Media-icmal 13.05.20

Koronavirus pandemiyasına qarşı ölkə rəhbərliyi səviyyəsində mübarizə, tibb işçilərinə verilən əlavə ödəmələrin düzgün hesablanmaması iddiaları, torpaq sahəsi olanların hamısnın məşğul əhali sayılmasına baxış, “Euro Home” tikinti mateiralları bazarındakı yanğına münasibət və s. məsələlər medianın aparıcı mövzuları sırasındadır... 

“Azərbaycan” qəzeti “İlham Əliyevin qlobal təşəbbüsü birləşdirici faktora çevrilir” sərlövhəli məqalədə Azərbaycanda dövlət rəhbərliyi səviyyəsində koronavirus pandemiyasına qarşı mübarizə aparlması dəyərləndirlir. 

Müəllifin sözlərinə görə, bu günlərdə Rusiyanın “Mir” telekanalına müsahibəsində İ.Əliyev qlobal pandemiyaya qarşı mübarizədə görülən qabaqlayıcı tədbirlərdən söz açıb.

Müəllif əlavə edir ki, dövlət başçısı TASS informasiya agentliyinə görülən konkret tədbirlərdən söz açaraq, bütün ölkələrin əsas vəzifəsinin bu xəstəliyin inkişafını, onun geniş yayılmasını yavaşıtmaq olduğunu ifadə edib.

Yazı müəllifi deyir ki, dövlət başçısı bir sıra başqa ölkələr kimi bu virusun Azərbaycana kənardan gətirildiyini, mübarizə üçün sərhədlərin bağlandığını, məhdudlaşdırıcı tədbirlərə əl atıldığını vurğulayıb: “Biz həmin tədbirləri şəraitə uyğun olaraq tətbiq etdik və hadisələrin arxasınca getməyə yox, onları qabaqlamağa çalışdıq, əks halda uğur qazana bilməzdik”,

Məqalədə vurğulanır ki, pandemiya ilə mübarizə üçün 23 laboratoriya alınıb, 160 mindən çox şəxs testdən keçirilib, bu, xəstəliyin yayılma ocaqlarının, o cümlədən regional baxımdan aşkar olunmasına kömək edir.

Müəllifin sözlərinə görə, dövlət başçısı keçirilmiş tədbirlər kompleksi sayəsində ölkənin hələlik bu vəziyyətdən minimum itkilərlə çıxa bildiyini vurğulayıb.

Bununla yanaşı, məqalədə vurğulanır ki, dövlət pandemiyadan əziyyət çəkənlərə təqribən 2 milyard dollarlıq sosial-iqtisadi yardım paketi ayırıb, bu paket, ilk növbədə, pandemiyadan əziyyət çəkən sahələrdə çalışan 700 minə yaxın insanı və mikro sahibkarları əhatə edir, həmçinin vergi güzəştləri, vergi tətilləri də var.

Pandemiya şəraitində də fasiləsiz nəqliyyat daşımaları həyata keçirilir.

“Azadlıq.info” saytı isə “Tibb işçilərini aldadıb, pullarını düzgün vermirlər” sərlövhəli məqalədə koronavirus pandemiyasına qarşı mübarizə aparan tibb işçilərinin əməkhaqlarına əlavələrin hesablanması müzakirə edilir.

İqtisadçı alim Qubad İbadoğlu hesab edir ki, tibb işçilərinin pullarını düzgün vermirlər, əmək haqqına əlavələr aylıq deyil, növbədə olduqları günlərin sayı əsasında aparılır.

Q.İbadoğlu əlavə edir ki, mart ayında onlara orta hesabla 60 manat, birdəfəlik ödəmənin 30 faizi qədər vəsait ödənilib.

Alim davam edərək deyir ki, bu il mart ayının 18-də dövlət başçısı İlham Əliyev koronavirus infeksiyasına qarşı mübarizədə birbaşa iştirakçı olan tibb işçilərinin, həkimlərin və s. personalın maaşlarına 3-5 mislində müddətli əlavələr olunması barədə sərəncam imzalayıb.

“Lakin, mənə edilən müraciətlərdən məlum olur ki, Nazirlər Kabinetinin qərarında sadalanan kateqoriyaya uyğun gələn dövlət tibb müəssisələrində çalışan işçilərin əməkhaqlarına müddətli əlavələr nəzərdə tutulan məbləğdə edilməyib.

Belə ki, onların əmək haqqına əlavələr aylıq deyil, növbədə olduqları günlərin sayı əsasında aparılır. Bu isə ödəniləcək əlavə məbləğin azaldılmasına hesablanıb”.

Q.İbadoğlu rəsmi açıqlamalara istinadən deyir ki, mart ayında 10 mindən çox tibb işçisi koronavirusla mübarizəyə cəlb edilib və onlara əlavə olaraq 6 milyon manat vəsait ödənilib: “Yəni 1 nəfərə orta hesabla 60 manat, birdəfəlik ödəmənin 30 faizi qədər əlavə məbləğ ödənilib. Hesab edirəm ki, Səhiyyə Nazirliyi və İcbari Tibbi Sığorta üzrə Dövlət Agentliyi izahat verməlidir”.

“Müsavat.com” saytında “Torpaq sahəsi olanların hamısının məşğul sayılması ədalətsizlikdir” sərlövhəli məqalədə ölkədə məşğulluq məsələsi gündəmin müzakirəsinə daşınır.

Müəllif deyir ki, qanunvericilikdə kənd təsərrüfatı torpaqları olan şəxslərin avtomatik məşğul sayılması son iki ayda ən çox müzakirə olunan məsələlərdən biridir. Yazı müəllifinin sözlərinə görə, əksər müstəqil ekspertlər, deputatlar bu sahədə qanunverciliyə dəyişiklik olunmasını təklif edirlər, bununla bağlı Milli Məclisdə də məsələ qaldırılıb.

Ekspert Rövşən Ağayev ucdantutma bütün torpağı olanların məşğul sayılmasını beynəlxalq metodologiya baxımından yanlış sayır: “Qəfil gələn böhran da bu arqumentin haqlı olduğunu göstərdi. Ən azından indi yanaşma dəyişməli, “Məşğulluq haqqında” qanuna təcili dəyişiklik olunmalıdır”.

Daha sonra ekspert yoxsulluq, aclıq hədlərini müəyyən etmək üçün bəzi yanaşmalar təklif edir.

“Oxu.az” saytı “EuroHome”un sahibi nazirin ittihamlarına cavab verdi: Bizim günahımız yoxdur” sərlövhəli məqalədə “EuroHome” şirkətinin rəhbəri Samir Məmmədovun açıqlamasına yer verib.

“Axşam baş vermiş yanğında (2020-ci il mayın 11-i nəzərdə tutulur - red. ) bizim günahımız yoxdur. Hazırda araşdırma gedir. Yəqin ki, hər şey bəlli olacaq”, mayın 11-i axşam yanğın baş verən “EuroHome” tikinti materialları bazarının rəhbəri Samir Məmmədov belə deyib.

Şirkət rəhbərinə görə, bazarda yanğından mühafizə olunmaq üçün bütün ehtiyat tədbirləri görülübmüş: “Bazarda nə elektrik naqilləri işləyib, nə qaz olub. Belə olan halda yanğın necə baş verə bilər? Mühafizəçimizin sözlərinə görə, yanğın bazarın arxasında yerləşən “TIR parkı”ndan başlayıb. Çox güman ki, onun dedikləri təsdiqlənər. Hazırda burada ciddi araşdırmalar gedir. Bu dəqiqə mən Baş Prokurorluğun müstəntiqlərinə ifadə verirəm”.

S.Məmmədov Fövqəladə Hallar naziri Kəmaləddin Heydərovun şirkəti məsuliyyətsizlikdə ittiham etməsinə də cavab verərək deyib ki, yanğından mühafizə üçün lazım olan hər şeyi edilib, yanğının söndürülməsi üçün bazarda olan su ehtiyatından və digər köməkçi vasitələrdən istifadə edilib.