Media-icmal 12.04.21

Neftçalada ekoloji fəlakət yaşana bilməsi, Ekologiya və Təbii Sərvətlər Nazirliyinin buna münasibəti, koronavirusa yoluxma ilə intiharlar arasında əlaqə, uşaqpulunun ödənilməsinin əsasları, Rusiya sülhmramlılarının fəaliyyətinə münasibət və s. məsələlər medianın aparıcı mövzuları sırasındadır...

“Yenisabah.az ” saytında “Neftçala ekoloji fəlakət astanasında - Xəzər dənizinin suyu Kür çayında 40 kilometr irəlilədi” sərlövhəli məqalədə Xəzər dənizi sularının Kür çayına axması müzakirə edilir.

İqtisadçı-ekspert Natiq Cəfərli bunun nəticəsində Kür çayında suyun şoranlaşdığını, Neftçala rayonunun Mayak, Şirvanlı, Kürkəndi, Bankə, Tatarməhlə, Mirqurbanlı və ümumilikdə, 15 yaşayış məntəqəsində su problemi yarandığını bildirir.

Ekspertin sözlərinə görə, əhali istifadəyə su tapmır, çox ciddi içməli su problemi yaranıb, suvarma problemi də var, bəzi fermerlər əkin sahələrini şor su ilə suvarmaq istəyir ki, bu da səhv qərardır.

O bildirir ki, neçə illər olduğu kimi, problem yenə də Kürün deltasında yaranıb, son illər bu məsələ ilə bağlı büdcədən 10 milyonlar ayırlsa da problem həllini tapmır: “Kürün su resurslarının vəhşiçəsinə istismarı, hökumətin bacarıqsızlığı, korrupsiya Kür deltası problemini 25 ildir ki, həll etməyə mane olur”, deyə iqtisadçı bildirir.   

“Oxu.az” saytında da “Nazirlikdən Kürün aşağı axınında suyun duzluluğunun artması ilə bağlı açıqlama” sərlövhəli məqalədə bəhs olunan məsələyə aydınlıq gətirilir.

Ekologiya və Təbii Sərvətlər Nazirliyi Kürün aşağı axınında suyun duzluluğunun artmasına səbəblərdən biri kimi qrunt sularının qalxmasının göstərilməsini etibarlı arqument saymır. Nazirlik bunu onunla əsaslandırır ki, son 10-gündə Neftçalaya cəmi bir gün 3 mm yağıntı düşüb. Eyni zamanda, nazirlik bildirir ki, keçən ilin aprel ayı ilə müqayisədə bu il dəniz suyunun səviyyəsi 18 sm aşağıdır: “Belə halda son günlərdə qrunt sularının təsiri nəticəsində duzluluğun artması ehtimalı yüksək deyil”, deyə nazirlik bildirir.

Amma nazirik diqqətə çatdırır ki, aprelin ilk dekadasında küləkli hava günləri çox olub, Kürün sululuğunun normadan az olması onun axarının sürətinin azalmasına, bu da öz növbəsində külək gücləndiyi zaman dəniz suyunun çayın məcrasına daxil olmasına səbəb olur.

Nazirliyə görə, temperaturun yüksəlməsi, yüksək dağlıq ərazilərdə qarın tədricən əriməsi və gözlənilən yağıntılı hava şəraiti ilə bağlı yaxın günlərdə Kür çayına tökülən çaylarda sululuğun artımı gözlənilir.

“Modern.az” saytında isə “Koronavirus intiharların artmasına təsir göstərir: İnsanlarda fobiyalar artıb” sərlövhəli məqalədə koronavirus pandemiyası ilə intiharların artması arasında paralellər aparılır.  

Müəllif deyir ki, artıq bir ildir ki, koronavirusa qarşı mübarizə aparılır, insanların həyat rejimində ciddi pozulmalar müşahidə edilir, qapanmalar həyat rutininə mənfi təsir göstərir, virusa yoluxmaq qorxusu isə insanları intihara sürükləyir.

Azərbaycan Tibb Universitetinin infeksion xəstəlikləri kafedrasının dosenti İlham Bayramov da insanların bu xəstəliyə qarşı psixo-fobiyası olduğunu deyir.

Mütəxəssis hesab edir ki, belə şəxslərə müalicə ilə yanaşı psixoloqlar, psixoterapevtlər, psixiatrlar yardım etsələr yaxşı olar: “Xəstəliyin özündən çox fobiya insanlarda ciddi problemlər yaradır. Xəstəliyi insanlara elə təqdim ediblər ki, yoluxmayanlar belə virusdan ciddi şəkildə qorxurlar”, deyə mütəxəssis problemin mənbəyini göstərir.

“Bizimyolinfo.az” saytında isə “Rusiya qüvvələrinin Qarabağdan çıxarılması...” sərlövhəli məqalədə Rusiya sülhməramlı qüvvələrinin Qarabağdakı fəaliyyəti şərh edilir.

Hərbi məsələlər üzrə ekspert Ədalət Verdiyevə görə, Rusiya tərəfi erməni ictimaiyyətinə sanki Qarabağda əbədi qalacaq kimi tərz nümayiş etdirir. O əlavə edir ki, Şuşada, Laçında sülhməramlılar üçün əlavə şəhərciklərin salınmasına dair verilən bəyanatlar Azərbaycanın maraqlarına ziddir və həyata keçirilməsi mümkün deyil.

Həm də Rusiyanın belə  davranışı Azərbaycan ictimaiyyətinin ona qarşı neqativ fikirlərə köklənməsinə səbəb olur.

Ekspert hesab edir ki, Rusiya bu məsələlərə aydınlıq gətirməli və Azərbaycan ilə münasibətləri qorumağa çalışmalıdır: “Əks halda Azərbaycan cəmiyyətində Rusiyanın Qarabağda gözlənilən müddətdən də daha erkən çıxması üçün sosial sifariş formalaşa bilər. Bu isə dönüşü geri olmayan proseslərlə nəticələnə bilər”.

Ekspertə görə, əgər Rusiyanın davranışlarında dəyişiklik olmasa, bu cür təpkilər gələcəkdə arta da bilər.