Media-icmal 05.10.18

2018-ci ilin iqtisadi uğurları, drondan istifadəyə, Azərbaycan-Rusiya siyasətinə baxış və s. məsələlər bugünki (05 oktyabr 2018-ci il) medianın aparıcı mövzularıdır...

2018-ci il başa çatmasa da ...

"Azərbaycan" qəzeti "İnkişaf və yüksəliş dövrü" sərlövhəli məqalədə ölkənin 2018-ci ildə əldə etdiyi iqtisadi uğurları dəyərləndirir.

Müəllif deyir ki, 2018-ci il hələ başa çatmasa da, ölkənin inkişafında növbəti uğurlu mərhələ, bir neçə il öncə baş vermiş böhrann çətinliklərinin geridə qalması, iki il öncə başlanan islahatların qeyri-neft sektorunun inkişafını təmin etməsi ili kimi yadda qalacaq.

Müəllif "Cənub qaz dəhlizi" və TANAP beynəlxalq enerji layihələrinin rəsmi açılışını 2018-ci ilin iqtisadi uğurları sırasında ilk yerdə çəkir.

Müəllif hesab edir ki, bu tarixi hadisələr rəsmi Bakının 1994-cü ildən həyata keçirdiyi enerji siyasətinin məntiqi və uğurlu davamıdır.

Yazı müəllifi fikrini əsaslı göstərmək üçün dövlət başçısı İlham Əliyevdən sitat da gətirir: "Cənub qaz dəhlizi"nin rəsmi açılışı onu göstərir ki, biz qarşımıza qoyduğumuz bütün hədəflərə çatdıq və bu gün ölkəmizin həyatında, neft-qaz sənayesinin inkişafında yeni dövr başlayır. Yeni enerji dəhlizinin işə düşməsi qarşıdakı illərdə Azərbaycana böyük məbləğdə xarici valyutanın daxil olmasına şərait yaradacaq".

2018-ci ilin mayında Naxçıvan istiqamətində Günnüt kəndinin işğaldan azad olunmasını və hərbi baxımdan əhəmiyyətli olan bir neçə yüksəklikdə möhkəmlənməsini də müəllif 2018-ci ildə qazanılan uğur kimi göstərir və bunu böyük qələbənin uzaqda olmadığının göstəricisi adlandırır: "Qızılqaya yüksəkliyinin ən böyük strateji əhəmiyyəti Yerevan-Yexeqndzor-Gorus-Laçın-Xankəndi avtomobil yoluna ordumuzun nəzarət etməsinə imkan verməsidir", müəllif bu qələbənin əhəmiyyətini belə dəyərləndirir.

Müəllif bu ilin daha bir uğuru kimi son illərdə Azərbaycan Ordusunun modernləşdirilməsini göstərir: "Son illərdə isə ordumuzda həyata keçirilən quruculuq işləri daha yeni keyfiyyət mərhələsinə qədəm qoyub, davam etdirilir. Bu dönəmdə qarşıya qoyulan əsas məqsəd Silahlı Qüvvələrdə modernləşmə islahatlarının dinamik həyata keçirilməsi, ordumuzun döyüş qabiliyyətinin ən müasir standartlar səviyyəsinə çatdırılmasıdır".

Müəllif deyir ki, bu sırada ən inkişaf etmiş hərbi sənaye kompleksinə malik olan Rusiya və İsrail kimi dövlətlərdən ən son silah və texnikalar alınaraq ordunun arsenalına daxil edilib və bu il Milli Ordu yaradılmasının 100 illiyi ilə bağlı paradda nümayiş etdirilənlər onun cüzi hissəsi olub.

Müəllif güclü ordu ilə güclü dövlət arasında bərabərlik işarəsi qoyaraq bu gün Azərbaycanın güclü orduya malik olduğunu bildirir.

Məqalə müəllifi bu il sentyabrın 26-da Azərbaycanın üçüncü "Azerspace 2" telekommunikasiya peykinin orbitə çıxarılmasını da bu ilin uğurları sırasında göstərir.

Müəllif hesab edir ki, 2018-ci il Azərbaycanın sosial-iqtisadi yüksəlişi, hərbi qüdrətinin artması, beynəlxalq mövqelərini möhkəmləndirməsi baxımından uğurludur.

Polisi təşvişə salan dron və...

"Bizimyol.info"da isə "Şəhər mərkəzində dron havalandı, polislər təşvişdə - drondan istifadə etmək olarmı?" sərlövhəli məqalə oxumaq olar.

Müəllif drondan istifadə və bunun hüquqi əsasları barədə eksprtlərlə müzakirə açıb.

Bu nüzakirələrin aktuallığını müəllif belə əsaslandırır ki, bir neçə gün öncə, axşam saatlarında şəhərin mərkəzi Nizami küçəsində turistlərdən biri havaya dron qaldırıb, çox keçməyib ki, polislər hərəkətə keçib, əraziyə 10-dan çox polis nəfəri gəlib və dronu idarə edən şəxsi axtarmağa başlayıblar.

Müəllifin sözlərinə görə, sonradan dronu daha çox yüksəyə qaldıran şəxs onu gözdən itirməyi bacarıb və polislər həmin şəxsi aşkar edə bilməyiblər.

Bu faktdan irəli gələrək, müəllif Milli İnternet Forumunun prezidenti, bu sahədə ekspert Osman Gündüzlə dronlardan istifadə barədə danışır.

O.Gündüz bildirir ki, dronlardan istifadəyə münasibət birmənalı olmadığı kimi, onların təyinatı üzrə istifadəsinə qadağa qoyulmasına baxış da birmənalı deyil: "Dronlar fərqli təyinatlar üçün nəzərdə tutulub. Hərbi məqsədlər üçün istifadə olunan dronlara qadağa qoyulması normaldır. Amma məişət üçün nəzərdə tutulan dronların istifadəsinə qadağa qoymaq düzgün deyil. Hazırda ölkəmizə dron gətirilməsi nəzarətdədir, belə ki, dron gətirmək istəyərkən DİN, DTX və s. orqanların razılığı olmalıdır. Lakin sirr deyil ki, dronu hissələrə ayıraraq müxtəlif yollarla keçirən, onu ölkəmizdə quraşdıraraq satışa çıxaran və yaxud istifadə edən insanlar var".

O.Gündüz hesab edir ki, polislərin şəhər mərkəzində drondan istifadə edən şəxslərə qarşı belə reaksiyası başa düşülmür, heç bir dünya ölkəsində drondan istifadəyə qadağa qoyulmayıb.

Ekspert deyir ki, həmin dron vasitəsilə Bakının misilsiz gözəlliyi lentə alına, hansısa bir telekanala ötürülə, bu da ölkənin imici barədə müsbət fikir formalaşdıra bilər, belə halda isə polislərin maneçiliyi heç doğru deyil.

Digər ekspert Elməddin Muradlı isə deyir ki, polis bu addımı təhlükəsizlik məqsədilə atıb, amma belə sərt reaksiyaya ehtiyac yoxdur: "Dünyanın heç bir yerində belə bir qayda yoxdur. Camaat başqa ölkələrdə oyuncaq təyyarələr, qırıcılar uçurdur, texnolgiya günü-gündən inkişaf edir. Bu qədər sərt davranmaq doğru deyil".

E.Muradlı hesab edir ki, belə hal xüsusi qorunan dövlət obyeklərinin ətrafında baş versə müdaxilə başa düşülən olardı, şəhərin mərkəzində, parklarda dronlardan istifadə olunması isə normal qarşılanmalıdır.

Ekspert deyir ki, dronlara nəzarət Xüsusi Dövlət Mühafizə Xidmətinin fəaliyyətinə aiddir, dronlardan istifadə edən şəxslərin yerinin təsbit olunması, dronlara kənardan müdaxilə üçün lazım gələrsə xüsusi texnika ilə təhciz etməklə polisə də belə səlahiyyət vermək olar.

Maskalanmamış "şimal siyasəti"

"Moderator.az"da isə "Şimaldan günəş doğası, Azərbaycana işıq saçası deyil, işığımızı özümüzdə axtaraq..." sərlövhəli məqalə diqqət cəlb edir.

Sayt xüsusi xidmət oqranının keşmiş zabiti, təhlükəsizlik məsələləri üzrə ekspert İlham İsmayılın Azərbaycan-Rusiya münasibətlərindəki problemli məqamlara dair düşüncələrinə yer verib.

Müəllif hesab edir ki, haqqında danışdığı məsələ əsassız deyil və bu əsası göstərmək üçün Rusiya Dövlət Dumasının MDB ölkələri, avrasiya inteqrasiyası və soydaşları ilə əlaqələri üzrə komitəsinin sədr müavini Konstantin Zatulinin bu günlərdə "ruposters.ru" saytına şərhinə istinad edir.

İ.İsmayıl bildirir ki, K.Zatulin sentyabrın 28-də MDB dövlət başçılarının görüşündə Azərbaycan dövlət başçısı İlham Əliyevlə Ermənistanın baş naziri Nikol Paşinyan arasında təmas xəttində gərginliyin aradan qaldırılması yolları haqqında Düşənbədəki şifahi razılaşmasına belə münasibət ifadə edib: "Azərbaycan prezidenti İlham Əliyevə etibar etməyə dəyməz. Azərbaycanın real siyasəti deyilənlərdən kardinal şəkildə fərqlənir. Bu gün Azərbaycan rəhbərliyi kompromis istəmir. Silahlanmanın, hərbi büdcəni yüksəltməyin, hərbi hədə-qorxunu artırmağın hesabına öz bildiyini əldə etmək istəyir. Biz bu işdə qəti olaraq maraqlı deyilik. Ona görə də mənim və kolleqalarımın bütün cəhdləri, çalışmaları Dağlıq Qarabağda müharibənin yenidən başlanmasına imkan verməməkdir. Və bu məsələlərdə bizim rəqibimiz müharibədən həddən çox danışan Azərbaycanın rəhbərliyi və siyasi dairələridir".

İ.İsmayıl deyir ki, K.Zatulin bu müharibənin Azərbaycanın dağılması ilə nəticələnə biləcəyini, Azərbaycanın sabit ölkə olmadığını vurğulayıb.

Ekspertin sözlərinə görə, K.Zatulin hesab edir ki, Azərbaycan bəzi şərq dövlətləri kimi, siyasət aparması görüntüsü yaradır: "Onun apardığı siyasətlə bizim o siyasət haqqında nə düşündüyümüz arasında böyük fərq var".

Ekspert isə K.Zatulinin bu mövqeyini maskalanmamış, əsil Rusiya siyasəti sayaraq deyir ki, bu, Azərbaycana münasibətdə Rusiyanın indiyə kimi hansı siyasəti aparıbsa, bu gündən sonra da hansı siyasət aparacağının göstəricisidir: "Danışan Rusiyanın rəsmi bir şəxsidir. Rusiya parlamenti komitə sədrinin müavini K.Zatulin Azərbaycanı hədəfə alan bəyanatla çıxış edib. Bu, qəbulolunmazdır!".

İ.Ismayil Qarabağ probleminin həllində Rusiyanın Azərbaycana yardım edəcəyinə ümidli olanlara deyir ki, K.Zatulinin açıqlaması bu siyasətin mahiyyət göstəricisi, Ermənistana arxa olması, hərbi baxımdan onu silahlandıracağı mövqeyidir.

Ekspert deyir ki, K.Zatulinin bu açıqlaması Azərbaycan müharibə etdiyi halda dolayıs yolla Rusiyanın onu vuracağı xəbərdarlığıdır.

İ.İsmayıla görə, K.Zatulinin "Azərbaycan elə də sabit ölkə deyil" mövqeyi Azərbaycandakı beşinci kolona ünvanlanıb, rus deputat orden-medal verdiklərinə güvənir, Azərbaycanın gələcəyini onun ölkəsinin arzuladığı formada görmək istədiyini dilə gətirir.

Ekspert isə hələ də Rusiyaya ümidli olanlara xitabən "Əmin olsunlar ki, şimaldan günəş doğası, Azərbaycana işıq saçası deyil, işığımızı özümüzdə axtaraq" mesajı ünvanlayır.