Media-icmal 11.06.20

Sosial layihələrin icrası, un məmulatlarının bahalaşa bilməsi ehtimalı, vətəndaşın polis bölməsində işgəncəyə məruz qalması iddiası və s. məsələlər medianın aparıcı mövzuları sırasındadır.

İxtisar edilməyən layihələr

Rəsmi “Azərbaycan” qəzeti “Heç bir sosial infrastruktur layihəsi ixtisar edilməyəcək” sərlövhəli məqalədə bəhs olunan istiqamətdə layihələrin icrasından danışılır.

Müəlifin deməsinə görə, koronavirus pandemiyasının yaratdığı böyük çətinliklərə baxmayaraq, bu il üçün nəzərdə tutulan sosial infastruktur layihələrinin icrası davam edir və son aylarda ölkə üzrə 10-larla sosial infrastruktur obyekti istifadəyə verilib: “İnfrastruktur layihələri keçən ilin əvvəlində qəbul edilmiş regionların sosial-iqtisadi inkişafı IV Dövlət Proqramı çərçivəsində həyata keçirilir. Bu, beşillik proqramdır. Bundan əvvəlki üç proqram müvəffəqiyyətlə icra edildi. Əminəm ki, dördüncü proqramın icrasında da heç bir problem olmayacaq” , - müəllif dövlət başçısı İlham Əliyevdən sitat gətirir.

Müəllif 1 saylı Kliniki Tibbi Mərkəzin nəzdində üç korpusdan ibarət 200 çarpayılıq, bu tipli daha 3 xəstəxananın açılışını nümunə göstərir, həm də deyir ki, koronavirus pandemiyası başa çatdıqdan sonra bu binalar başqa məqsədlər üçün də istifadı edilə bilər.  

Məqalə müəllifi əlavə edir ki, bununla yanaşı Dayanıqlı və Operativ Sosial Təminat Agentliyinin (DOST) Bakının Nizami rayonunda yerləşən 3 saylı DOST mərkəzi də istifadəyə verilib.

Müəllifə görə, “Qobu Park-3” yaşayış kompleksinin istifadəyə verilməsi bu siyasətin davamlı olmasının göstəricisidir: “Bu da bir daha göstərir ki, nəzərdə tutulan heç bir sosial infrastruktur layihəsi ixtisar edilməməklə yanaşı günün, zamanın tələbi ilə yenilərinin də icrasına qərar verilir”.

Ekspertdən bahalaşma ehtimalı

“Redaktor.az” saytında  “Ekspert: Azərbaycanda un və çörək bahalaşa bilər- həftəsonu qadağası” sərlövhəli məqalədə ehtimal olunan problemlə bağlı müəllif keçmiş deputat, iş adamı Nazim Bəydəmirili ilə söhbətləşir.

İş adamı deyir ki, Azərbaycanda çörək və s. un məmulatları üçün istehlak olunan buğdanın əhəmiyyətli bir hissəsi xarici ölkələrdən gətirilir: “Azərbaycanın mövcud iqtisadi vəziyyəti özümüzü buğda məhsulları ilə təmin etməyə imkan vermir. Digər ölkələrə nisbətən çörək istehlakı bizdə daha yüksəkdir. Yəni, əhalinin qida rasionunda daha çox un məmulatları, xüsusən də çörək əsas yer tutur”, - iş adamı belə söyləyir.

N.Bəydəmirli deyir ki, pandemiya dönəmində xarici ölkələrin ərzaq satışına tətbiq etdiyi qadağalar artarsa, un və un məhsullarında qiymət artımının baş verməsi qaçılmaz ola bilər: “Pandemiya dönəmində bir çox ölkələr ixracı önləmək üçün bəzi məhdudiyyətlər tətbiq edirlər. Əgər buğda idxal etdiyimiz ölkələrdə  belə məhdudiyyətlər davamlı olsa, istər-istəməz zəncirvari bahalaşma baş verə bilər”.

İş adamına görə, Azərbaycanı ümumilikdə ərzaq ehtiyatı idxaldan asılı olan ölkə kimi qiymətləndirmək olar.

Həftə sonları tətbiq olunan karantin məhdudiyyətlərilə bağlı istehlak üçün çörəyin vətəndaşlar tərəfindən tələb olunduğundan çox alunması, sonra atılmasına diqqət çəkən iş adamı deyir: “Belə məsələlər gündəmə gəldikdə hökümət nümayəndələri çıxış etməlidirlər. Müasir statistikanı doğru-dürüst araşdırmalı və təqdim etməlidirlər. Vətəndaşın mütləq əksəriyyətinin hökümətin adından danışan insanlara etibarı azdır...İsrafçılıq həm də bir mədəniyyət məsələsidir. Bunu təqdim etməyin özünün yolları var, insanları maarifləndirmək lazımdır”.

Vətəndaşın iddiası, poisin təkzibi

“Sfera.az” saytı isə “Daxili Işlər Nazirliyi açıqlama yaydı: “Kərim xəsarətləri tabesizlik göstərərkən alıb...” sərlövhəli məqalədə müəllif vətəndaşın xəsarət almasının səbəbləri barədə danışır.

Müəllifin deməsinə görə, iyunun 8-də Yasamal rayonunda çevik polis alayının keçirdiyi əməliyyat zamanı saxlanılan və 15 sutka müddətinə inzibati həbs edilən Kərim Süleymanlının polis tərəfindən döyülməsi iddiaları araşdırılıb.

Müəllif əlavə edir ki, Bakı Şəhər Baş Polis İdarəsinin mətbuat xidmətinin rəisi, polis mayoru Elşad Hacıyev K. Süleymanlının polis bölməsində təzyiqə məruz qalması iddiaları ilə bağlı xidməti yoxlama aparıldığını diqqətə çatdırıb.

Açıqlamaya görə, K.Süleymanlı iyunun 7-də Yasamal rayonunda gücləndirilmiş karantin rejiminə nəzarəti həyata keçirən polis əməkdaşlarının üzərinə məişət əşyaları atanlardan, təhqiramiz ifadələr işlədən sakinlərdən biridir. “İddialar üzrə hər bir xüsusat tərəfimizdən yoxlanılıb. Onun polis əməkdaşları tərəfindən döyülməsi faktı təsdiqini tapmayıb. İddiaları qəti şəkildə təkzib edirik”.

Xatırladaq ki, iyunun 7-də Yasamal rayonuun Dadaş Bünyadzadə küçəsi, 13 saylı binasının bəzi sakinləri həftəsonu sərt karantin rejimini pozan bir şəxsin polis tərəfindən saxlanmasına etiraz ifadə ediblər. Onlar polisə zibil torbaları atıblar, təhqiramiz ifadələr işlədiblər.

Buna cavab olaraq iyunun 8-i erkən səhər saatlarında polis qüvvələri həmin ünvanda  əməliyyat keçirib, iyunun 7-də baş vermiş insidentdə iştirakçı olan şəxsləri saxlayıblar. DİN-in açıqlamasına görə, 11 sakin saxlanılıb. Onlardan biri də K.Süleymanlıdır. K.Süleymanlı iyunun 8-də saxlansa da səhhətindəki problemlərlə bağlı iyunun 9-da sərbəst buraxılıb. Sərbəst buraxıldıqdan sonra K.Süleymanlı polis bölməsində çoxsaylı polis əməkdaşları tərəfindən fikzii işgəncəyə məruz qaldığını bildirib.