Media-icmal 09.01.21

Pandemiyaya qarşı mübarizə,  Azərbaycana qarşı təxribatlar,  ehtimal edilən Moskva görüşü,  AAAF arkın bəzi binalarında yaşayan vətəndaşların sosial qayğıları və s. məsələlər medianın aparıcı mövzuları sırasındadır...

“Azərbaycan” qəzeti “Azərbaycan pandemiyaya qarşı çevik tədbirlər görür” sərlövhəli məqalədə) COVİD-19 pandemiyasına qarşı vəziyyəti dəyərləndirir.

Müəllif deyir ki, artıq bir ildən çoxdur ki, dünya koronavirus pandemiyası ilə mübarizə aparır, amma virus yayılmaqda və can almaqda davam edir.

Müəllif vurğulayır ki, Azərbaycan da virusa qarşı mübarizə aparır, profilaktik tədbirlərdən  tutmuş tibbi-təşkilati, xəstəxana, preparat təminatı təşkil edilib.

Yazı müəllifi yada salır ki, son bir ildə 10-dan çox yeni xəstəxana tikilib,  laboratoriyaların sayı 8 dəfə artırılıb,  2 milyondan çox test aparılıb.

Bu tədbirlərin nəticəsi olaraq virusa yoluxan 200 mindən çox vətəndaş müalicə olunaraq sağalıb.

Müəllif əlavə edir ki, pandemiya ilə mübarizənin tələblərindən olan  məhdudiyyətlərin yaratdığı problemləri aradan qaldırmaq üçün əhaliyə təqribən 2,5 milyard manatdan artıq dəstək göstərilib.

Bu sırada müəllif işsiz və iş yerini müvəqqəti itirmiş şəxslərə dörd dəfə 190 manat birdəfəlik ödənişin verilməsini xüsusi qeyd edir.

Qarşıda isə vaksinlərin Azərbaycana gətirilməsi gözlənilir və peyvəndlərin yanvar ayı ərzində Azərbaycana gətirilməsi gözlənir.

Bununla belə, müəllif sadə gigiyenik qaydalara riayət etməyi, maska taxmağı, sosial məsafəni gözləməyi diqqətdə saxlamağa çağırır.

“Redaktor.az” saytı “Azərbaycan yenidən hərbi əməliyyatlara başlaya bilər” sərlövhəli məqalədə Ermənistanla Azərbaycan arasında artəkəsin dayanıqlı olub- olmaması dəyərləndirlir.

Müəllif deyir ki, bu müharibəyə səbəb Azərbaycan ordusunun nəzarətində olan bölgələrə erməni yaraqlı dəstələrinin daxil olmasıdır, belə ki, onların bir qismi zərərsizləşdirilib, digər qismi əsir götürülərək qarşı tərəfə təhvil verilib.

Amma Azərbaycan ordusu qərar qəbul edib ki, bundan sonra əsir götürmək və geriyə təhvil verməkdən söhbət gedə bilməz.

Durumu şərh edən politoloqlar bu düşüncədədirlər ki, əgər bir də belə hallar təkrarlanacaqsa, erməni yaraqlılar yerindəcə məhv ediləcək.

Politoloqlar  həm də hesab edirlər ki, erməni yaraqlılar Azərbaycana Rusiya sülhməramlılarının nəzarətində olan Laçın dəhlizindən “sızır və Dağlıq Qarabağda peyda olurlar: Bu cür avantüristlər, qaçaq-quldur dəstələri bölgəni yenidən qarşıdurmalara, müharibəyə sürükləyə bilərlər”, -  politoloqlar perspektivə nəzər salırlar.

Politoloqlar hələlik qeyri-rəsmi xəbərlərə görə, yanvarın 11-də Moskvada keçirilməsi  gözlənilən görüşdə razılıq əldə edilməsə Azərbaycan ordusu bölgəni Ermənistan Silahlı Qüvvələrinin qalıqlarından təmizləmək üçün yenidən hərbi əməliyyatlara başlaya bilər.

“Mətbuat.az” saytı “Təxribat! Azərbaycan hərbçilərinə qarşı cinayət işi açıldı” sərlövhəli məqalədə politoloqlar Rusiyanın sülhməramlı missiyasını yerinə yetirməsini müzakirə edirlər. 

Müzakirəyə qoşulan politoloqlar yanvarın 6-da keçirilən müşavirədə dövlət başçısı İlham Əliyevin çıxışına istinadən  prezidentin bu missiyanın yerinə yetirilməsi səviyyəsindən razı qalmadığını vurğulayırlar, hətta Azərbaycana qarşı təxribatlara əl atırlar.

Politoloqlar yada salırlar ki, Azərbaycanla razılaşdırmadan sülhməramlıların Fransadan bir parlament heyətini Dağlıq Qarabağa buraxması təxribatlardan biridir.    

Politoloqların təfsirinə görə, daha bir təxribat sülhməramlıların Laçın dəhlizini  Ermənistanın və erməni separatçıların ixtiyarına verməsidir.

Politoloqlar daha bir təxribat əməli kimi Ermənistan xarici işlər nazirinin  Azərbaycanla razılaşdırılmadan Dağlıq Qarabağa buraxılmasını göstərirlər. Politoloqlara görə, artıq Türkiyə hərbi yükləri Azərbaycana gəlməkdədir, Ağdamda bu günlərdə Monitorinq Mərkəzi fəaliyyətə başlayacaq.

Şərhçilərə görə, müharibə günlərində olduğu kimi yenə də Türkiyənin dəstəyinə ehtiyac var.

Politoloqlar daha bir təxribata diqqət çəkirlər. Belə ki,  noyabrın 9-da Naxçıvan yaxınlığında Rusiyaya məxsus “Mi-24” helikopteri vurulub, buna görə Azərbaycan Kremldən üzr istəyib, bunun təsadüf oluğunu bildirib.

Hadisədən iki ay keçdikdən sonra Kreml bunu sui-qəsd kimi qiymətləndirib və Azərbaycan hərbçilərinə bu ittihamla cinayət işi açmağa qərar verib.

“Müsavat.com”  saytı  “Üştərəfli 11 yanvar görüşü müəmması. Masada nələr var... “ sərlövhəli məqalədə  bəhs olunan tarixdə Azərbaycan prezidenti İlham Əliyev, Rusiya prezidenti Vladimir Putin və Ermənistanın baş naziri Nikol Paşinyan arasında ehtimal edilən görüş barədə mülahizələr irəli sürülür.

Ekspertlərə görə, N.Paşinyan görüşdən yayınmaq istəyir, özünü təcrid etmək də bu səbəbdən ortaya gəlib. Ehtimal edilən görüş gerçəkləşsə bunun nəticələri N.Paşinyana yaxşı heç nə vəd etmir. Belə ki, iddialara görə, Moskva görüşündə 10 noyabr razılaşmasının davamı olaraq yeni sənəd (komminikasiyalar, əsirlər və digər humanitar məsələlər) imzalana bilər,  bəzi müzakirə və mübadilə mövzusu olan ərazilər, erməni silahlıların tərksilah olunması, əsirlərin qaytrılması kimi məsələlər var.

Ekspertlər hesab edirlər ki, bundan sonrakı danışıqlarda hansı qərar qəbul olunursa- olsun heç bir halda Azərbaycanın əleyhinə olması gözlənilmir. Çünki Azərbaycan Ermənistanla sərhədlərini müəyyənləşdirməkdədir. Hazırda Azərbaycan ərazisində qanunsuz erməni silahlı birləşmələr var, onlar çıxarılmalıdır.

Ekspertlər görüşün  nəticəsiz başa çata bilməsini də istisna etmirlər.  

“Yeniavaz.com”  saytı isə “Azəriqaz” “AAAF Park”ı yalan danışmaqda ittiham etdi – Sakinlərin 5 illik qaz problemi nə vaxt həll olunacaq?”  sərlövhəli məqalədə Xirdalan şəhəri  "AAAF Park" Yaşayış Kompleksinin 1A və 1B saylı binalarının sakinlərinin 5 ildir ki, qazla təmin edilmədiklərini gündəmin müzakirəsinə daşıyırlar.

Adları çəkilən binaların sakinlərinin deməsinə görə, onların bir qismi qa sayqacları ilə bağlı vəsaiti şirkətə ödəyib, digər qismi qaz xətti çəkildikdən sonra ödəməyə hazırdırlar: “Lakin 5 ildən artıq müddətdir burada yaşayan sakinlər hələ də qazlaşdırılma üçün şirkət tərəfindən heç bir addımın atılmadığını deyirlər”.

Məsələ ilə bağlı “AAAF Park”dan bildirilib ki, qazlaşdırılma prosesini “Azəriqaz” İstehsalat Birliyi həyata keçirir, şirkət, sadəcə, onlara kömək edir. "Azəriqaz" İB-nin mətbuat xidmətinin rəhbəri Ceyhun Səfərov isə Yeniavaz.com-a açıqlama verərək “AAAF Park”ı yalan danışmaqda ittiham edib və bildirib ki, Mənzil Tikinti koorperativlərində “Azəriqaz” qazlaşdırılma işi aparmır
“Yalan deyirlər. Elə bir şey yoxdur. Bu, qəbul olunmuş qaydadır, Mənzil Tikinti koorperativlərində “Azəriqaz” heç bir qazlaşdırılma aparmır. Koorperativlər bunun üçün lisenziyası olan tikinti şirkətləri ilə müqavilə bağlayırlar. MTK-lar özlərinin eyiblərini örtmək üçün heç nəyi “Azəriqaz”ın üzərinə atmamalıdırlar”.