Media-icmal 07.07.20

Koronavirus pandemiyasına qarşı mübarizə, xeyir-şər mərasimlərinə görə cərimələnməyə münasibət, biznes obyektlərinin fəaliyyətlərini dayandırmasına baxış və s. məsələlər medianın aparıcı mövzuları sırasındadır...  

Bu tədbirlərin nəticəsidir ki... 

“Azərbaycan” qəzeti   “Bütün qərarlar vətəndaşların sağlamlığının qorunmasına yönəlib” sərlövhəli məqalədə koronavirus epidemiyasına qarşı mübarizəni dəyərləndirir.

Müəllif deyir ki, bu infeksiyanın yayıldığı ilk vaxtlardan Azərbaycan hakimiyyəti bütün istiqamətlər üzrə ciddi tədbirlər həyata keçirməyə başladı.

Onun fikrincə, bura həm virusun yayılmasının qarşısının alınması, həm səhiyyənin yeni şəraitə uyğun hazırlanması, iqtisadi dayanıqlığın təmin olunması, həm də əhalinin sosial müdafiəsinin gücləndirilməsi daxil olub.

Müəllifə görə, hökumət martın 24-dən ölkədə karantin elan etdi, hava və yerüstü nəqliyyat vaistələrinin fəaliyyəi minimuma endirildi. 

Müəllif əlavə edir ki, bu virusa yoluxanların müalicəsi üçün ölkədə 20 xəstəxana müəyyən edildi, iki min çarpayılıq 10 modul tipli xəstəxananın quraşdırılmasına başlanıldı, 5-i artıq istifadəyə verilib.       

Yazı müəllifi deyir ki, əhalinin sosial təminatı, iqtisadiyyatın dayanıqlılığı, sahibkarlara yardım məqsədilə zəruri tədbirlər görüldü, bu məqsədlərə milyardlarla vəsait ayrıldı.

Müəllifə görə, bu tədbirlərin nəticəsidir ki, dünyanın ən inkişaf etmiş ölkələrində yaranmış acınacaqlı vəziyyət Azərbaycanda müşahidə olunmadı və Dünya Səhiyyə Təşkilatı Azərbaycanı digər dövlətlərə nümunə göstərib.

Məqalə müəllifi hesab edir ki, vətəndaşların bir qismi öz sağlamlığına  biganədir, qaydalara məsuliyyətsiz yanaşır, maska taxmır və son vaxtlar yoluxmanın artması bunun nəticəsidir.

Yazı müəllifi vurğulayır ki, indi vətəndaş məsuliyyəti göstərilməli, maska taxılmalı, sosial məsafə saxlanılmalı, gigiyenik qaydalara ciddi əməl edilməlidir.

Xeyir-şər nə vaxtdan inzibati xəta olub?

“Ovqat.com” saytı “Bunların hədəfi koronavirusu yox, milli adət-ənənələrimizi məhv etməkdir” sərlövhəli məqalədə keçmiş baş prokuror İlyas İsmayılovun koronavirus pandemiyası çərçivəsində insanlarrın bu və ya digər hərəkətlərinə görə cəzalandırılmalarına dair münasibətinə yer verib.

İ.İsmayılov hesab edir ki, koronavirus epidemiyası ilə əlaqədar karantin tədbirləri adı altında sanki Azərbaycan xalqının milli adət-ənənələrinə qarşı müharibə aparılır: “Toy, yas mərasimlərinin inzibati yolla qarşısının alınmasını başqa cür qiymətləndirmək mümkün deyil”, - i.Ismayilov bildirib.

İ.İsmayılova görə, bu, başa düşülən deyil, çünki inzibati cəzalar inzibati xətalara tətbiq olunur və xətasız cəza özbaşınalıqdır, toy etmək, ya hüzr məclisi keçirmək nə zamandan xəta sayılır: “Orta aylıq əməkhaqqı 300-400 manat olduğu   halda yas məclisinə görə  şəxsin qardaşına 5 min manat cərimə yazmaq hansı məntiqə sığır? Ən əsası isə indiyədək eşitmədim ki, yol verilən xətalara görə insanlara xəbərdarlıq edilsin”.

İ.Ismayilova görə, insanlar Operativ Qərargahın heç bir hüquqi əsası olmayan qaydalarına əməl etmədiklərinə görə uzaqbaşı xəbərdar oluna bilərlər, ona əməl edib- etməməyi insanların ixtiyarına buraxmaq lazımdır, çünki  bu karantin qaydalarının nə dərəcədə yararlı olacağını Ümumdünya Səhiyyə Təşkilatı belə bilmir.

Bu baxımdan İ.İsmayılov koronavirusa qarşı inzibati yolla deyil, inandırma, maarifləndirmə yoluyla mübarizənin tərəfdarı olduğunu, bu işi məmurlara yox, mütəxəssislərə həvalə etməyi əsas sayır.

Dayanan obyektlər və sosial vəziyyət

“Yenisabah.az” da yer alan “İki-üç kilometr məsafədə 11 obyektin bağlandığının şahidi oldum”  sərlövhəli məqalədə müəllif ölkədə biznes qurumlarının fəaliyyətilə bağlı iqtisadçı-ekspert Natiq Cəfərlinin fikirlərinə yer verir.  

Onun fikrincə, hökumət koronavirusla mübarizədə bacarmadı, tez-tez qərarların dəyişdirilməsi, proseslərin dərinliyini ölçə bilməməsi, modelləşmə bacarığının olmaması ölkəni çox ağır durumda buraxıb.

Ekspert hesab edir ki, hesabatlılıq, alınan qərarların məntiqi, cəmiyyətlə normal kommunikasiya yoxdur, həm də istər əhalinin, istərsə də biznesin vəziyyətini də anlaya bilmirlər.

N.Cəfərli söhbət etdiyi Bakı sakininə istinadən deyir ki, adam restoranda işləyirmiş, 4 aydır ki, işsizdir, evinə çörək apara bilmir: “Adam ayrılanda dedi ki, o qalstuklulara deyin, acından ölürük, bu məqamda yadımıza nə maska düşür, nə virus, mən uşaqlarımın üzünə baxa bilmirəm”.

Ekspert vurğulayır ki, biznes obyektlərinin fəlaiyyətlərini dayandırmaları insanları ağır vəziyyətə salıb.

N.Cəfərli vurğulayır ki, Statistika Komitəsinin yanından 20 nömrəli məktəbə qədər olan bir məsafədə bir xeyli obyektin fəaliyyətsiz olduğunu görüb: “Cəmi 2-3 km. məsafədə, şəhərin gur və karlı yerində 11 obyektin bağlandığını, üzərinə “icarəyə verilir” yazıldığını gördüm. Ağır vəziyyətdir, hökumət nə vətəndaşı, nə biznesi anlayacaq durumda deyil, bu isə çox təhlükəli durum yaradır. İnsanlar vurusa deyil də, bu hökumətə, onların aldığı mənasız qərarlara inanmırlar”, - ekspert əlavə edib.