla da SOCAR müəyyən güzəştlər hesabına olsa belə Gürcüstanın qaz bazarında öz mövqeyini qoruyub saxlaya bildi”. Qəzet bu anlaşmanın mahiyyətini belə dəyərləndirir.