Media-icmal 10.01.20

Ölkədə enerji istehsalının artmı, avtomobil bazarındakı bahalıq ətrafında müzakirələr, daşınmaz əmlak sığortasının aktuallaşması və s. məsələlər medianın aparıcı mövzuları sırasındadır...

Enerji sahəsinə artan tələbat

“Azərbaycan” qəzeti “Azərbaycan qısa zamanda enerji idxalçısından ixracatçısına çevrilmişdir” sərlövhəli məqalədə ölkədə enerji istehsalının inkişafını dyərləndirir.

Müəllif hesab edir ki, Azərbaycan daxili istehsal hesabına özünü dayanıqlı enerji ilə təmin edə bilən ölkələrdəndir.

Onun sözlərinə görə, bu dövlət siyasətinin nəticəsidir ki, hazırda ölkənin ucqar dağ kəndləri belə fasiləsiz enerji ilə təmin olunur, hələ Rusiya, İran və Gürcüstanla enerji mübadiləsi aparır.

Yazı müəllifi diqqəti Vüqar Əhmədovun bu günlərdə  “Azərişıq” ASC-yə sədr təyinatı ilə əlaqədar dövlət başçısı İlham Əliyev tərəfindən qəbul edilməsinə çəkir. 

“Bu, çox məsuliyyətli vəzifədir və enerji təminatı hər bir ölkə üçün strateji sahədir. Son illər ərzində ölkəmizdə bu sahədə çox böyük işlər görülübdür. Regionların sosial-iqtisadi inkişafına dair 2004-cü ildə qəbul edilmiş I Dövlət Proqramı çərçivəsində enerji güclərinin yaradılması nəzərdə tutulurdu. Artıq biz buna tam nail olduq”, deyə dövlət baçısı bu sahənin əhəmiyyətini yeni sədrə anladıb.

Müəllifin sözlərinə görə, dövlət başçısı son 15 il ərzində təqribən 3000 meqavata yaxın yeni generasiya gücləri yaradıldığını, bunun da bir çox elektrik stansiyalarının inşası sayəsində mümkün olduğunu bildirib.

Yazıda bildirilir ki, dövlət başçısı istehsal olunan enerjinin istehlakçıya itkisiz çatdırılmasının mühüm əhəmiyyət daşıdığını, bunun üçün paylayıcı şəbəkələrin dövrün tələblərinə cavab verəcək səviyyəyə gətirilməsini vacib adlandırıb.

Müəllif deyir ki, dövlət başçısı bunu da əlavə edib ki, paylayıcı xətlər tamamilə yenilənib, bütün şəhərlərdə yarımstansiyaların, transformatorların təzələnməsi sayəsində bu problem həll olunub, amma kənd yerlərində bu problem tam həllini tapmayıb, yeni sədrə bu problemin həll tapşırılıb.

Daha sonra müəllif deyir ki, ölkə inkişaf etdikcə enerjiyə tələbat artır, odur ki, enerji sahəsində bütün istismar qaydaları yüksək səviyyədə təmin edilməli, dayanıqlı enerji ilə təminatı üçün yarımstansiyaları dairəvi qaydada birləşdirməklə qəzalardan qorumalıdır.

Daha sonra isə müəllif son 16 ildə inşa edilmiş elektirk stansiyaları barədə məlumat verir və son olraq deyir: “Qarşıdakı illərdə enerjiyə olan tələbatın artacağını nəzərə alaraq, indidən bir sıra işlərin görülməsi planlaşdırılır. Bu da ölkəmizin elektrik enerjisi ilə daim yüksək səviyyədə təminatından xəbər verir”.

Maşınların qiyməti niyə bahalaşır?

“Yenisabah.az”da isə “Maşınların qiymətinin kəskin bahalaşmasına səbəb nədir?” sərlövhəli məqalə oxumaq olar.

Müəllif avtomobil bazarındakı canalanma və bahalaşmanın səbəbləri barədə düşüncələrinə yer verib.

Müəllif Bakının avtomobil bazarındakı satıcılara istinadən deyir ki, 2020-ci ildən avtomobil bazarında bir tərəfdən qiymət artımı, digər tərəfdən canlanma müşahidə edilir.

“Bazarda qiymət artımı daha çox maşın bazarına yeni avtomobillər daxil olandan sonra başlanıb, 2019-cu ilin dekabrında bazara ən çox Koreya və Yaponiya istehsalı olan maşınlar gətirilib. Daha çox tələbat “Mercedes” modellərinə və qiyməti 12-17 min manat arası Koreya avtomobillərinədir.

Müştərilər ən çox dizellə çalışan və mühərrik həcmi az olan avtomobillərə üstünlük verirlər”, deyə müəllif bildirir.

Müəllif deyir ki, indi bazarda 1990-cı ilin “Mercedes 190” modelləri 5-7 min, 2003-cü il olan “Mercedes E-220” 15 min, “Mercedes C180” (çeşkalar) 10-14 min, “Mercedes” E-classlar (dördgözlər) 12-16 min manata satılır. 2008-ci ildən əvvəl istehsal edilən “Kia”lar (sedan) vəziyyətindən asılı olaraq 10-29 min, 2008-ci ildən əvvəl olan “Hyundai”lar isə 15-29 min manata satılır.

Ekspertlər isə hesab edirlər ki, qiymətlərin artmasına bir neçə amil təsir edir, bunlardan biri bu yaxınlarda 7 il öncəyə qədər istehsal edilən avtomobillərin ölkəyə gətirilməsi üçün idxal rüsumların ləğvi tələbidir, qərar olmasa da, çağırış bazarda müəyyən canlanmaya səbəb olur.

Ekspertlərə görə, daha bir amil Gürcüstandan bura gətirilib, 3 aydan bir sərhədi keçməklə istifadə olunan avtomobillərlə bağlı tətbiq edilən qadağadır.

İndi isə məhdudiyyət var və bu da o deməkdir ki, həmin insanlar avtomobillərini satıb, daxili bazarda avtomobil almağa yönlənəcəklər, bu isə qiymətlərin artmasına səbəb olan faktlardan biridir.

Ekspertlər daha bir amil kimi vətəndaşların bank əmanətlərinin son bir ildən artıq müddət ərzində kifayət qədər artmasını göstərir və bunu əhalinin gəlirlərinin artması kimi dəyərləndirir, həm də hesab edirlər ki, bütün bunlar maşın bazarında qiymətlərin artmasına təsir edir.

Müəllif deyir ki, ekspertlər ölkənin maşın bazarında köhnə maşınların çoxluğundan narahatdırlar, bu məsələ ilə bağlı ciddi təhlillər aparılmalı, maşın bazarının durumu kompleks şəkildə təftiş edilməlidir.

Ekspertələrə görə, yaxın bir neçə ilə hesablanan proqram hazırlanmalıdır ki, həm qiymətlər bu şəkildə qalxmasın, həm də paralel olaraq avtomobil parkında köhnə avtomobillərin sayı azalsın, yenilənmə olsun.

Sığorta işinə kimlər nəzarət edir?

“Modern.az”da isə “Mərkəzi Bankdan (MB) daşınmaz əmlakın sığortası barədə açıqlama” sərlövhəli məqalə diqqət çəkir.

Müəllif MB-nin daşınmaz əmlakın icbari sığortası ilə bağlı məsələyə aydınlıq gətirdiyin bildirir.

MB “modern.az”a bildirir ki, 2019-cu ildə ölkədə baş vermiş irihəcmli yanğın hadisələrindən sonra vətəndaşlara və sahibkarlara dəymiş zərərin sığorta mexanizmi vasitəsilə ödənilməsi nəzərdə tutulur: “Bu sahədə dövlət yükünün azaldılması məqsədilə Qanunun icrasına tam nəzarət və tətbiqi üçün Azərbaycan Respublikasının yerli icra hakimiyyəti orqanları, Fövqəladə Hallar Nazirliyi və Azərbaycan Sığortaçılar Assosiasiyası tərəfindən təbliğat və təşviqat işləri aparılır və bununla da 2020-ci ildən başlayaraq bu sahədə tədbirlər həyata keçiriləcək”.

MB bildirir ki, daşınmaz əmlakın sığortalanması ilə bağlı müqavilə bağlanmadığı halda fiziki şəxslər otuz, vəzifəli şəxslər səksən, hüquqi şəxslər iki yüz manat məbləğində cərimə edilirlər.  

MB-nin şərhində deyilir ki, İnzibati Xətalar Məcəlləsinin 469.1-ci maddəsi ilə yaşayış binalarının, yaşayış evlərinin və mənzillərin icbari sığortasına yerli icra hakimiyyəti orqanları, digər daşınmaz əmlakın icbari sığortasına və daşınmaz əmlakın istismarı ilə bağlı mülki məsuliyyətin icbari sığortasına Fövqəladə Hallar Nazirliyi baxır.

MB-nin açıqlamasına görə, 2019-cu il may ayının 21-də Nazirlər Kabineti “Sığorta sektorunun inkişaf etdirilməsi üçün görülməli işlərlə bağlı Tədbirlər Planı”nı (Tədbirlər Planı) təsdiq edib.

Daşınmaz əmlakın icbari sığortasının elektron qaydada alınmasının təmin edilməsi elektron informasiya sistemlərinin inteqrasiyası ilə həyata keçiriləcək.

Müvafiq sığorta növü üzrə elektron informasiya sistemlərinin inteqrasiyası və sığortanın əlçatanlığının təmin edilməsi məqsədi ilə qanunvericiliyin təkmilləşdirilməsi nəzərdə tutulub”, - deyə rəsmi məlumatda vurğulanır.